ပ္ဍဲပေါဲရုဲမာဲ သၞာံ ၂၀၁၅ တုဲကၠုၚ်တေံဂှ် ပ္ဍဲတွဵုရးမန်ဏံ ညးလုပ်ပြိုၚ်ပေါဲရုဲမာဲတုဲ မၞုံကဵုအခေါၚ်ကလေၚ်ပ္တိတ် ကေတ် သြန်ဒုၚ်လျိုၚ်လုပ်ပေါဲရုဲမာဲ နွံ ၁၂၁ တလတုဲ အပ္ဍဲဂှ် မၞိဟ်ပ္တိတ်ကေတ်တုဲ နွံ ၇၈ တလတုဲ မၞိဟ်ဟဂွံ ကၠုၚ်ပ္တိတ်ကေတ်ဏီဂှ် နွံ ၄၃ တလဏီရ သာ်ဝွံ ဥူဟိၚ်လေန်ထိတ် ညးလျိုၚ် ပေါဲရုဲမာဲ တွဵုရးမန် ဟီုရ။

ကၠာဟွံစိုပ်ပေါဲရုဲမာဲက္ဍၚ် ညးစၞးမစုတိအာတံကီု၊ ညးဒးဒုၚ်တးပါဲ တၞးလိက်ပ္တိုန်လဝ်တံကီု၊ ညးစၞးဂမၠိုၚ် နူဒေသ မာဲ ဒးဒုၚ်ပဆုဲထောံ ပေါဲရုဲမာဲကီု၊ ပ္တိုန်လဝ်စရၚ်တုဲ ညးဟွံဒှ်လုပ်ပြိုၚ် တံကီု၊ ညးစၞး ဇၞးအာမာဲတံကီု၊ ညးကလိဂွံ မာဲ လၟိဟ်မာဲခိုၚ်ကၠိုက် ဗၞတ် ၈ ဂအုံ ၁ ဂအုံ ကေုာံ လ္ပာ်လ္တူကီု နွံကဵုအခေါၚ်ပ္တိတ်ကေတ် သြန်ဒုၚ်လျိုၚ် လုပ်ပေါဲ ရုဲမာဲဏံရ။

ဥူဟိၚ်လေန်ထိတ်ဂှ် “ပိုဲမိက်ဂွံကဵုကၠုၚ်ပ္တိတ်ကေတ်ပြဟ်ဟ်ဂှ်- ကာလဏံ ဒှ်ဒၟံၚ်ကာလ ဒးပြံၚ်စၠောံ စရၚ်သြန် (ဗာတ်ဂျေတ်)တုဲ ဒးသရောပ်စရၚ်ဏောၚ်၊ ဒးစၠောံဏာ စရၚ်သြန်ဂတတေံဏောၚ် ဒှ်မံၚ်ဗီုဂှ်တုဲ၊ ပိုဲပ္တိတ်လဝ် လၟုဟ်ဂှ် သြန်သ္ကုတ်လ္ပာ်ဏံဏောၚ်၊ ဥပမာ နူကၟိန်ဍုၚ်တေံ ပ္တိတ်ကဵုလဝ်ပိုဲ အရၚ်မၞိဟ် ၁၀၀ မ္ဂး အရၚ်မၞိဟ် ၁၀၀ ဏံ ပိုဲမိက်ဂွံပ္တိတ်ကဵု ပ္ဍဲသၞာံဏံ သ္ကုတ်ဏံရ၊ သ္ပဗီုဏံတှေ် စပ်ကဵု စရၚ်သြန်ဘဏ္ဍာတှေ် ဍေံသောၚ်အာဏောၚ်။ မိက်ဂွံဟီုဂှ် ကၠာဟွံစိုပ်ဂိတုမာတ်ချ်ဏံ မိက်ဂွံကဵု ကၠုၚ်ပ္တိတ်ကေတ် သီုညးဖအိုတ်” သာ်ဝွံ ဂးတဴရ။

အတိုၚ်နဲဥပဒေပေါဲရုဲမာဲမ္ဂး ကၠောန်ပေါဲရုဲမာဲတုဲ အပ္ဍဲပွိုၚ် ၆ ဂိတု ဟွံကၠုၚ်ပ္တိတ်ကေတ်မ္ဂး သြန်တံဏံ ဒးပၠောပ်ပ္ဍဲ ဘဏ္ဍာဍုၚ်ရ။ အခါလၟုဟ်မ္ဂး ညးစၞးလ္ၚဵုလ္ၚဵု မဇၞးလဝ်မာဲဂှ် အာတိုန်နွံဒၟံၚ် ပ္ဍဲကၠတ်ထဝ်ကၟိန်ဍုၚ်ဖိုဟ်တုဲ ညးတံဂှ် ဟွံဂွံကၠုၚ်ပ္တိတ်ဏီ ဂွံတီကေတ် နူကမ္မယှေန်ပေါဲရုဲမာဲ တွဵုရးမန်ရ။

ညးစၞးဂမၠိုၚ် နွံကဵုအခေါၚ်ပ္တိတ်သြန် ဒုၚ်လျိုၚ်တံဂှ်လေဝ် ဟိုတ်နူဟိုတ်တေံ ဟိုတ်ဏံတုဲ ဟွံဂွံကၠုၚ်ပ္တိတ်ဏီလေဝ် နွံမံၚ် သာ်ဝွံ နာဲလျးလတၟး ညးစၞးကၠတ်ထဝ်တွဵုရး ဒေသမာဲလၟိဟ်(၂) ပွိုၚ်ဍုၚ်ဇြပ်ဗု ဂးရ။

ကမ္မယှေန်ပေဲါရုဲမာဲ တွဵုရးမန် အဃောသ္ပဒၟံၚ်ကောံဓရီု(MNA)

“နူကမ္မယှေန်ခရိုၚ် ပလံၚ်နၚ်လိက် သွက်ဂွံပ္တိတ်သြန်ဂှ် ဂွံမံၚ်ဖိုဟ်ရ။ ဆ္ဂး ဒဵုလၟုဟ် ဟဂွံအာပ္တိတ်ဏီ။ အာဂှ် အာပ္တိတ်တွဵုရ။ ဆ္ဂး ဂၠံၚ်လေဝ် ဟွံဒးဏီ၊ အခိၚ်လေဝ် နွံမံၚ်ဏီတှေ် ဟွံဒှ်အာဏီ” နာဲလျးတၟး ဂးရ။

ပ္ဍဲဗော်ကောန်ဂကူမန်ဂှ် မၞိဟ်နွံကဵု အခေါၚ်ပ္တိတ်သြန်ဂှ် နွံ ၁၃ တၠ နာဲလျးတၟး ဆက်ဟီုလဝ်ရ။

သြန်ဒုၚ်လျိုၚ် အခေါၚ် လုပ်ပေါဲရုဲမာဲဝွံ သၞာံ ၂၀၁၆ ၊ ဂိတုဂျောန်အိုတ်တေံမ္ဂး အပိုၚ်ခြာတ္ၚဲဍေံ အိုတ်ဏောၚ် ဒှ်တုဲ ကၠာဟွံစိုပ်တ္ၚဲဂှ် ညးညး အဲအဲ ညံၚ်ဂွံကၠုၚ်ပ္တိတ်ကေတ်ဂှ် နူကမ္မယှေန်ပေါဲရုဲမာဲကၟိန်ဍုၚ် လလောၚ်ပ္တိတ်လဝ် တုဲမံၚ်ကီုရ။