ဂိတုအေဗရဴ ၄ အခိၚ်ဒေါဝ်တ္ၚဲနူတနေံတေံဂှ် ပ္ဍဲကဵုကွာန်ဝၚ်ရာဲ အရာပ်ဝါဗိုၚ် ပွိုၚ်ဍုၚ်ဇြပ်ဗု ဒှ်ပဋိပက္ခ ပရေၚ်ဗါ်ဂစိုတ်ဂယိုၚ်တုဲ မၞိဟ်ချိုတ် (၆) တၠ၊ ဒးအာဝပ် (၆) တၠရောၚ် ဂွံတီကေတ်နူကဵုသ္ကိုပ်အုပ်ဓုပ်ကွာန် ဝၚ်ရာဲဂှ် ဟီုရ။
ပ္ဍဲကဵုညးချိုတ်အာ (၆) တၠတံဂှ် ညးက္ဍိုပ်ပၞာန်မၚ်ကၚ်ကွာန်မွဲတၠကဵု ကောန်ကွာန်မၞိဟ်တြုံ (၃)၊ မၞိဟ်ဗြဴ (၁) တၠ သီုကဵုညးဗါ် နာဲအယုၚ် မၞုံအာယုက် (၄၁) သၞာံပါလုပ်တုဲ ညးဒးဝပ် (၆) တၠတံဂှ် ဒးဒမြိပ်ပ္တိုန်ရုၚ် ဂဥုဲဍုၚ်မတ်မလီု (၄) တၠ မၞိဟ်ဗြဴ (၂) တၠ၊ တြုံ (၂) တၠကဵု ရုၚ်ဂဥုဲဍုၚ်ဇြပ်ဗု (၂) တၠ တြုံ (၁) တၠ၊ ဗြဴ (၁) တၠရောၚ် ဂွံတီကေတ်ရ။
သ္ကိုပ်အုပ်ဓုပ်ကွာန်ဝၚ်ရာဲ နာဲတိတ်နံၚ်ဂှ် “မၞိဟ်ဗါ်ဏံဂှ် ဒဵုကဵုကြအ်မံၚ်ကွေံကွေံဟွံသေၚ်ပုဟ်၊ လအ်လအ်မှ စိုတ်ဍေံဖံက်ကၠုၚ်မွဲမွဲတဲတှေ် ဒှ်ညာန်မံၚ်ကဵုဟယိုၚ်ဍေံကဵု ၝဲဍေံလေပ်ရ၊ ချိုတ်အာလၟုဟ်ဂှ်လေဝ် ၝဲဍေံကဵု အမူဍေံလေဝ် ပါမံၚ်” သာ်ဝွံ ဟီုထ္ၜးရ။
မၞိဟ်ဒးဒုၚ်ဗါ်ချိုတ်အာ(၅)တၠဂှ်ဝွံ နာဲအံၚ်ထောန် အာယုက်ဗၞတ်(၄၀)သၞာံ၊ နာဲအလောန် အာယုက်ဗၞတ် (၄၀) သၞာံ၊ ညးက္ဍိုပ်ပၞာန်မၚ်ကၚ်ကွာန် နာဲသုၚ်ခါၚ် အာယုက်ဗၞတ်(၆၀)သၞာံပြၚ်ကဵုသမ္ဘာညး မိတာန်သု အာယုက် ဗၞတ် (၆၀) သၞာံ၊ နာဲထောန်ယျဳ အာယုက်ဗၞတ် (၈၀) သၞာံ မွဲတုဲမွဲ နာဲအယုၚ်ဂှ် စိုတ်တမြအ် က္တဵုတုဲ ဗါ်ဂစိုတ်ထောံညးတံရ။
ညးဆဵုနမတ်မွဲတၠ နာဲအထဝ်ဂှ် “ဗီုဒှ်ကၠာအိုတ်ဂှ်တှေ် စဒှ်ပ္ဍဲသ္ၚိဍေံ (အယုၚ်) ကၠာအိုတ်ရ၊ ဍေံစံၚ်ထောံ သ္ၚိဍေံကၠာ ဍေံစံၚ်သ္ၚိဍေံတုဲမှ ဍေံတိတ်ကၠုၚ်ဂှ် ဍေံရေက်ထောံကအ် နာဲလောန်ဂှ် ချိုတ်ကၠာအိုတ်ရ၊ ဍေံစံၚ်မံၚ်သ္ၚိ အပ္ဍဲအရာပ်ဂှ် မ္ၚးတေံမွဲဟွံတီပုဟ်၊ ဖအိုတ်သ္ၚိတူအာ (၄) မ၊ သ္ၚိအဃောတူမံၚ်ဂှ် ဍေံဗက် ရေက် ဗါ်မွဲတုဲမွဲ ချိုတ်အာဗီုဂှ်’ သာ်ဏံ ဟီုထ္ၜးရ။
အဃောနာဲအယုၚ် စံၚ်မံၚ်သ္ၚိ ဗက်ဗါ်မံၚ်မၞိဟ်ဂှ် ပၞာန်မၚ်ကၚ်ကွာန် နာဲအယှေ ပန်မာ်လွဟ်ဂှ် ဟွံတိတ်တုဲ နာဲအယုၚ်ဂှ် ပၠံၚ်ဂွံလွဟ် အေကေ ပ္ဍဲတဲ (ပြည်သူ႕စစ်) နာဲယှေဂှ်ရ၊ နာဲယှေဂွံဏာလွဟ်ပ္ဍဲဖျေဲဂှ် မကံ နွံမံၚ်(၁၉)မရ၊ ဒှ်ပန်မံၚ်ညးသ္ကံ ကဵုပၞာန်မၚ်ကၚ်ကွာန်တံ မွဲလစုတ်ဏီရ၊ ချိုန်ခဏ လအ်ဂွံၜိုတ်ဗၞတ် ဘာ် နဍဳဂှ် သီုပၞာန်နူဒပ်ဝါကလေဝ်၊ သီုဗၠာဲသၟိၚ်နူဍုၚ်ဇြပ်ဗု၊ သီုပၞာန်မၚ်ကၚ်ကွာန်တံ ကောံကၠုၚ်တုဲ ဗိုၚ်ပန် ဂ စိုတ်ဂွံ နာဲအယုၚ်ဂှ်ရောၚ် ညးဆဵုနမတ်တံ ဟီုလဴအိုတ်ရ။
“ဍေံဂွံဏာသေနာတ် အယှေဂှ်တုဲဂှ် ပန်မံၚ်ညးသ္ကံတှေ် ပန်ဒးဍေံပ္ဍဲဒဳဍေံ၊ ဍေံအာဟွံဂွိုအ်မံၚ်ရ၊ ဍေံအောပ် မံၚ်ပ္ဍဲဂအုံထိုၚ်သတ်ဗြဴမွဲဒၞာဲဂှ် နာဲဏာ ပန်စုတ်မွဲတဲပၠန်ဂှ် ဒးအာဂၞိၚ်၊ တုဲဂှ် အစာဘာပၞာန် နူဒပ်ဝါကလေဝ် ဂှ် ပန်ကဵုကာဗိုၚ် ဒးအာက္ဍိုပ် ဠဂှ်ဂွံချိုတ်အာ” သာ်ဝွံ ညးဆဵုနမတ်မွဲတၠ ဟီုပၠန်ရ။
ညးဗါ်ဂစိုတ်မၞိဟ် နာဲအယုၚ်ဂှ် ယဲဝေဒနာစိုတ်တမြအ် ကေၚ်နွံမံၚ်တုဲ စဴကၠုၚ်လဝ်နူကဵုဍုၚ်သေံၜိုတ်(၄) ဂိတုရရောၚ် ရဲကွာန်တံဂးရ၊ ဟိုတ်ဂှ်က္တဵုဒှ်ပဋိပက္ခဂစိုတ်ဂယျိုၚ်ဇၞော်ဇၞော်သာ်ဏံဂှ် နကဵုယဲစိုတ်တမြအ် ဓမ္မတာဟွံသေၚ်တုဲ စိုတ်ကြအ်ကြာန်အသိၚ်ဂဥုဲၜူမာဲလေဝ် ပါမံၚ်ရောၚ်ဂှ် ညးလ္ၚဵု ဟီုအခါတ်အကာဲ ဒှ် မံၚ်သံသယနွံရောၚ် ဂွံတီကေတ်ရ။
0 Comments