ပ္ဍဲကောံဓရီု လၟေၚ်ပက္ကတိအလန်ပထမ တ္ၚဲပဥ္စမ ကၠတ်ထဝ်တွဵုရးမန် အလန်ဒုတိယ ကၠောန်သ္ပပ္ဍဲ စၟတ်တ္ၚဲ အေဗရဴ (၄) ဂှ်ဝွံ ဒဝ်တေန်န်အိ ဥက္ကဌကၠတ်ထဝ်တွဵုရးမန် ဗှ်ထ္ၜးဏာ စရၚ်ယၟု ဌာနဝန်ဇၞော် ကေုာံ ယၟုဝန်ဇၞော်ဂမၠိုၚ်တုဲ သ္ပဏာဒ္တန် ပ္ဍဲကောံဓရီုကၠတ်ထဝ် တွဵုရးမန်ဂှ်ရ။

အပ္ဍဲဂှ်ဝွံ ဥူမေန်န်ဥူ ဂအုပ်ဝန်ဇၞော်ဂှ် (ဌာနဝန်ဇၞော် ပရေၚ်ဗဂဵုလဟဵုကဵု ပရေၚ်သိုၚ်ခၞံ)၊ ဒံက်တာထိၚ်လေန်ဂှ် (ဌာနဝန်ဇၞော်ပရေၚ်မၞိဟ်)၊ မာံထေန်အံၚ်ဟာန်ဂှ် (ဌာနဝန်ဇၞော် ဓါတ်လလဳ၊ အစောံဒြဟတ် သီုကဵုကွတ်စက်)၊ ဥူဝဏ္ဏကျဝ်ဂှ် (ဌာနဝန်ဇၞော် ကိုန်အစဳဇန် သီုကဵုပရေၚ်ဘဏ္ဍာ ကေုာံ ပရေၚ်မၞိဟ်လုပ်တိတ်)၊ ဥူထောန်ဌေဂှ် (ဌာနတဵုလွဳ၊ သီုပရေၚ်လွဳဖ္ဍတ် ကေုာံ ပရေၚ်ဆက်စၠောံ ပလံၚ်ဗ္စိုပ်)၊ ဒံက်တာမာံကျဳဝေန်ဂှ် (ဌာနဝန်ဇၞော် ပရေၚ်သယံဇာတကဵု ပရေၚ်ထိၚ်ဒဝ်မၚ်မွဲ သဘာဝပွဳပွူ)၊ သ္ကိုပ်ဗိုလ်ဇၞော် ဝေန်နာၚ်ဥူဂှ် (ဌာနဝန်ဇၞော် ပရေၚ်ဂီုကၠီု ကဵု ပရေၚ်ကေၚ်ကာဒေသပယဵု) ရဴဝွံ နူဥက္ကဌကၠတ်ထဝ် တွဵုရးမန် ခါန်ကဵုဏာတလျိုၚ် သေဲသေဲအိုတ်ရ။

ဒံက်တာမာံကျဳဝေန် ဝန်ဇၞော် ပရေၚ်ထိၚ်ဒဝ် သယံဇာတ ကေုာံ သဘာဝ ပွဳပွူဂှ် “ ပြဟ်ဟ်ဏံ ချပ်လဝ် တၟေၚ်ၚ်တၟဟ်ဟ်ဂှ် မုဟွံမွဲဏီ၊ ကိစ္စဇၞော်အိုတ် ပ္ဍဲဒေသပိုဲဂှ် ကိစ္စရုၚ်စက် ချးတၟံတံရ၊ ဒးရပ်စပ်ကၠာအိုတ်ဂှ် ပရေၚ်ဏံရဏောၚ်” ညးဟီုရ။

ဆေၚ်ကဵု ကေၚ်ကာကောန်ဍုၚ်အရၚ်ပၠန်လေဝ် သဝ်အံၚ်မျေအ်ခါၚ်ဂှ် ဝန်ဇၞော် ပရေၚ်ကေၚ်ကာ ကောန်ဂကူကရေၚ်၊ ဥူယှိုဲမျေအ်ဂှ် ဝန်ဇၞော် ပရေၚ်ကေၚ်ကာ ကောန်ဂကူဗၟာ၊ ဒဝ်သာန်ဝေအ်ခါၚ်ဂှ် ဝန်ဇၞော် ပရေၚ်ကေၚ်ကာ ကောန်ဂကူပအိုအ် သာ်ဝွံခါန်ကၞက်လဝ်တုဲ သွက်ဇမၞော်ဥပဒေတွဵုရးဂှ် ကုဒဝ်အေအေမိုအ်လေဝ်ကီု၊ ဇမၞော် စၟဳစၟတ်စရၚ် တွဵုရးဂှ် ကုဒဝ်တိၚ်ၚ်ဥူကီု ခါန်ကၞက်သ္ပဏာ ဒ္တန် ပ္ဍဲကၠတ်ထဝ်ဂှ်ကီုရ။

ဒံက်တာ နာဲအံၚ်နာၚ်ဥူ ညးစၞးကၠတ်ထဝ် တွဵုရးဂှ်တုန် “သ္ကိုပ်ဝန်ဇၞော် ပ္တိုန်စရၚ် ယၟုဝန်ဇၞော် တွဵုရး (၇) တလ ဂှ် အဲသ္ဇက်ဒးစာန်စး ဟွံမွဲရ၊ အတိုၚ် ၂၆၂ (က) ဂှ်မ္ဂး နူကဵုညးစၞးကၠတ်ထဝ်ဒှ်ဒှ်၊ ဟွံသေၚ်သာ်ဂှ် နူကဵုကောန်ဍုၚ်ကွာန် မထေက်ကြိုက်မွဲမွဲဒှ်ဒှ် ပူဂဵုဍိုက်ပေၚ်ကဵု တၚ်နၚ်စရာဲဍာ်ဒကေဝ်ဂှ်ရ ဒးပ္တိုန်ဏောၚ် ဂးလဝ်သာ်ဏံတုဲ လၟုဟ်ဏံ အလဵုဇကု ဂအုပ်ဝန်ဇၞော်ဂှ် က္လေၚ်လုပ်ပ္ဍဲစရၚ် ဝန်ဇၞော်တွဵုရးပၠန်တှေ် ပ္ဍဲစရၚ် ဝန်ဇၞော်တွဵုရး (၇) တလဏံ ဥူမေန်န်ဥူ လေဝ်ပါလုပ်ပၠန်၊ မွဲလ္ပာ်ဂှ်လေဝ် ဒှ်မံၚ်ဂအုပ်ဝန်ဇၞော်ဖိုဟ် တှေ် ထေက်ကဵုဒးချပ်မွဲရ” သာ်ဝွံ ဂးရ။

တုဲပၠန် စရၚ်ယၟု ကမ္မတဳ ဆေၚ်ကဵုပရေၚ်ချူခၞံဥပဒေ၊ ကမ္မတဳ ဆေၚ်ကဵုပရေၚ်ဂကူ ကောန်ဍုၚ်အရၚ်၊ ကမ္မတီ ဆေၚ်ကဵုလိက်တေၚ်ဗ္စိုပ်၊ လိက်ဒုၚ်ကရုဏာ၊ လိက်ပ္တိုန်ထ္ၜး ကေုာံလ္ၚတ်သ္ၚဳဂၠိပ် ပရေၚ်ကိစ္စနာနာတံဂှ်လေဝ် ဥက္ကဌကၠတ်ထဝ် ဗှ်သ္ပဏာဒ္တန်ကီုရ။

ဥူမေန်န်ဥူ သ္ကိုပ်ဝန်ဇၞော် တွဵုရးမန် သ္ဂးဂှ် “ ဘဏ္ဍာဍုၚ် ညံၚ်ဂွံအိုတ်အောန် အိုတ်သာဂှ် အဲဒးဖန်မံၚ်ဏီတုဲ ဌာနဝန်ဇၞော်တံဏံဂှ် အဲဒးပၠောပ်စွံ သၟဝ်ပရေၚ်ကောပ်ကာဲအဲအဲစုက်က်ရ။ ဒှ်သာ်ဂှ်ရ ယၟုအဲလေဝ် ဒးကဵုစရၚ် ဌာနဝန်ဇၞော် ရ ဂှ်ကီုဏောၚ်ဂးတုဲ အဲစုတ်လဝ် သီုယၟုအဲပၠန်” ဂးရ။

ဝန်ဇၞော်တွဵုရး (၆) တၠ၊ ဝန်ဇၞော် ကေၚ်ကာကောန်ဍုၚ်အရၚ် (၃) တၠ၊ သီုကဵုဇမၞော်ဥပဒေတွဵုရး ကေုာံ ဇမၞော်စၟဳစၟတ်စရၚ်တွဵုရးတံဂှ် ကိစ္စယဵုသစာကီု ကိစ္စဒုၚ်ကအ်ပါၚ် ထ္ပက်စၟတ်တဲတံကီု ပ္တုဲဏာ ပ္ဍဲဂတမုက် ဥက္ကဌကၠတ်ထဝ်ရောၚ် ဂွံတီကေတ်ရ။