က္ဆံၚ်ဒု-ဥက္ကဋ္ဌလၟိဟ် (၁) ဗော်ကောန်ဂကူမန်ဂှ် နကဵုဆန္ဒမာဲကမ္မတဳဗဟဵုတံ သ္ဂုတ်သွာတ်တုဲ ရုဲစှ်ပ္တိုန်လဝ် နာဲတၠနန် ကော် နာဲတေန်အံၚ်ရောၚ် ဂွံတီကေတ်ရ။
နာဲတၠနန် ဒုဥက္ကဌ ဗော်ကောန်ဂကူမန် (၁)
“အတိုၚ်စေဝ်ပၞောန်ဗော် ပ္ဍဲဗော်မွဲမွဲဂှ် ဒးကဵုသ္ဂုတ်သွာတ်ကဵု ပံၚ်ကောံအာက္ဍိုပ်ရတှေ် အတိုၚ်ညးဟလိုၚ် ကမ္မတဳ ဗဟဵုတံ ကဵုတာလျိုၚ် ရုဲစှ်ညး (နာဲတၠနန်) ဂှ် အဲလေဝ် ကဵုအာက္ဍိုပ် အတိုၚ်သ္ဂုတ်သွာတ်ကမ္မတဳဗဟဵုတံ မာန်မံၚ်” သာ်ဝွံ ညးအုပ်ကာနာနာ ဗော်ကောန်ဂကူမန် နာဲလျးတၟး ဟီုကဵုသၞံၚ်တိုၚ်ရ။
ဥက္ကဋ္ဌဇၞော်နာဲၚ္ၚုဲတုၚ်ဂှ် နွံမံၚ်ပ္ဍဲဍုၚ်လ္ဂုၚ်တုဲ အာယုက်ဇၞော်လောန်မံၚ်ကီု ဒု-ဥက္ကဋ္ဌလၟိဟ် (၁) နာဲသိုက်လောန် ယိုက် ဂၠေၚ်မံၚ်တာလျိုၚ် ဝန်ဇၞော်ကၟိန်ဍုၚ်ကီု ပရေၚ်ကမၠောန်ဗော် အသိၚ်ဍိုန်စှေ်မံၚ်ဂှ် ဒးရုဲစှ်ထပ်ဗပေၚ်စုတ်ရောၚ် ညး ဆက်ဟီုရ။
ဝန်ဇၞော်ကၟိန်ဍုၚ်နာဲသိုက်လောန်ဂှ် မွဲဒမြိပ်ဒှ်မံၚ်ဝန်ဇၞော်ကၟိန်ဍုၚ်ဂှ် အခေါၚ်ဂွံရေၚ်တၠုၚ်ကေၚ်ကာဗော် ဟွံမွဲဂှ်ရ ဒးရုဲ စှ်ပ္တိုန်လဝ် ဒု-ဥက္ကဋ္ဌ လၟိဟ် (၁) အဇာညးဂှ်ရောၚ်။ မွဲလပါ်ဂှ် နဒဒှ်ကဆံၚ်ကေၚ်ကာဗဟဵုမွဲတၠ ဆက်စွံပ္တန်အာရောၚ် ဂွံတီကေတ်ရ။
ကောံဓရီုကမ္မတဳဗဟဵုလၟေၚ်ဍာံ (၁/၂၀၁၆) ဂှ် ကၠောန်ဗဒှ်ပ္ဍဲဌာန်ဂအုပ်ရုၚ်ဗဟဵု ဍုၚ်မတ်မလီုဂှ်ဝွံ သွက်ဂွံထ္ပက်အဇာ ညးမဒှ်အာဝန်ဇၞော်ကၟိန်ဍုၚ် နာဲသိုက်လောန်ဂှ် နာဲချေတ်ဥု ကေုာံ နာဲတၠနန်တံ ပ္တိုန်ကၠုၚ်ဂလာန်နွံတုဲ နကဵုမာဲပၞုက် ကမ္မတဳဗဟဵုဂှ် ညးမကလိဂွံမာဲဂၠိုၚ် နာဲတၠနန် ဂွံဒုၚ်ရုဲစှ် ခါန်ကၞက်အာရောၚ်။
တုပ်သာ်ဂှ်ကီု ပၞောဝ်ကဵုကေၚ်ကာဗဟဵု (၃၁) တၠဂှ် နာဲရာၚ်ဆာဲ (နိုၚ်ရဲဇော်) ဂှ် အာတ်လဝ်အခေါၚ်ဒေံါဇူတုဲ အဇာ ညးဂှ် နူကဵုကမ္မတဳဗဟဵု ထပ်ရုဲစှ်ဗပေၚ်လဝ် မာံဇေယျာဥု (မၚ်းကျော်ဇေယျာဦး) ရောၚ် ဂွံတီကေတ်ရ။
ညးမချဳဓရာၚ်မံၚ်အကြာသၚ်သၟတ်မန် ကျာ်ဇၞော်အ္စာသဳဟဂှ် “အကာဲအရာ ညးတံဏံဂှ် ကိစ္စဆက်စၠောံကဵု ဂကောံ မဟာဇန်ကီု ကိစ္စဆက်စၠောံကဵုပရေၚ်ကောန်ဂကူကီုဂှ် ဂွံဒှ်ဇြဟတ် ညးတံချပ်လဝ် ဟွံမွဲပုဟ်။ ဂွံကၠောန် ဂွံဓမံက် လဝ်ရုပ်ရဴလေဝ် ဒၞာဲလဵုဟွံမွဲပုဟ်။ အယာံအမာတ် ပ္တိတ်လိက်လလောၚ်တြးညိညိတုဲ ထမံက်ရုပ်ရဴနဇိုၚ်နတဲ ဟွံမွဲ တှေ် ဓဝ်ပတှေ်ညးဍုၚ်ကွာန် ဟွံမွဲပုဟ်လေဝ်” သာ်ဝွံ ညးဟီုမြော်ကဵုသၞံၚ်တိုၚ်ရ။
ပ္ဍဲကဵုညးတာလျိုၚ်ဗော်တံဂှ် အကြာကောန်ဗော်ညးတံ ကဵုက္ဍိုပ်နွံမံၚ်ကီုလေဝ် အကြာဗွိုၚ်ကောန်ဂကူဂှ် ဂွံကဵုက္ဍိုပ် ကုက္ဍိုပ်သ္ကိုပ်ဗော်တံဂှ် ဓဝ်ပတှေ်အောန်မံၚ်ရောၚ် ညးမလ္ၚတ်ပရေၚ်ဍုၚ်ကွာန်မန်တံ ဟီုရ။
ဗော်ဏံဝွံ ပ္ဍဲသၞာံ (၂၀၁၂) ဂှ် နကဵုယၟုဗော်ဒဳမဝ်ကရေသဳမန် (MDP) ကလေၚ်ပ္တိုန်လဝ် စၟတ်သမ္တီနူကဵုကၟိန်ဍုၚ်တုဲ သၞာံ (၂၀၁၃) ဂှ် ပြံၚ်သၠာဲလဝ်ယၟု ဗော်ကောန်ဂကူမန် (MNP) ရ။ ဒက်ပ္တန်လဝ်ဗော် ကေၚ်ကာဗဟဵု (၃၁) တၠကဵု ကမ္မတဳဗဟဵု (၉၃) တၠရောၚ်။
လၟုဟ်ဝွံ ကောန်ဗော်နွံမံၚ် ဗၞတ် (၇၀၀၀၀) ပြၚ်တုဲ သွက်ဂွံပံက်ပ္တန် ဌာန်ဂအုပ်ဗဟဵုပါ် ပ္ဍဲဍုၚ်လ္ဂုၚ်မာန်ပၠန်ဂှ် စဳဇန်မံၚ်ရောၚ် ဂွံတီကေတ်ရ။
