ပ္ဍဲဂိတုမာတ် (၈)၊ သၞာံ (၂၀၁၆)၊ အခိၚ်ဗ္တံၜိုတ် (၁၂) နာဍဳဂှ် နူကဵုကောန်ပၞာန် တမ်ဒပ်ခလရ (၂၈၀) ပွိုၚ်ဍုၚ်ဍာ်ဗု ပန်စုတ်ကဵုလွဟ် ဒးပ္ဍဲသြိုဟ်တုဲ ကောန်ကွာန်မၚ်ဂၠန် မၞုံပွိုၚ်ဍုၚ်ရေဝ်သၠုၚ်ကျာ (၂) တၠ မ္ဒးချိုတ်အာရောၚ် ဂွံတီ ကေတ်ရ။

မၞိဟ်ဒးဒုၚ်ပန်ဂစိုတ်တံဂှ်ဝွံ မၞုံယၟုနာဲမိုဝ် အာယုက် (၄၀) သၞာံကဵု နာဲချေတ်ဥူ အာယုက် (၂၃) သၞာံ မဒှ်သၟာကမၠောန်တမ္ၚာတုဲ သွက်ဂွံစှ်ၜေဳ တိတ်ကၠုၚ်နူသ္ၚိအခိၚ်ဗ္တံ ၜိုတ် (၁၂) နာဍဳ စိုပ်လ္ဒောဝ်ဂၠံၚ်ကွာန်ဂှ် ဒးဒုၚ်ပန် ကဵုလွဟ်ဂှ်ရောၚ်။

ညးဒေသပွိုၚ်ဍုၚ်သၠုၚ်ကျာ ညးဆဵုညာတ်မွဲလဝ်မွဲတၠ ဂှ် “မၞိဟ်တဏံဂှ်စှေ်အာသၞေဟ် သွက်ဂွံအာၜဳ။ ဟွံစိုပ်ဂၠုၚ်ဏီ ၜက်ဂွံနူသ္ၚိ ခြာမွဲသ္ၚိ၊ လ္ဒေါဝ်ဂၠံၚ်ပ္ဍဲကွာန်ဂှ်ရ ဒးဒုၚ်ပန်။ မၞိဟ်ၜါဂှ် ချိုတ်မံၚ် ခြာညးသ္ကအ် ဗၞတ် (၄) ဖိဟ် (၅) ဖိဟ်ရ။ ကောန်ပၞာန်ပန်ဂှ်လေဝ် က္ဆံၚ်သၠုၚ်သၠုၚ် ဗိုလ်ဇၞော်ဍေံ ပိဍောၚ်ရ” သာ်ဝွံဟီုရ။

တမ်ဒပ်ခလရ (၂၈၀) နူကဵုပွိုၚ်ဍုၚ်ဍာ်ဗု၊ ရးတၞၚ်သဳဂှ်ဝွံ အဃောကာလမထ္ပက်မံၚ်မုက်ပၞာန် စိုပ်ပ္ဍဲကွာန်မၚ်ဂၠန်၊ ပွိုၚ် ဍုၚ်ရေဝ်သၠုၚ်ကျာဂှ် ဗၠေတ်မှာတုဲပန်ဒးအာကောန်ကွာန်ၜါတၠ ဒးဝပ်တုဲချိုတ်အာရောၚ် နူကဵုဌာနအုပ်ဓုပ်ပွိုၚ်ဍုၚ် ရေဝ် ချူဓမံက်လဝ် ပ္ဍဲလိက်စၟတ်သမ္တီရ။

ပ္ဍဲကဵုကွာန်မၚ်ဂၠန်ဂှ်ဝွံ ဂကောံရပ်လွဟ် (က္ဍိုပ်ဒမၠ) တံ ဗက်မံၚ်သြန်အဓမ္မနွံကီုလေဝ် ပ္ဍဲပွိုၚ်အကြာဂိတုဏံ ကိစ္စဗက်သြန်ဟွံမွဲ သ္ၚိတ်ဇြမံၚ်ဂှ်ရ စိုပ်ကဵုကိစ္စပရေၚ်ကၟာတ်ဂြိုပ် နူကဵုဒပ်ပၞာန် ကေုာံ ညးအုပ်ဓုပ်ကွာန်တံ ဂွံကဵုလဝ်အမိၚ်၊ ကဵုလဝ်သမ္တီ အာဗ္တံဂၠု၊ အာကၠအ်ဟွံဂွံဂှ် ဟွံမွဲရောၚ် ညးဆက်ဟီုရ။

စၞောန်ပညုၚ်ဒၞဲါကောန်ကွာန်ၜါတၠ ဒးဒုၚ်ပန် ပ္ဍဲကွာန်မၚ်ဂၠန်

“နူဗ္တံဏံ ဗၞတ်ၜိုတ်ဒ္စာံနာဍဳပြၚ်ၚ်ဂှ် ဇွညးၜါဂှ် စိုပ်ကၠုၚ်ရုၚ်ဂဥုဲဍုၚ်ရေဝ်ဏံ။ ဗီုလဵုဒးလဝ်ဂှ် ပိုဲလေဝ်ဟွံဒှ်အာကျောဝ် ပုဟ်။ တ္ၚဲဏံလဒေါဝ်တ္ၚဲတှေ် စံၚ်ဏောၚ် မိၚ်မံၚ်ဟဂှ်လေဝ်” သာ်ဝွံ ဂိတုမာတ် (၁၀) ဂှ် ညးဒေသ မၞုံလ္တူဍုၚ်ရေဝ်မွဲ တၠ ဟီုကဵုဌာန်ပရိုၚ်မန်ရ။

စိုပ်ကဵုညးဒးဒုၚ်ပန်ဂစိုတ်ၜါတၠဂှ်တုဲ မွဲတၠမ္ဂး နူကဵုဌာနအုပ်ဓုပ်ပွိုၚ်ဍုၚ်ရေဝ် (၅၀၀၀၀) ဒ္ကေဝ်ကဵု ဌာနအုပ်ဓုပ် ဍုၚ် ခေါဇာ (၃၀၀၀၀) ဒ္ကေဝ်ထံက်ပၚ်ဏာ ကုဂကောံသ္ၚိကၟိန်မသှေ်သၟေဟ်တဴမံၚ်တံဂှ်ရောၚ် ဂွံတီကေတ်ရ။

ဒေသပွိုၚ်ဍုၚ်ရေဝ်သၠုၚ်ကျာဂှ်ဝွံ တမ်ဒပ်ခလရ (၃၁) တံ ၜိုန်ရဖျေံလဝ်သ္ဇိုၚ် ပ္ဍဲဍုၚ်ခေါဇာ ကီုလေဝ် ကိစ္စဂကောံ ရပ်လွဟ်ယၟုဟွံပြာကတ် (က္ဍိုပ်ဒမၠ) တံ လုပ်ကေတ်ပ္ဍဲကွာန်ကီု၊ ကဵုကေတ်လိက်ကီုတုဲ ကၠောန်သ္ပဒၟံၚ် ပရေၚ် အာတ်မိက် ဗက်သြန်အဓမ္မအဆက်က်နွံရ။