နူကဵုဂိတုဖေဖဝ်ဝါရဳမံက်တေံ ဥက္ကဋ္ဌ ဗော်ဒဳမဵုကရေဇြဳအလုံရးမန် နာဲသိုက် စုတိအာတုဲကီုလေဝ် စဵုကဵုလၟုဟ် ကဆံၚ် ဥက္ကဋ္ဌဗော်ဂှ် ဟွံဂွံရုဲစှ်သ္ပဒတန်ဏီရောၚ် ညးတာလျိုၚ်ဗော်တံဟီုရ။

“ရုဲစှ်ဥက္ကဋ္ဌဂှ် အတိုၚ်စေဝ်ပၞောန်ဗော်ပိုဲ ပ္ဍဲကဵုကောံဓရီုကမ္မတဳဗဟဵု ဟွံသေၚ်တှေ် ပ္ဍဲကောံဓရီုကၠောံသၞာံ ရုဲစှ်စုတ်ရ။ လၟုဟ်ဂှ် မုပိုဲဟွံသ္ပဏီပုဟ်။ အတိုၚ်မူဗော်ရ ဥက္ကဋ္ဌပြဟ်လလုဲအာတှေ် ဒု-ဥက္ကဋ္ဌ (၁)၊ (၂) ဂှ် လၟေၚ်ၚ်ဂှ် သွက်ဂွံ ကေတ်အာတာလျိုၚ်ရ” သာ်ဝွံ ညးအုပ်ကာနာနာ ဒံက်တာမာံနဲသဵု ဟီုရ။

ပြဟ်ဟ်ဏံ နကဵုတာလျိုၚ်ယာယဳဟေၚ် ဒု-ဥက္ကဋ္ဌတံ က္ဍိုက်မံၚ်က္ဍိုပ်တုဲ ပ္ဍဲကဵုကောံဓရီုကမ္မတဳဗဟဵု ဟွံသေၚ်မ္ဂး ပ္ဍဲကဵုကောံဓရီုဇၞော်ကၠောံသၞာံတေံဟေၚ် ရုဲစှ်သ္ပဒတန်အာညးတာလျိုၚ်ဥက္ကဋ္ဌဂှ်ရောၚ်။

ကောံဓရီုဇၞော်ကၠောံသၞာံ ဗော်ဒေသ အလန်ပထမ သၞာံ (၂၀၁၄) (GS)

“လၟေၚ်ကမၠောန်ဂှ်တှေ် ဒု-ဥက္ကဋ္ဌတံဂှ် က္ဍိုက်ပ်လၟေၚ်ကမၠောန်ဏောၚ်။ ကာလရုဲတေံတှေ် ရုဲကဵုမာဲရဏောၚ်။ ဒု-ဥက္ကဋ္ဌ (၁) ဂှ်ရ ဒှ်အာဥက္ကဋ္ဌလောဲလောဲ ဟွံသေၚ်ပုဟ်။ ပရေၚ်ကမၠောန်ဆေၚ်ကဵုဥက္ကဋ္ဌ ညးဂှ်တိုန်ဂှ် အရၚ်ပိုဲအဓိက ဟွံသေၚ်ပုဟ်။ ဂကောံကေၚ်ကာဗဟဵုကဵု ကေၚ်ကာ သ္ဇိုၚ်ဒေသတံ ပံၚ်တုဲတှေ် ဂွံစှေ်ဒေသ (နယ်) ဂှ်ဏောၚ် ဒှ်အဓိကရ။ ပိုဲဒးဂစာန်ပလေဝ်ဗော်ကၠာဏောၚ်” သာ်ဝွံ ဒု-ဥက္ကဋ္ဌ လၟိဟ် (၂) နာဲဆာန်တိဟီုရ။

အကြာဏံဝွံ သွက်ဂွံပခိုၚ်ဗော်ဂှ် ဒၞာဲကမ္မတဳဗဟဵုယုတ်ဒေက်မံၚ်တံဂှ် ထပ်ဗပေၚ်စုတ်ကမ္မတဳဗဟဵု ညးစၞးနူဒေသပွိုၚ် ဍုၚ်နာနာတံတုဲ ပ္ဍဲကဵုဂိတုမေကြပ်အိုတ်ဏံ ကၠောန်ဗဒှ်ကောံဓရီုဇၞော်ကၠောံသၞာံဂှ် ဒှ်မာန်ရောၚ် ညးတာလျိုၚ်ဗော်ဂှ် ဆက်ဟီုရ။

ဗော်ဒဳမဵုကရေဇြဳအလုံရးမန်လၟုဟ်ဝွံ ဒု-ဥက္ကဋ္ဌ (၁) နာဲလှအံၚ်၊ ဒု-ဥက္ကဋ္ဌ (၂) နာဲဆာန်တိ၊ ညးအုပ်ကာနာနာ ဒံက် တာမာံနဲသဵု၊ ဖက်ဆော (၁) နာဲသာန်တေန်၊ ဖက်ဆော (၂) နာဲတာန်ယှိုဲတံကီု ကေၚ်ကာဗဟဵု (၂၁) တၠ ကေုာံ ကမ္မတဳဗဟဵု (၅၇) တၠတံ ပၠမံၚ်တရဴဗော်ရောၚ်။

နူကဵုဂိတုဖေဖဝ်ဝါရဳ (၆) ဂှ် ညးမဒှ်ဥက္ကဋ္ဌ နာဲသိုက် စုတိကလိလောန်စဴအာကီုလေဝ် ဂွံရုဲစှ်ခါန်ကၞက်ပ္တိုန်ဥက္ကဋ္ဌတၟိဂှ် ဂွံရုဲစှ်ခါန်ကၞက်ကဆံၚ်ဥက္ကဋ္ဌဂွံဂှ် ကောံဓရီုကဆံၚ်ကမ္မတဳဗဟဵုဂှ် အကြာဏံ ဟွံဂွံကၠောန်လဝ်ဏီရောၚ်။

ပ္ဍဲသၞာံ (၂၀၁၀) ဂိတုမေဂှ် ကာလစဒက်ပ္တန်ဗော်ဒဳကဵုကရေဇြဳအလုံရးမန်ဂှ် နာဲၚ္ၚိုဲတုၚ် (အ္စာဇၞူမန်) ဂှ် ယိုက်ဂၠေၚ် ကၠုၚ်လဝ် တာလျိုၚ်ဥက္ကဋ္ဌဗော်ရ။ ပ္ဍဲသၞာံ (၂၀၁၃) ဂှ် အ္စာဇၞူမန် ပြံၚ်အာဒက်ပ္တန်ဗော်ကောန်ဂကူမန်တုဲ ပ္ဍဲကဵုကောံ ဓရီုဇၞော်ကၠောံသၞာံအလန်ပထမ သၞာံ (၂၀၁၄) ဂိတုမေဂှ် ရုဲစှ်ခါန်ကၞက်ပ္တိုန် နာဲသိုက် နဒဒှ်ဥက္ကဋ္ဌရောၚ်။