သၚ်မန်ကလိဂွံတဆိပ်ကြာ ဆေၚ်စပ်ကဵုသာသနာတံဂှ် ဂွံဒုၚ်ဒါန်တဆိပ်ကြာနူဍုၚ်နေပျဳဒဝ်တုဲ ပ္ဍဲတရဴမက္ညစဴဂှ် ကမ္မတဳထံက်ပၚ်သာသနာ (ဍုၚ်လ္ဂုၚ်) တံ သ္ပပူဇဴပ္ဍဲကဵုဍုၚ်လ္ဂုၚ်ရောၚ်ဂွံတီကေတ်ရ။

ပ္ဍဲကဵုဂိတုမာတ် (၂၃) ဂိတုဖဝ်ရဂိုန်ပေၚ်ဂှ် နူကဵုဋ္ဌာနဝန်ဇၞော်ပရေၚ်သာသနာဂှ် ဗဂိန်ကဵုတဆိပ်ကြာမဆေၚ်စပ်ကဵု သာသၞာ ပ္ဍဲကဵုဍုၚ်နေပျဳဒဝ်တုဲ ပ္ဍဲတရဴမက္ညစဴ ဂိတုမာတ် (၂၄) ဂှ် ကမ္မတဳထံက်ပၚ်သာသနာမန်တံ သ္ပပူဇဴကျာ်ဇၞော် အ္စာမန်တံ ပ္ဍဲကဵုဇြပ်သ္ဘၚ်ဓဝ်မန်ရောၚ်။

“ပ္ဍဲနေပျဳဒဝ်တေံ ညးကဵုတဆိပ်ကြာသၚ်ဂမၠိုၚ်ဂှ် သၚ်မန်ပိုဲ ပါမံၚ် (၄) ဇကုကီုရ။ လပါ်သာသနာဂှ် ညးတံကၠောန်စိုပ် မံၚ်တှေ် ညးတံဂွံတဆိပ်ကြာရ။ ညးတံစဴကၠုၚ်စိုပ်လ္ဂုၚ်ဏံတှေ် ပိုဲပ္တိုန်ဂုဏ်စရာဲညးတံရ။ ဗုဒ္ဓဘာသာပိုဲ ညံၚ်ဂွံဇၞော် မောဝ်တဴတက်တိုန်တှေ် ဒးထံက်ပၚ်ဏောၚ်။ ဒးရီုဗၚ်ညးသ္ကအ်ဏောၚ်။ မိက်ဂွံထံက်ပၚ်သာသနာတှေ် ထံက်ပၚ် မာန်မံၚ်ဏောၚ်” သာ်ဝွံ ဥက္ကဋ္ဌ ဂကောံထံက်ပၚ်သာသနာမန် နာဲချေတ်ဖေ ဟီုရ။

ညးတံသ္ပပူဇဴလဝ် ကျာ်ဇၞော်အ္စာဘဒ္ဒန္တဝေပုလ္လ မက္လိဂွံတဆိပ်ကြာ ‘ အဂ္ဂမဟာပဏ္ဍိတ’ ဘာပရိယတ္တိကျာ်သြဳမန်၊ ပွိုၚ်ဍုၚ်ဗဟာန်၊ ရးဒေသဇၞော်လ္ဂုၚ်ကီု ကျာ်ဇၞော်အ္စာဘဒ္ဒန္တစန္ဒသိရဳ မက္လိဂွံတဆိပ်ကြာ ‘ မဟာဂန္ထဝါစကပဏ္ဍိတ’ ဘာကျာ်ပရိယတ္တိမန် ကွာန်နာၚ်ပြာၚ် ပွိုၚ်ဍုၚ်မုဟ်ဍုၚ်ကီု ကျာ်ဇၞော်အ္စာဘဒ္ဒန္တဝါရိန္ဒ မက္လိဂွံတဆိပ်ကြာ ‘ အဂ္ဂမဟာ သဒ္ဓမ္မဇောတိကဓဇ’ အရာပ်မိစဴဗု ဘာကျာ်ဍုၚ်ကျာ်မြဟ် တွဵုရးဍုၚ်မန်ကီု ကျာ်ဇၞော်အ္စာဘဒ္ဒန္တယသ မက္လိဂွံတဆိပ် ကြာ “မဟာသဒ္ဓမ္မဇောတိကဓဇ”၊ ဘာဂြိုပ်ကုန်ကြုက်၊ ကွာန်ကြုၚ်ဘာ၊ ပွိုၚ်ဍုၚ်ဘာအၚ် တွဵုရးကရေၚ်တံရောၚ်။

နူကဵုဂကောံဝွံ သွက်သၚ်အံၚ်လဝ်တန်ဓမ္မာစရိယတုဲ ဂွံအာကတ်ပညာ (M.A) ပ္ဍဲဍုၚ်သဳရိလၚ်္ကာဂှ် ထံက်ပၚ်မံၚ်မွဲ သၞာံ (၂) ဇကု နကဵုသြန်ထံက်ပၚ်နူကဵုဂကောံဂှ် မွဲဇကု၊ သြန်ထံက်ပၚ်နူကဵုဂကောံဒက်မိတ်ဍုၚ်သေၚ်ကာပေါဝ်ဂှ် မွဲဇကုရောၚ်။ အခိၚ်လၟုဟ်ဝွံ သၚ်မထံက်ပၚ်လဝ် (၁၅) ဇကုဂှ် ကလိဂွံလဝ်တဆိပ်ကြာ (M.A) တုဲ မွဲဇကုဂှ် အ ဃောကတ်မံၚ်ပညာတုဲ သီုဖအိုတ်ဂကောံဂှ် ဒုၚ်သ္ဇိုၚ်ထံက်ပၚ်ဂွံလဝ် (၁၆) ဇကုရောၚ် ဂွံတီကေတ်ရ။

နူကဵုသက္ကရာဇ်ဍုၚ် (၁၃၆၈) သၞာံတေံ ရန်တၟအ်ကဵုသ္ဂောံဒှ်ပရေၚ်ထံက်ပၚ်သၚ်မကတ်ပညာ (M.A) ဇရၚ်ဍုၚ်သဳရိ လၚ်္ကာကီု သ္ဂောံပူဇဴသၚ်မန်မအံၚ်ဇၞးတန်ဓမ္မာစရိယအလဵုအသဳ ကေုာံ သ္ဂောံပူဇဴသၚ်ကလိဂွံတဆိပ်ကြာသာသနာ တံဂှ် ဂကူ မန် မတန်တဴမံၚ်ပ္ဍဲဍုၚ်လ္ဂုၚ်တံ ဒက်ပတန်လဝ်ဂကောံထံက်ပၚ်သာသနာမန် (ဍုၚ်လ္ဂုၚ်) ရောၚ်။

စၟတ်သမ္တီတ္ၚဲဗၠးၜး နူကဵုဂိတုဂျာန္နဝါရဳ (၄) ဂှ် လလောၚ်တြးလဝ် စရၚ်ညးမကလိဂွံတဆိပ်ကြာဆေၚ်စပ်ကဵုသာသၞာ အဘိဓဇမဟာရဋ္ဌဂုရု (၅) ဇကု၊ တိပိဋကဓရ ဓမ္မဂါရိက (၁) ဇကု၊ အဂ္ဂမဟာပဏ္ဍိတ (၅) ဇကု၊ ဓမ္မကထိကဗဟု ဇနဟိတဓရ (၁) ဇကု၊ အဂ္ဂမဟာဂန္ထဝါစကပဏ္ဍိတ (၁၅) ဇကု၊ မဟာဂန္ထဝါစကပဏ္ဍိတ (၁၆) ဇကု၊ ဂန္ထဝါစက ပဏ္ဍိတ (၂၃) ဇကု၊ အဘိဓဇအဂ္ဂမဟာသဒ္ဓမ္မဇောတိက (၆) ဇကု၊ အဂ္ဂမဟာသဒ္ဓမ္မဇောတိကဓဇ (၂၅) ဇကု၊ မဟာသဒ္ဓမ္မဇောတိကဓဇ (၁၇) ဇကု၊ ခရှ် (၂) တၠ၊ သဒ္ဓမ္မဇောတိကဓဇ (၂၄) ဇကု၊ ခရှ် (၂) တၠ၊ အဂ္ဂမဟာကမ္မ ဌာနာစရိယ (၂) ဇကု၊ မဟာကမ္မဋ္ဌာနာစရိယ (၃) ဇကု၊ ကမ္မဋ္ဌာနာစရိယ (၅) ဇကုကီု ခရှ်ပတန်သာသၞာတံလေဝ် အလဵုအသဳဗ္ဂိန်ကဵုလဝ် တဆိပ်ကြာကီုရောၚ်။