ကောံဓရီုဇၞော်ပရေၚ်ဂကူမန် မရနုက်ကဵု(၈)ဝါ ရန်လဝ်သွက်ဂွံကၠောန်အာ ပ္ဍဲကဵုဂိတုမေဏံဂှ် ဂစာန်တုဲ ဆက်ရေၚ်တၠုၚ်အာရောၚ် ပ္ဍဲကဵုပေဲါဆဵုဂဗညးစၞးဗော်ဍုၚ်မန်တၟိ ကဵု ဂကောံပံၚ်ကောံပရေၚ်ဂကူမန် MAU ဂှ်ထပ်ဖျေံဏာရ။
ဂိတုအေဗရဴ ရ ဂှ် ညးစၞးဗော်ဍုၚ်မန်တၟိ ညးအုပ်ကာနာနာ နာဲအံၚ်မေန် ဆဵုဂဗသောၚ်ကလး ပ္ဍဲကဵုရုၚ်ဆက်ဆောံဝၚ်ကတုဲ စပ်ကဵု လ္တူဗီုပြၚ် ဒက်ပ္တန်ဂကောံပံၚ်ကောံဋ္ဌာန်ဂတဂှ် ညးစၞးဂကောံမဟာ ဇန်သွာၚ်နာနာတံ သာ်လဵုပါလုပ်မာန်ဂှ်တုဲ သဳကၠဳသၠာဲဂတးလညာတ်ၜါလ္ပာ်ဂှ် နူကဵုဂကောံပံၚ်ကောံပရေၚ် ဂကူမန်တံ ကဵုသ္ဂုတ်သွာတ်ဟွံမာန်တုဲ သဳကၠဳပလံၚ်ပညုၚ်ဏာ ပ္ဍဲကဵုကောံဓရီုဇၞော်ပရေၚ်ဂကူ မန်တေံ ရောၚ် ဂွံတီကေတ်နူ သဘာပတိ MAU မွဲတၠရ။
ကောံဓရီုကမ္မတဳတိုၚ် MAU ကဵု ဗော်ဍုၚ်မန်တၟိ (MNA)
‘ညးတံအာတ်မိက်ဂှ်တှေ် အခန်ကဏ္ဍပရေၚ်ဍုၚ်ကွာန်ဂှ် ဂကောံမဟာဇန်တံ ပိဂအုံ မွဲဂအုံ ဒးပါလုပ် ပ္ဍဲ ကဵုဂကောံပၠတရဴဂကူဂှ်ဟီုဟီု၊ ပ္ဍဲဂကောံပံၚ်ကောံပရေၚ်ဂကူဂှ်လေဝ် ဣဏံဂှ် နကဵု MAU ပိုဲကဵုသ္ဂုတ် သွာတ်ဟွံဂွံ၊ ဒးသဳကၠဳကေတ်ဆန္ဒညးဂလိုၚ်ပ္ဍဲကောံဓရီုဇၞော်ဏောဝ် ဗော်ဍုၚ်မန်တၟိလေဝ် ညးတံကလေၚ် ပ္တိုန်ထ်ၜးကဵုကမ္မတဳဗဟဵုညးတံတုဲတှေ် ကောံဓရီုဇၞော်ဂှ်တှေ် ပ္ဍဲဂိတုမေဏံ ညံၚ်ဂွံဒှ်ဂှ် ဆက်ဂစာန်အာရောၚ် တုပ်လဝ်စိုတ်ဗီုဂှ်’ သာ်ဏံ နာဲဗညာဂ္ဇံ သဘာပတိ MAU ဗွိုၚ်အပ္ဍဲဍုၚ် ဟီုထ်ၜးရ။
ကောံဓရီုဇၞော်ပရေၚ်ဂကူမန် မရနုက်ကဵု(၈)ဝါဂှ် ဂိတုမေပထမသတ္တဟတေံမ္ဂး သွက်ဂွံကၠောန်အာ ပ္ဍဲကဵု ကွာန်ပလိုၚ်ဂျပါန်ရောၚ် ကမ္မတဳတိုၚ်ကၠောန်ဗဒှ်တံ ဖျေံလဝ်တုဲ ကြဴနူဗော်ပရေၚ်ဍုၚ်ကွာန်အပ္ဍဲဍုၚ် တံကဵုကၠုၚ်ဇြဟတ်ဓရိုဟ်ဂှ် ကမၠောန်ကမ္မတဳတိုၚ်တံရေၚ်တၠုၚ်မံၚ်ဂှ် ပြဟ်ဟ်ဏံ ညံၚ်ဂွံဒေံါဇူလဝ်ကၠာတုဲ ဗော်ဍုၚ်မန်တၟိဆဵုဂဗသောၚ်ကလး ကဵု MAU တံဒှ်ကၠုၚ်ရ။
‘ကောံဓရီုဇၞော်ပရေၚ်ဂကူမန်ဂှ် နူကဵုသဘၚ်သဳကၠဳဗော်ရ ဖျေံလဝ်ဏောၚ်၊ ၝဟွံကၠးဂှ်တှေ် ကလးညးကံ ဏောဝ်၊ ကလးတုဲတှေ် ဆက်ကၠောန်အာဏောၚ်၊ အရၚ်ဂွံပလီုထောံဟွံသေၚ်ပုဟ်၊ ဂိတုမေဏံပထမ သတ္တဟဟွံဒှ်တှေ် ဒုတိယသတ္တ လဇုဲအိုတ်တှေ် တတိယသတ္တဟ ညံၚ်ဂွံဒှ်ဂှ်တှေ် ဒးဆက်ကၠောန်အာ ဏောၚ်၊ ၝညးပါ ဟွံပါဂှ်တှေ် စွံလဝ်ရ’ သာ်ဏံ ဒုဥက္ကဌ ဗော်ဍုၚ်မန်တၟိ နာဲဟံသာ ဟီုထ်ၜးရ။
လၟေၚ်ကမၠောန်ကောံဓရီုဇၞော်ပရေၚ်ဂကူမန် ကမ္မတဳတိုၚ်ကၠောန်ဗဒှ်တံရေၚ်တၠုၚ်ကၠောန်ၜိုတ်ဒၟံၚ်တ္ၚဲဏံဂှ် ၜိုန်ရဟီုမံၚ်သွက်ဂွံဒက်ပ္တန်ပရေၚ်ညဳသၟဟ်အလုံဂကူမန်ကီုလေဝ် ဗော်ပရေၚ်ဍုၚ်ကွာန်တံဟွံစှေ်စိုတ်လ္တူ ပရေၚ်ကမၠောန် MAU တံတုဲ ကောံဓရီုဇၞော်ပရေၚ်ဂကူမန် မရနုက်ကဵု(၈)ဝါဂှ် ဗော်ပရေၚ်ဍုၚ်ကွာန်တံ ဟွံတိုန်ရောၚ်ဂှ် ဟီုလလောၚ်ပ္တိတ်လဝ်တုဲတုဲရ။
‘လ္တူဗော်ပရေၚ်ဍုၚ်ကွာန်တံဂှ်တှေ် ပိုဲအာချပ်စသဳကၠဳဏောၚ်၊ ဘိက်လေဝ်ပိုဲဘိက်ဏောၚ်၊ ၜိုန်ရညးတံဟွံ တိုန်စိုပ်လဝ်ကောံဓရီုဒစးဒုၚ်တေံလေဝ် ညးစၞးအရၚ်ညးတံဂှ်ပိုဲရန်ပဲါစွံလဝ်နွံမံၚ်ရ၊ ပိုဲအာဘိက်ဏောဝ် ညးတံတိုန် ဟွံတိုန်ဂှ်တှေ် တာလျိုၚ်ညးတံရ၊ ကောံဓရီုဇၞော်ပရေၚ်ဂကူမန်ဏံ ကၠောန်ဂှ်ဒးကၠောန်တွဵု ဏောၚ်’ သာ်ဏံ သဘာပတိ နာဲဗညာဂ္ဇံထပ်ဟီုထ်ၜးရ။
ပေဲါဆဵုဂဗ ဗော်ဍုၚ်မန်တၟိကဵု MAU တုဲဂှ် ဆက်သ္ပအာကောံဓရီုပၠန်တုဲ ညးစၞးဗွိုၚ်အပ္ဍဲဍုၚ်တံအာတ်မိက် ပ္တိုန်ထ်ၜးလဝ် ထပ်ဗပဵုကဵုညးစၞး သွက်ဂွံတုန်ကောံဓရီုဇၞော်တေံလၟိဟ်ဒဵု(၅၀)တၠဂှ် နူကဵုကောံဓရီုဂှ်တုပ်စိုတ် ဒုၚ်တဲရောၚ်ဂှ်လေဝ် ဂွံတီကေတ်နူကဵု ညးတာလျိုၚ် MAU ရ။
