အပ္ဍဲကွဳစက်ဂမၠိုၚ် ဟွံလုပ်ကဵုသၞောဝ် ဟွံမွဲကဵုလိက်အခေါၚ်တုဲ ဗက်သီရပ်လဝ် အပ္ဍဲတွဵုရးဍုၚ်မန်ဏံဝွံ ကွဳစက်စၟဳ စၟတ်ထပိုတ်အမှုပိုတ်အာ နူရုၚ်သၞောဝ်ဓဝ် ပွိုၚ်ဍုၚ်တံဂှ် ဖန်ဇန်လဝ် သွက်ဂွံကော်သွံ နကဵုသၞောတ်ပြိုၚ်ၚ္ၚုဟ် ပ္ဍဲ ရုၚ်အလဵုအသဳ တွဵုရးဍုၚ်မန် ပ္ဋဲဂိတုဖေဖဝါရဳ (၁၇) ဂှ် ဒးပလီုကၠေံအစဳဇန်ရောၚ် ဂွံတီကေတ်ရ။
ကွဳစက် ၁၁ရ မ ရန်လဝ်သွက်ဂွံသွံ နသၞောတ်ပြိုၚ်ၚ္ၚုဟ်ဂှ် သ္ဒးပအပ်ကဵု ဌာနဝန်ဇၞော် ကိုန်အစဳဇန်ကဵုပရေၚ်ပိုန် ဒြပ် ကၟိန်ဍုၚ်ဏောၚ်ဂးတုဲ ဒးပလီုထောံအစဳဇန်ဂှ်ရောၚ် ဂွံတီကေတ်နူကမ္မတဳမပ္တိတ်သွံ နသၞောတ်ပြိုၚ်ၚ္ၚုဟ်ဂှ် ရ။
“နူဏေံဗ္တံဏံ လိက်စၞောန်မွဲတၞး စိုပ်ကၠုၚ်ပ္ဍဲအဲ၊ ကွဳစက်နူတွဵုရးပိုဲ ဇန်လဝ်သွက်ဂွံသွံ သၞောတ်ပြိုၚ်ၚ္ၚုဟ်ဂှ် ပအပ် ကဵု ဌာနဝန်ဇၞော် ကိုန်စဳဇန်ကဵုပရေၚ်ပိုန်ဒြပ် ကၟိန်ဍုၚ်ညိ။ တုဲမ္ဂး တွဵုရးမန် ၜိုတ်နွံပၟိက်ဍာံဍာံဂှ် ဒးဒးရးရး က္လေၚ် ပါ်ပ္တိတ်ကဵု ဌာနဂလိုၚ်တံပၠန်ဏောၚ် ဂးတုဲ ကဵုနၚ်စၞောန် ကုအဲရ” ဣၚ္ၚုဟ် သဝ်ဝန်နဲသဵု ဥက္ကဌကမ္မတဳသွံကွဳ စက် နသၞောတ်ပြိုၚ်ၚ္ၚုဟ် ဟီုရ။
ပလီုထောံအစဳဇန်ဗီုဏံဂှ် ညိလေဝ်ဟွံပေၚ်စိုတ် ဟွံပြေစိုတ်ရ ရဲပြိုၚ်ရာန်တံ ဂးအိုတ်ရ။
“အမူတံ ဒုၚ်ဖအိုတ်အခိၚ် ဒုၚ်ဖအိုတ်သြန်တုဲ ကၠုၚ်ပေါဲပြိုၚ်ၚ္ၚုဟ်ဏံ။ ကွဳစက်ဂှ် နွံ ၁၁ရ မ။ တၞးလိက်ဝီူလေဝ် အမူ ရာန်လဝ် ၃၀ တၞး။ လိက်ဝှီုမွဲတၞးတှေ် ဒးကဵု ၅ လ္ၚီဒကေဝ်။ သွက်ကွဳစက်မွဲမတှေ် ဒးကဵု သြန်ခရံ ၂၀ ကိုဋ်” သာ်ဝွံ ဥူဇြဝ်လွေန် လုပ်ပြိုၚ်ရာန်ဂှ် ဂးရ။
ပေါဲသွံကွဳစက် သၞောတ်ပြိုၚ်ၚ္ၚုဟ် တွဵုရးမန် (MNA)
ညးလုပ်ပြိုၚ်ရာန်တံ ၜိုန်အာတ် တၞးလိက် ပလီုအစဳဇန်ဂှ်ကီုလေဝ် အခေါၚ်ကဵုဟွံမွဲ ကမ္မတဳပြိုၚ်ၚ္ၚုဟ် ဂးရ။ ယဝ် မိက်ဂွံဂွံတှေ် အာအာတ်ကေတ် ပ္ဍဲဂကောံရုၚ် အလဵုအသဳတွဵုရးတေံညိ ကမ္မတဳဂှ် ဂးရ။
“အတိုၚ်လလောၚ်လဝ်ဂှ်ရ နကဵုဗီုပြၚ်ဍာံဍာံ ပိုဲမိက်ဂွံ ကဵုကလေၚ်သွံပၠန်။ မုဒှ် ဂွံပလီုထောံ အစဳဇန်ဏံရော ကၠးကၠးမးမး ကလေၚ်သောၚ်ထ်ၜးကဵုဟွံမွဲဂှ်ရ ဟွံပြေစိုတ်ဍာံဍာံရ” သာ်ဝွံ တေန်ထောန်အံၚ် လုပ်ပြိုၚ်ရာန် ကွဳ စက်ဂှ် ဟီုရ။
ဟိုတ်နူ ပလီုကၠေံပေါဲသွံကွဳစက် သၞောတ်ပြိုၚ်ၚ္ၚုဟ်ဏံဂှ်ရ ညးလုပ်ပြိုၚ်ရာန် ၜိုတ် ၂၀ တလတံ အခိၚ်လေဝ် အိုတ် သြန်လေဝ်ဆောံ ဂးရ။
ကွဳစက် သီရပ်ဂွံ ပ္ဍဲတွဵုရးမန်ဏံဂှ် ပ္ဍဲသၞာံ ၂၀၁၅၊ ဂိတုဒဳဇြေမ်ဗာဂှ် ၂၉၁ မ၊ ပ္ဍဲဂိတုဖေဖဝ်ဝါရဳ ဂှ် ၁၅၀ မ၊ ပ္ဍဲသၞာံ ၂၀၁၃ ဂိတုနဝ်ဝေမ်ဗာ ဂှ် ၈၈ မ အလဵုအသဳတွဵုရးမန် ကော်သွံထောံ နသၞောတ်ပြိုၚ်ၚ္ၚုဟ်တုဲကၠုၚ်ကီုရ။
