စိုပ်တ္ၚဲသ္ၚိသဝ်ဏံမ္ဂး ကၠောန်ဂကာံဓရီု ဒ္စးဒုၚ် သွက်ကောံဓရီုဇၞော်
ကောန်ဂကူမန်ဏောၚ်ဒှ်တုဲ ဗော်ပရေၚ်ဍုၚ်ကွာန်မန်လဵုမွဲ တိုန်ကီုရောဂှ်
ဗော်လဵုလေဝ် ဟဂွံက္လေၚ်ပရိုၚ်ဏီဂှ်ရ သွက်ဂွံတိုန်ဂှ်
ဟွံချိုတ်ပၠိုတ်ဏီဖိုဟ် ဂွံတီကေတ်ရ။

“ စပ်ကဵုကိစ္စဏံ မုဂွိုအ်ဖန်ဏီ၊ အဃောသဘၚ်သဳကၠဳ ကၠောန်လဝ်အကၠာတေံဂှ်
ပိုဲပ္တိုန်လဝ်လိက်တုဲရ။ ပိုဲလေဝ် ဂွိုအ်ကော်ကောံဓရီုဏီ” သာ်ဝွံ ပ္ဍဲဂိတုမာတ်
၂၁ ဂှ် ဒံက်တာမာံနဲသဵု ညးအုပ်ကာနာနာ ဗော်ဒဳမဵုကရေဇြဳ အလုံရးမန် (AMDP)
ဟီုလဴကဵုဌာန်ပရိုၚ်ဗၠးၜးမန် ရ။

ဗော်ဒဳမဵုကရေဇြဳ အလုံရးမန် (AMDP) ဝွံ ပ္ဍဲကောံဓရီုဇၞော် ကောန်ဂကူမန် သၞာံ
၂၀၁၃ တုဲကၠုၚ်တေံဂှ် လညာတ် လစွံစိုတ်ညးတံ ဟိုတ်နူညးတံ ပ္တိုန်ထ္ၜးလဝ်
ကုကမ္မတဳ ကၠောန်ဗဒှ် တုဲမံၚ်ကီုဂှ်ရ သွက်ဂွံကဵု ဒဒိုဟ်ကဠၚ်
စပ်ကဵုကောံဓရီုဏံဂှ် မုလေဝ် ဟွံဟီုရ။

ယဝ်ဒှ်ကၠောန် သ္ဘၚ်သဳကၠဳကောန်ဂကူမန် (ကောန်ဗေန်ယှေန်)မ္ဂး နူဗော်လဵုဟွံဟီု
ညံၚ်ဂွံတိုန်စိုပ် နကဵုလၟိဟ်ညးစၞး ဗ္ၜတ်အစွံ (အချိုးကျ) ဗော်ညးကုညးဂှ်
နူဗော်ဒဳမဵုကရေဇြဳ အလုံရးမန် အာတ်မိက်လဝ် ကုကမ္မတဳ မက္တဵုဗဒှ်သ္ဘၚ်သဳကၠဳရ
ဂွံတီကေတ်။

ဗော်ညးဗြဴ(မန်) ဂှ်တုန် ပ္ဍဲကောံဓရီုဒ္စးဒုၚ်ဏံကီု ပ္ဍဲကောံဓရီုဇၞော်တေံကီု
ဗော်ပရေၚ်ဍုၚ်ကွာန်မန် သီု (၃) ဗော် တိုန်စိုပ်ကီုတှေ် ဗော်ညးတံလေဝ်
တိုန်သဳကၠဳကီုဏောၚ်ဂှ် ဟီုကၠုၚ်ကီုရ။

ကောံဓရီု မကၠောန်သ္ပလၟုဟ်ဏံဂှ် အဆံၚ်သ္ဘၚ်သဳကၠဳလေဝ်ဟွံသေၚ်၊ ဒှ်ဆၜိုတ်
ကောံဓရီုဒ္စးဒုၚ်၊ ဆၜိုတ် အဆံၚ်ကောံဓရီုဇၞော်ဓဝ်ဂှ်ရ၊ ကိစ္စ တိုန်ဟာ
ဟွံတိုန်ဟာဂှ် ဒဵုလၟုဟ် ဗော်ပရေၚ်ဍုၚ်ကွာန်မန်လဵုမွဲလေဝ် ဂဇအ်ကောံဓရီု
ဖျေံသ္ဂုတ်သွာတ် ဟွံမွဲဏီ ဂွံတီကေတ်ရ။

နာဲသဵုမျေအ် ဖက်ဆောညးအုပ်ကာ (၁) ဗော်ကောန်ဂကူမန်ဂှ် “ဗော်ပိုဲဂှ်
သ္ပလဝ်မိတ် ကုဗော်ဍုၚ်မန်တၟိရ၊ ပိုဲၜါဗော် သွက်ဂွံကၠောန်ကောံဓရီု
အဆံၚ်လ္တူနွံမံၚ်တုဲ သွဟ်ဍေံဂှ် တူရဴ သ္ဂုတ်သွာတ် ကောံဓရီုဂှ်ဟေၚ်ရ” သာ်ဝွံ
ဂးတဴရ။

ပ္ဍဲတၚ်သ္ဂုတ်သွာတ် ကောံဓရီုဇၞော်ကောန်ဂကူမန် မကၠောန်ကၠုၚ်လဝ်
ပ္ဍဲဍုၚ်မတ်မလီု သၞာံ၂၀၁၃ တေံဂှ် ကၠောန်သ္ဘၚ်သဳကၠဳ ကောန်ဂကူမ္ဂး
ဗော်ပရေၚ်ဍုၚ်ကွာန်မန်တံ ဒးက္ဍိုက်ပ်ကၠောန်ဗဒှ်ကဵုဏောၚ် ဂးလဝ်သာ်ဂှ်တုဲ
ကောံဓရီုဇၞော် အလန်ဏံဂှ် ဂကောံပံၚ်ကောံ ပရေၚ်ဂကူမန် Mon Affair Union-MAU
ဏောၚ် က္ဍိုက်ပ်မ္ဂး ဒှ်အာ အရာဗော်ပရေၚ်ဍုၚ်ကွာန်တံ
ဒးက္လေၚ်ပ္တိတ်ဂလာန်သၟာန်မွဲဏောၚ် ဂးရ။

“ ပိုဲတံ ကြပ်ဒးကော်မံၚ် ကောံဓရီုကမ္မတဳတိုၚ် (ကမ္မတဳက္ဍိုက်ပ်) ဣရ။
ဗော်ပရေၚ်ဍုၚ်ကွာန်တံ ဟွံတိုန်တှေ် ဗီုလဵုဖန်ရော ဂွံချပ်စညးသ္ကအ်” သာ်ဝွံ
နာဲဝဏ္ဏ ဒုက္ဍိုပ် ဂကောံကၠောန်ဗဒှ် ကောံဓရီုဒ္စးဒုၚ် သွက်ကောံဓရီုဇၞော်
ကောန်ဂကူမန် ဟီုရ။

ကောံဓရီုဒ္စး သွက်ကောန်ဓရီုဇၞော် ကောန်ဂကူမန်ဂှ် ပ္ဍဲဂိတုမာတ် (၂၆-၂၇)
ဏံမ္ဂး ကၠောန်သ္ပအာ ပွိုၚ်ၜါတ္ၚဲ ပ္ဍဲဘာဓာတုမာလာဏောၚ်ဒှ်တုဲ
ဇၟာပ်ဗော်ပရေၚ်ဍုၚ်ကွာန် ညံၚ်ဂွံချူပ္တိုန် လိက်ကၞပ် နကဵုယၟုက္ဍိုပ်လိက်
“ပရေၚ်ညဳသၟဟ်ဂကူမန်” ဂှ် စဳဇန်လဝ်သာ်ဂှ်ရ။ သွက်ဂွံ တိုန်စိုပ်သဳကၠဳ
ပ္ဍဲကောံဓရီုဏံဂှ်လေဝ် ဘိက်လဝ် ညးစၞး ၜိုတ် (၃၀၀) နူ သၚ်မန်ဂမၠိုၚ်၊
ဂကောံပရေၚ်မၞိဟ်ဂမၠိုၚ်၊ ညးစၞး နူဒေသ ဆေၚ်စပ်ဂမၠိုၚ် ကဵု ညးစၞး
ဗော်ပရေၚ်ဍုၚ်ကွာန်တံရ ဂွံတီကေတ်။