ပ္တဝ်ကဵု ဖျာဂၠးတိမ္ဂး ထ္ၜိုတ်ဍုၚ်ဗၟာ ဟိုတ်ၚုဟ် ဒးသဝ်စှေ်အာ နူၚုဟ်ဂၠးတိ ၜိုတ် ၂၀၀-၃၀၀ ဒကေဝ်ဂှ် ဒၟါနူ ဟွံစွံအဓိကကဵု အဆံၚ်ဍာ်ဒကေဝ်ထ္ၜိုတ်၊ဟိုတ်နူစွံအဓိကကဵု လၟိဟ်ထ္ၜိုတ် ညံၚ်ဂွံဂၠိုၚ်သၟးဂှ်ရ ၚုဟ်ထ္ၜိုတ်ဍုၚ်ဗၟာ ပ္တဝ်ကဵု ၚုဟ်ဂၠးတိဟွံဂွံရ သာ်ဝွံ ဥူသဵုကျဳ ဒုသ္ကိုပ်စၞောန်ပ္ညုၚ် ပရေၚ်သုတေသန တၞံဆု မအာအယုက်လအ်အ် ကေုာံ ဌာနပရေၚ်ဖေါအ်ဗြေဝ် နဲကဲပညာ ဟီုရ။
နူကၟိန်ဍုၚ် ထေက်ကဵု သ္ဒးထိၚ်ကဵုဍာ်ဒကေဝ် ကမၠောန်ထ္ၜိုတ်တုဲ ယဝ်ကုတ်စွံကဵုၚုဟ်မးမာန်မ္ဂး ထ္ၜိုတ်ဍာ်ဒကေဝ် ခိုဟ်ဟ်တံ တိတ်ကၠုၚ်မာန်ဏောၚ် ဂးရ။
“ထ္ၜိုတ်ညံၚ်ဂွံခိုဟ် ယဝ်ပိုဲပလေဝ်တှေ် စနူကၠအ်မကွာတ်တေံ စဵုကဵုစိုပ်အဆံၚ် မခဒဵုခအၚ်သကှ်ဂှ် ပရေၚ်အးၚး အဆံၚ်ၚ် ဒးနွံဏောၚ်၊ ကိစ္စဏံ တၠကၠအ်ထ္ၜိုတ်တံ ဟွံတီ ဟွံသေၚ်၊ ညးတံတီမံၚ်ကီုရ ဆ္ဂး ရံၚ်ကဵုအကာဲအရာ ဖျာထ္ၜိုတ်တ္ၚဲဏံတုဲ လီုတီမံၚ်ကီုလေဝ် ဒးဒိုအ်မံၚ်ရ။ ဣဂှ်ရ သွက်ဂွံက္လေၚ်ပဠေဝ်ပ္တိုန်ဂှ် သၞောဝ်တံ ဥပဒေတံ ဒးနွံဏောၚ်” ရဴဝွံ ဥူကျဳသဵု ဂးရ။
ထ္ၜိုတ်ကၠောန်ပ္တိတ်နၚ်တံ ဍာ်ဒကေဝ်ညံၚ်ဂွံခိုဟ်ဂှ် ဥပဒေနဲကဲ ဗီုသ္ဂောံကၠောန် ထ္ၜုတ်ပ္တိတ်တုဲ ယဝ်ကၠောန်ဗက်အတိုၚ် ဥပဒေဂှ်မ္ဂး ၚုဟ်ထ္ၜိုတ် ယာတိုန်မာန်ဏောၚ်၊ ရဲကၠောန်ပ္တိတ်ထ္ၜိုတ်တံ ညံၚ်ဂွံပ္တိတ်ထ္ၜိုတ်ခိုဟ်ဟ် ဍာ်ဒကေဝ်ခိုဟ်ဟ်မာန်ဂှ် ကဵုပညာ ပ္ညုၚ်ထ္ၜးကဵု နဲကဲခိုဟ်ဟ်မာန်မ္ဂး ပ္ဍဲအရာ ပခိုဟ်ပ္တိုန် ဍာ်ဒကေဝ်ထ္ၜိုတ်ဂှ် စိုပ်တရဴမာန်ဏောၚ် ဂးရ။
ဗီုဗက်မံၚ်ထ္ၜိုတ်(MNA)
“စၞးဒးချူပ္တိတ် ဥပဒေဂှ် ယဝ်ပံက်မတ် ကဵုပညာ ကုမၞိဟ်တံ ညံၚ်ဂွံကၠိုဟ်ခၠၚ်မ္ဂး ခိုဟ်ဂၠိုၚ်ရ။ မူဒှ်ရောဟီုတှေ် ညးတံ နွံကဵုအခေါၚ် သွံရာန်ဗၠးဗၠးၜးၜးဏောၚ်လေဝ်၊ ယဝ်ထိၚ်ထောံ နကဵုဥပဒေတှေ် လုပ်ဇီုဒး အခေါၚ်ဗၠးၜး ဒတုဲမြမောဝ် ညးတံဏောၚ်၊ ဒှ်သာ်ဂှ်ရ ခိုဟ်အိုတ်ဂှ် ဒှ်နဲကဲ မကဵုပညာ ကုညးတံဟေၚ်ရ” သာ်ဝွံ ဥူအံၚ်ကျဝ်သူ ညးစၞး ကၠတ်ထဝ်တွဵုရး ဒေသမာဲ လၟိဟ် (၂) ပွိုၚ်ဍုၚ်သဓီု ဂးရ။
ကၠာဟွံစိုပ် သၞာံ ၂၀၀၅ ဏီတေံ နကဵုကလောန်မျာန်မနေယှေန်နေဝ် အတိုၚ်ၚုဟ်ဂၠးတိရ ရာန်မံၚ်ထ္ၜိုတ် နူအလဵုအသဳရ။ နူဂှ်တုဲ ကလောန်ပုဂ္ဂလိကတံဟေၚ်ရ ကၠောန်ကၠုၚ်မံၚ် ပရေၚ်သွံရာန်ထ္ၜိုတ်ရ။
ပ္ဍဲတွဵုရးမန်ဂှ် ဗၞတ်တဵုလဝ်ထ္ၜိုတ် နွံလၟိဟ်ဨက နူပန်ကိုဋ်ဘာ် ဒဵုကဵုမသုန်ကိုဋ်ဨကတုဲ အခါလၟုဟ်မ္ဂး ၚုဟ်ထ္ၜိုတ် မံက်မံၚ် မွဲပံၚ်တှေ် ဂွံပွဳပွူ ၅၀၀ ဒကေဝ်ဟေၚ်တုဲ ဒှ်မံၚ်ၚုဟ်သဝ်ဝ်ရ။
0 Comments