ဒပ်ပၞာန်အလဵုအသဳ မၞုံအခိုက် ပကောံပကေဝ်လဝ် ကောန်ပၞာန်ကောန်ၚ္ၚာ်ဂှ် ပ္ဍဲဂိတုမာတ်ချ် (၁၂) တုဲကၠုၚ်ဏံ လၟိဟ်ကောန်ပၞာန်ကောန်ၚ္ၚာ် ၄၆ တလ သွက်ဂွံ က္လေၚ်ပအပ်ကဵု မိမ (ဟွံသေၚ်သာ်ဂှ်) ကုညးထိၚ်ဒဝ်မၚ်မွဲဂှ် ကၠောန်ဗဒှ်ဏာ အသေအဟာန် ပအပ်ပြာပ် မရနုက်ကဵု (၁၂) ဝါ ပ္ဍဲဗ္ဒိုပ်ဇူဒီု ဌာနစၟတ်သၟာန် လၟိဟ် (၁) ဍုၚ်လ္ဂုၚ် သာ်ဝွံ လလောၚ်ထ်ၜးကၠုၚ် ပ္ဍဲမဳဒဳယာ ရုပ်ရမျှာၚ်ကၟိန်ဍုၚ်ရ။

ပပ္တံနူ အလဵုအသဳဗၟာ တုပ်စိုတ်ထ္ပက်စၟတ်တဲ ကု Joint Action Plan (အစဳဇန် ပံၚ်ကောံရၚ်တၠုၚ်ကမၠောန် ကရောံကုလသမဂ္ဂ) တေံတုဲ ဒဵုလၟုဟ်ဏံမ္ဂး ကဵုအခေါၚ်နုက်တိတ်နူဒပ် ကုကောန်ပၞာန်ကောန်ၚ္ၚာ် ဗၞတ် (၇၄၅) တလတံတုဲရဂှ် ဂွံတီကေတ် နူလလောၚ်ပရိုၚ် ကုလသမဂ္ဂ မဆေၚ်ကဵု ဍုၚ်ဗၟာရ။

တုဲပၠန် အပ္ဍဲဒပ်လဵု ကောန်ပၞာန်ကောန်ၚ္ၚာ် နွံရောဂှ် အလိုက်ရးပၞာန် ညးကဵုညး ဗက်ဂၠိုက်ဂၠာဲစၟဳစၟတ် ချိုတ်တ်ပၠိုတ်တ်တုဲ သၞာံ ၂၀၁၆ ဒဵုကဵု ဂိတုဖေဖဝ်ဝါရဳအိုတ် ဆဵု သၞာဲဒါ ၇၃ တလ ကေုာံ ကောန်ပၞာန် ၃၀၉ တလ မပကောံပကေဝ်လဝ် ကောန်ပၞာန်ကောန်ၚ္ၚာ်တံဂှ်တုဲ ဗွဲမဗဗွဲကဵုသၞောဝ်ပၞာန်ဟေၚ် ရပ်စပ် ကေတ်အရေဝ်နွံရဂှ်လေဝ် ဂွံတီကေတ် နူမဳဒဳယာ ရုပ်ရမျှာၚ် အလဵုအသဳရ။

နူဒပ်ပၞာန်ဗၟာ ကဵုအခေါၚ်နုက်တိတ်ဗီုဏံဂှ် မေဿရဳဏာတာဠတ် ဒါန်သေဲလဳယာန် ဥက္ကဌ ဂကောံ CTFMR (ဂကောံ ပ္တိုန်ထ်ၜးမံၚ်လိက်ဒုၚ်စဳရေၚ် ပွမမၚ်ရံၚ် ပရေၚ်ဝးပကဝ် အခေါၚ်အရာကောန်ၚ္ၚာ်) ကေုာံ ညးစၞးဌာန်ဍုၚ်ဗၟာ ဗာထြာန်ဗိန်ဗဴလ် နူဂကောံယူနဳသိပ် တံ ဒဒှ်ရမိပ်စိုတ်ဒုၚ်တၠုၚ်ဂှ်ကီု၊ ပ္ဍဲအစဳဇန် သွက်ဂွံဖအိုတ်ကၠေံ အရာမပၠောပ်မံၚ်ကောန်ၚ္ၚာ်တံ အကြာပဋိပက္ခလွဟ် က္တဵုဒှ်မံၚ်ပ္ဍဲဍုၚ်ဗၟာဂှ်လေဝ် ဣဏံဂှ် ဒှ်ကၠုၚ် ပရေၚ်ဇၞော်မောဝ် မၞုံကဵုသဘဴပဠေဝ်မွဲပၠန် သာ်ဝွံ ဂးလဝ်ပ္ဍဲပရိုၚ်ဂှ်ရ။

အသေအဟာန် ပအပ်ပြာပ် ကောန်ပၞာန်ကောန်ၚ္ၚာ် ၄၆ တလ (MOl)

ပ္ဍဲသၞာံ ၂၀၀ရ တေံ ဒပ်ပၞာအလဵုအသဳဗၟာကီု သီုကဵုဂကောံ ရပ်လွဟ် (၇) ဂကောံ ဟွံသေၚ်ကဵု အလဵုအသဳဂှ်လေဝ် ရပ်စကာမံၚ်ကောန်ၚ္ၚာ် ပ္ဍဲပဋိပက္ခလွဟ်ရဂှ် သ္ပသမ္တီလဝ် ပ္ဍဲစရၚ် (ပွမစကာ ကေုာံ ပွမပကောံပကေဝ် ကောန်ၚ္ၚာ်ဂမၠိုၚ် အပ္ဍဲပဋိပက္ခလွဟ်) ညးအုပ်ကာ ကုလသမဂ္ဂရ။

ဂကောံရပ်လွဟ် (၇) ဂကောံ ဟွံသေၚ်ကဵုအလဵုအသဳမ္ဂးဂှ် ဒပ်ကောန်ဂကူကရေၚ် ဗုဒ္ဓဘာသာ (DKBA)၊ ဒပ်ပၞာန်ပရေၚ်ဗၠးၜးကချေၚ်(KIA)၊ ဒပ်ပၞာန်ပရေၚ်ဗၠးၜး ကောန်ဂကူကရေၚ် (KNLA)၊ ကံၚ်ဇြဳပရေၚ်ၜိုဟ်လလံ ကရေၚ် (KNLA-PC)၊ ဒပ်ပၞာန်ကရေၚ်ဍာဲ (KA)၊ ဒပ်ပၞာန်တွဵုရးသေံ-သမၠုၚ်ကျာ (SSA-S)၊ဒပ်ပၞာန်ညဳသၟဟ်ရးဝ (UWSA) တံရ။

ပွမကော်ပကောံမံၚ် ကောန်ၚ္ၚာ် သၟဝ် အယုက် (၁၈) သၞာံတုဲ စကာကဵုပ ကောန်ပၞာန်ဂှ် ညံၚ်ဂွံဒိုအ်အာကီု၊ ညံၚ်ဂွံထ္ပက်စၟတ်တဲ သွက်အစဳဇန်ကမၠောန်ကီု ရန်တၟံသာ်ဂှ်တုဲ ဂကောံ CTFMR ကဵု ဂကောံရပ်လွဟ် (၇) ဂကောံတံ စသဳကၠဳ ဟီုဂးမံၚ်ညးသ္ကအ်ဣရဂှ်လေဝ် ဂးလဝ် ပ္ဍဲပရိုၚ်ကုလသမဂ္ဂ လလောၚ်လဝ် ဆေၚ်ကဵုဍုၚ်ဗၟာဂှ်ကီုရ။

ပ္ဍဲဂကောံ CTFMR ဝွံ ဂကောံဂမၠိုၚ် နူကုလသမဂ္ဂ မပ္တံဂကောံ ILO, UNDP, UNFPA, UNHCR, UNICEF, UNOCHA, UN RC/HC Office, WFP ကီု၊ ဂကောံ World Vision ကဵု Save the Children တံကီု ပါလုပ်ရ။