ပ္ဍဲကဵုရးတနၚ်သဳ၊ ပွိုၚ်ဍုၚ်ဍာ်ဗု၊ ဒေသကာန်ဗံက်တံဂှ် ကေတ်ဓဝ်ကၠိုဟ်ခၠၚ်ကဵု ညးနွံအဝဵုပ္ဍဲဒေသမဆေၚ်စပ်တံတုဲ ပံက်ဝိုၚ်ဝေၚ် ဂၠာဲမံၚ်သြန်ဂအုံ သွက်ဂွံကၠောန်ဗဒှ် သ္ဘၚ်ကျာ်/သဘၚ်ကွာန်ဂမၠိုၚ်နွံရောၚ် ဂွံတီကေတ် နူညးဒေသ တံဟီုအိုတ်ရ။

ဝိုၚ်ဝေၚ်မပ္တံကဵု ဖေဝ်၊ ဒဵုလာ်၊ ကေုာံ ပေဲါဂဇဵုစာၚ်တံပါလုပ်တုဲ လဆောဝ်မ္ဂး ဝိုၚ်ဝေၚ်မခတ်လေဝ် ပံက်တဴဒၟံၚ်နွံရ။

ညးမဒှ်ကောန်ကွာန် ခိုဟ်ဆာဲမွဲတၠ နာဲအံၚ်ဂှ် “သွက်ဂွံဗဒှ်ပေဲါဂှ်တှေ် ဒးအာအာတ်အခေါၚ်ပ္ဍဲကဵုဍုၚ်ဍာ်ဗုတေံ။ ဂွံဂွံအခေါၚ်ဝိုၚ်ဝေၚ်ဏံဂှ်တှေ် ဒးပ္ညဳကဵု ဒပ်ဍာ်၊ ဗၠာဲသၟိၚ် နွံပ္ဍဲကာန်ဗံက်၊ ညးအုပ်ဓုပ်ဂအုံကွာန်တံ” သာ်ဝွံ ညးဟီုရ။

ပေဲါဇာတ်လ္ပာ်ဒေသကာန်ဗံက်ဂှ်ဝွံ ဗွဲမဂၠိုၚ်မ္ဂး ဒှ်ဒၟံၚ်ပေဲါလှေ်ဒယှေ် နကဵုအခိုက်ကၞာထဝဲါ၊ ရမျာၚ်ထဝဲါတုဲ မွဲဗ္တံမ္ဂး နွံ ၚ္ၚုဟ်မးသြန် အကြာပန်ကိုဋ်ဘာ်ကဵု ပိကိုဋ်ဘာ်ဒကေဝ်ရ။

“ဂွံဗဒှ်ပေဲါမာန်ဂှ်တှေ် ဗက်သြန်အကံက်ဖျာသၟးတှေ် ဍေံဟွံရုံဂပ်ပုဟ်လေဝ်။ ဟိုတ်ဂှ်ရ ပံက်လဝ်ဝိုၚ်ဝေၚ်ဏံတှေ် ဂွံသြန်အပဵုသွက်ဂွံလိၚ်ပေဲါ” သာ်ဝွံလေဝ် သၟတ်ဒေသမွဲတၠ မာံလေန်နိုၚ် ဟီုရ။

ညးမကေတ်လဝ်ကာန်ထရိုက်ဝိုၚ်ဝေၚ်တံဂှ်ဝွံ စရိတ်သွက်ဂွံလိၚ်ပေဲါဇာတ်ဖ်အိုတ်ဂှ် ဒးကေတ်ကဵု တာလျိုၚ်ဖအိုတ်တုဲ ပေဲါဒှ်မံၚ် ပ္ဍဲကဵုကွာန်ပိုဲလၟုဟ်ဂှ် မွဲဗ္တံတှေ် ပန်ကိုဋ်ဘာ်၊ ပန်ဗ္တံ စှ်ဒ္စာံကိုဋ်ဂှ် ဂွံသြန် နူကဵုဝိုၚ်ဝေၚ်ဏံ ဖအိုတ်ရောၚ်ဂှ် လေဝ် သၟတ်မာံလေန်နိုၚ်ဂှ် ဆက်သောၚ်ထ်ၜးကဵုရ။

ဒေသကာန်ဗံက်၊ ဂအုမ်ကွာန်ဝါဗိုၚ် (ဖောၚ်တော်) ဂှ်ဝွံ သ္ၚောဲမံၚ်ကဵုဂၠံၚ်ကွဳစက်တုဲ နူကဵုညးတာလျိုၚ်ဇၞော်ဇၞော်တံ လေဝ် ကၠုၚ်ဟွံစိုပ်ရ၊ ယဝ်ရအကာဲအရာဟွံခိုဟ်ကၠုၚ်မ္ဂး ဗၠာဲသၟိၚ်နူကဵုကွာန်ကာန်ဗံက်တံ ကၠုၚ်ကဵုပရိုၚ်တုဲ မ္ဒးကၟာတ် ကၠေံထောံဝိုၚ်ဝေၚ်တံဂှ် မွဲချိုန်ခဏဍောတ်ရောၚ် လဂွံကဵုလဟီုညးဒေသဂမၠိုၚ်ဂှ် ဂွံတီကေတ်ရ။

ပွိုၚ်ဍုၚ်ဍာ်ဗု၊ ဒေသကာန်ဗံက်၊ ဗွိုၚ်ကွာန်ဝါဗိုၚ် (ဖောၚ်တော်) ဂှ်မ္ဂး ကွာန်ခိုဟ်ဆာဲ (ကောၚ်းမှု)၊ ကွာန် ဂြိုပ်ကွေံ (သၚ်္ကန်းတော)၊ ကွာန်စၟဳမန် (တလိုၚ်ညှော်)၊ ကွာန်ဝါဗိုၚ် (ဖောၚ်တော)၊ ကွာန်ခဒုၚ်ဇၞော် (မော်ကြီး) တံ ပါလုပ် ဒက်ပ္တန်လဝ်ရ။

အတိုၚ်သၞောဝ်ဥပဒေ အုပ်ဓုပ်အရာပ်/ကွာန် ဓမံက်ထ်ၜးလဝ် ပ္ဍဲအခန် (၇) ဂှ်မ္ဂး “စိုပ်ကဵုပရေၚ်ကမၠောန်ညးအုပ် ကွာန်ဂမၠိုၚ်” ၝောံပိုဒ် (၁၃)၊ ပိုဒ် (ဋ) ဂှ်ဝွံ ပရေၚ်ဝေၚ်ဇျှၚ်လံၚ်သြန် ဒၞဲါဆေၚ်စပ်ကဵုညးဂမၠိုၚ်ဂှ် သွက်ဂွံရပ်စပ်ကီု၊ သွက်ဂွံကေတ်အရေဝ်မာန်ကီုဂှ် မ္ဒးကဵုပရိုၚ်ကုညးအုပ်ဓုပ်က္ဆံၚ်လ္တူတံရောၚ် ချူလဝ်နွံရ။