သွက်ဂွံရန်လဝ်ဘာကောန်ဂကူမန် တန်ဒေါဝ်ပွိုၚ်ဍုၚ်ဇြပ်ဗုတုဲ တ္ၚဲဏံဂိတုမာတ် ၁၁ ဂှ် စဖျေံရိုဟ်ကၞက် သိုၚ်ပ္တန်မံၚ်ပ္ဍဲကဵုကွာန်ပ္ၚ ဒၞာဲဘာလၟိဟ်(၅)ဘာလှာဂှ်ရ။
အပ္ဍဲကဵုပွိုၚ်ဍုၚ်ဇြပ်ဗုဝွံ ဘာကောန်ဂကူမန်နွံလၟိဟ်(၁၅)ဘာတုဲ ဘာတန်မူလကဵု ဘာတန်မူလ လောန် သၟးရ၊ ဟိုတ်နူဂှ်တုဲ ဂကောံအ္စာဘာတံကဵု ကမ္မတဳသြန်ဂအုံပညာပွိုၚ်ဍုၚ်တံ ချပ်ဇန်လဝ်သွက်ဂွံ သ္ပအာ ဘာတန် ဒေါဝ်ဂှ်တုဲ စသိုၚ်ပ္တန်ဒၟံၚ်ဘာတိုက်ၜါထပ်မွဲဘာရ။
‘ကမ္မတဳဘာ ကဵု ဂကောံအ္စာဘာတံချပ်လဝ်ဂှ်တှေ် ပ္ဍဲကဵုပွိုၚ်ဍုၚ်ဇြပ်ဗုပိုဲဏံဂှ် ဘာတန်မူလ ဘာမူလ လောန်သၟးနွံတှေ် သွက်ဂွံဒှ်အာဘာတန်ဒေါဝ်မွဲဘာမာန် ဆဂးတှေ် ဆလအ်စဒှ်ဘာတန်ဒေါဝ်ဂှ် တှေ် ဂကောံအ္စာဘာတံ ကဵု ကမ္မတဳသြန်ဂအုံတံ ဒးဂ္ဇံကောံဓရီုတုဲမှ ဆက်ဓမံက်အာရုပ်ရဴရောၚ်’ ဥက္ကဌ ကမ္မတဳသြန်ဂအုံနာဲဗညာဂ္ဇံ ဟီုရ။
ဘာဝွံ မုက် ၂၆ ပေနွံတုဲ ဇမၠိၚ် ၇၀ ပေ ရန်လဝ်တိုက်ၜါထပ်ရ၊ ဗ္ဒမ်ဗ္တောန်လိက်ဂှ် မွဲဗ္ဒမ်မ္ဂး အယဲ ၁၀ ပေနွံ တုဲ ဗ္ဒမ်ဖအိုတ်ကၠောန်လဝ် ၄ ဗ္ဒမ်နွံရ၊ ဘာဝွံ သွက်မွဲထပ်ဂှ် အကြာ ၁၅၀ ကိုဋ် ၂၀၀ အိုတ်မာန်တုဲ သှေ် ထပ်လ္တူပၠန်ဂှ်မ္ဂး အိုတ်သြန်အကြာ ကိုဋ် ၁၀၀ ပၠန်မ္ဂး တုဲဒှ်သီုၜါထပ်ရောၚ် ညးတာလျိုၚ်သိုၚ်ခၞံတံ တော် လဝ်ရ။
အဃောဖျေံဒၟံၚ်ရိုဟ်ကၞက်ဘာတန်ဒေါဝ် (နာဲမာန်)
ပြဟ်ဟ်ဏံဂှ် ညးတၠဒါန်ဝွံ ညးထံက်ပၚ်ကဵုလဝ်သွက်မွဲထပ်ကၠာတုဲ သှေ်မွဲထပ်ဂှ်တှေ် လက္ကရဴဒါယ ကာ မံက်တိုန်မ္ဂး ဆက်သိုၚ်အာပၠန်ရောၚ် ဂွံတီကေတ်ရ၊ ဂိတုမေ တတိယသတ္တဟတေံမ္ဂး မွဲထပ်ဂှ် ညံၚ်ဂွံ သိုၚ်ပ္တန်အာတုဲရောၚ်ဂှ်လေဝ် ညးတာလျိုၚ်တံဟီုဂးလဝ်ရ။
ညးတၠဒါန်သိုၚ်ပ္တန်ဘာဂှ် မိဝေန်ဝါဝါထောန် နူသေၚ်္ဂပေါဝ် ဒှ်ဒေံ နာဲမေန်လာတ် ဥက္ကဌ (စည်ပၚ်) ဍုၚ်ဇြပ် ဗုဂှ် ကဵုဒါန်ထံက်ပၚ်တုဲ နူကဵုကုမ္မဏဳ လွဳမန် ကေတ်တာလျိုၚ်သိုၚ်ပ္တန်ရ။
ပ္ဍဲကဵုတွဵုရဍုၚ်မန်၊ တွဵုရးကရေၚ် ကေုာံ ပ္ဍဲရးတၞၚ်သဳတံဂှ် ဘာကောန်ဂကူသီုဖ်အိုတ် နွံ (၁၃၆) ဘာ၊ ဘာပံၚ်နှဴ ဗ္တောန်လိက်မန် ပ္ဍဲကဵုဘာအလဵုအသဳ မၞုံသၟဝ်တဲဌာနပရေၚ်ပညာဂှ် (၉၅) ဘာနွံတုဲ လၟိဟ်အ္စာ၊ အ္စာၝောံဗ္တောန် ဒၟံၚ်လိက်ဂှ် နွံမံၚ်ဗ္ဒာဲ (၈၀၀) တၠရောၚ် ဂွံတီကေတ်ရ။
0 Comments