နူကဵုဂကောံညးဗြဴမန်ပံၚ်တောဲ (MWN-Mon Women Network) သ္ကိုပ်သ္ကတုဲ ဂိတုမာတ်(၁၉-၂၀) ဏံမ္ဂး ပွိုၚ်ၜါတ္ၚဲဆက်က် ကၠောန်ဗဒှ်အာကောံဓရီုဇၞော်အလုံညးဗြဴမန် (Mon Women Conference) ပ္ဍဲၝောံခန်ပိုၚ်ခေတ်၊ အရာပ်မျာၚ်သာယာ ဍုၚ်မတ်မလီုဏောၚ် ဂွံတီကေတ်ရ။
ကိစ္စပရေၚ်ညဳသာသၟဟ်န် အကြာမၞိဟ်ဗြဴမန်ကီု၊ ပ္ဍဲကဏ္ဍပရေၚ်ဍုၚ်ကွာန်ကဵု ပရေၚ်ၜိုဟ်လလံဂှ် မၞိဟ်ဗြဴဗြဴတံ ညံၚ်ဂွံပါလုပ်မာန်ကီု၊ ပရူပရာ စပ်ကဵုပရေၚ်တြုံတြုံဗြဴဗြဴကီု သဳကၠဳအာ ပ္ဍဲကောံဓရီုဇၞော်ဂှ်ဏောၚ် ဂွံတီကေတ် နူကမ္မတဳကၠောန်ဗဒှ်သ္ဘၚ်သဳကၠဳရ။
“ဆေၚ်ကဵုပရေၚ်မၞိဟ်ဗြဴမ္ဂး ညးစၞး မတိုန်နူဒေသနာနာတံ ပကောံပကေဝ်လဝ် တၚ်နၚ် အရၚ်ဒေသ ညးကဵုညး နွံမံၚ်၊ ဒုၚ်သဇိုၚ် တၚ်နၚ်တံဂှ်တုဲ သဳကၠဳအာ ပ္ဍဲဂှ်ဏောၚ်” သာ်ဝွံ မိလွဳဟာန် နွံကဵုအခေါၚ်ဟီုဂး ဂကောံညးဗြဴမန်ပံၚ်တောဲ ဟီုရ။
ပ္ဍဲကေၚ်ကာ ပရေၚ်ဍုၚ်ကွာန်၊ ပရေၚ်ၜိုဟ်လလံ၊ ပရေၚ်အုပ်ဓုပ်တံ မၞိဟ်ဗြဴဗြဴတံ ညံၚ်ဂွံပါလုပ် ၜိုတ် (၃၀) က္ဍိုပ်ကၠံကီုဂှ် စွံအဓိက သဳကၠဳအာ ပ္ဍဲကောံဓရီုဇၞော်ဂှ်ရောၚ် ဂွံတီကေတ် နူဂကောံကမ္မတဳ ကၠောန်ဗဒှ်သ္ဘၚ်သဳကၠဳရ။
ဝိုၚ်ဓရီုသဳကၠဳ ပရူမၞိဟ်ဗြဴဗြဴကဵုပရေၚ်ဍုၚ်ကွာန်(MNA)
“ကိစ္စဇၞော်အိုတ်မွဲဂှ် နူမၞိဟ်ဗြဴတံ အာတ်မိက် (၃၀) က္ဍိုပ်ကၠံဂှ် ယဝ်က္လိဂွံမ္ဂး ညံၚ်ဂွံနွံကဵု ပရေၚ်ပဠေဝ်ပဠေတ်စတုဲတုဲဂှ် အရာဒးဖျေံဗီု ချိုတ်တ်ပၠိုတ်တ်ဂှ်လေဝ် သဳကၠဳအာကီုဏောၚ်” မိၚိုဲဠေ နူကမ္မတဳကၠောန်ဗဒှ်ဂှ် ဂးရ။
သွက်ဂွံတိုန်စိုပ် သဳကၠဳ ပ္ဍဲသ္ဘၚ်သဳကၠဳဏံဂှ် ဘိက်လဝ် ညးစၞး ဗၞတ် (၁၀၀) တၠ နူဂကောံ မချဳဒၟံၚ် ပရေၚ်မှာဇန်မန်၊ UN Women ကေုာံ နူဒေသ ပွိုၚ်ဍုၚ်နာနာတံရ။
ပ္ဍဲဂကောံညးဗြဴမန်ပံၚ်တောဲဏံဝွံ ဂကောံညးဗြဴမန်၊ ဂကောံစေတနာ၊ ဂကောံသၟတ်မန်လညာတ်တၟိ၊ ဌာနပရေၚ်ပညာမန်၊ ဂကောံပရေၚ်ထတ်ယုက် စွံသဇိုၚ်ဒေသပယဵု (BHI)၊ အစဳဇန်သမၠုၚ်ပ္တိုန် ဍာ်ဒ္ကေဝ်မၞိဟ်ဗြဴတံ ပံၚ်ကောံ ဒက်ပ္တန်လဝ် ဂွံတီကေတ်ရ။
