ပ္ဍဲအသေအဟာန် ဗော်ဒဳမဝ်ကရေဇြဳအလုံရးမန် (AMDP/တ္ကံခၟိုၚ်) ပေၚ် (၆)သၞာံဂှ် ဆန္ဒသၟတ်ကောန်ဗော်တံ နွံပၟိက်ကဵုဗော်မန် ဒဒှ်မွဲဗော်ဟေၚ်ရဂှ် ဓမံက်ထ္ၜးဆန္ဒအိုတ်ရ။
ပ္ဍဲစၟတ်တ္ၚဲဂျူလာၚ် ၂၆ ရဲဗော်ဒဳမဝ်ကရေဇြဳ အလုံရးမန် တ္ကံခၟိုၚ်တံ ကၠောန်သ္ပတ္ၚဲဗော်ကၠောံသၞာံ သီုကဵုကဵုဒါန်ဖာပ်သၚ်တုဲဂှ် ကောန်ဗော်မွဲစွံတံ သဳကၠဳရၚ်သ္ကံတုဲ သၟတ်စၞးကွာန်ဂမၠိုၚ်တံ ချူဇန်မလိက်မ္ဂး “သွက်ဂကူမန်မွဲ ဂွံဇၞးလောဲ ဗော်မွဲဟေၚ်ရ ပိုဲနွံပၟိက်” တုဲ ဓမံက်ထ္ၜးကၠုၚ်အ္ၚပ်ဆန္ဒ ပ္ဍဲအသေအဟာန်ဂှ်ရ။
သၟတ် ဗော် AMDP တံ ဗီုဓမံက်ထ္ၜးမံၚ်ဆန္ဒဍေံတံ (Facebook)
ပ္ဍဲအသေအဟာန်ကၠောံသၞာံဂှ်ဝွံ ညးမဒှ်ကေၚ်ကာဗဟဵု နာဲကျာန်ယျေတ်၊ နာဲဆာန်မျေအ်၊ နာဲသာန်တေန် ကေုာံ ဒံက်တာအံၚ်နာၚ်ဥူ နူဒေသမာဲလၟိဟ် (၁) ပွိုၚ်ဍုၚ်ၜါသွာၚ် (တ္ကံခၟိုၚ်) သီုကဵုကောန်ဗော် ၜိုတ် (၅၀၀) တံ တိုန်စိုပ်အိုတ်ရ။
ဒံက်တာအံၚ်နာၚ်ဥူ (ဗော်AMDP) ဇၞးလဝ်မာဲတုဲ တိုန်ဒှ်ဒၟံၚ် ဒုဥက္ကဌ ကၠတ်ထဝ်တွဵုရးမန် ဟီုသာ်လဵုရောမ္ဂး “အဲဂှ် ကိစ္စပံၚ်ပကောံဗော်ၜါကီု သွက်ဂွံသဳကၠဳပ္ညဳပ္ညပ်ညးသ္ကံကီု ၜိုန်ဒှ်မၞိဟ်စိုတ်ထတ်တ်မွဲကီုလေဝ် ပ္ဍဲအရာသၟတ် ကောန်ဗော်တံ ဓမံက်ထ္ၜးဆန္ဒလၟုဟ်ဏံဂှ် ဒှ်ဆန္ဒဍေံတံ သက်က်ဟေၚ်ရ” သာ်ဝွံ ဂးရ။
“မွဲကွာန်တှေ် သၟတ်မွဲတလ ပ္တိုန်ထ္ၜးရ။ ဗွဲမဂၠိုၚ်တှေ် ကိစ္စဒှ်အခက်ခုဲကဵုပရေၚ်ကတ်ပညာ ကိစ္စဗော်ၜါညံၚ်ဂွံညဳဂှ် ပ္တိုန်ထ္ၜးဂၠိုၚ်ရ။ ခြာဟွံလံ ပ္ဍဲတ္ကံခၟိုၚ်ပိုဲ သွက်ဂွံကၠောန်ပေါဲရုဲအကြာ နွံမံၚ်၊ အာအတိုၚ်ဏံရတှေ် သွက်ပိုဲဒှ်အခက်ခုဲ မာန်ရ။ ဒှ်ဓဝိၚ်သာ်ဂှ်တုဲ ဍေံတံပ္တိုန်ထ္ၜးတိုန်ဂံၚ်ၚ်ရ။ လညာတ်ဍေံတံကဵု ဍေံတံဟေၚ်ရ ဍေံတံဓမံက်ထ္ၜးဆန္ဒ” သာ်ဝွံ ညးဆက်ဟီုရ။
ဗော်ဒဳမဝ်ကရေဇြဳ အလုံရးမန်ဝွံ ပ္ဍဲကာလပေါဲရုဲမာဲ သၞာံ ၂၀၁၀ တေံ ဇၞးကၠုၚ်မာဲ ၁၆ ဒၞါဲကီုလေဝ် ပ္ဍဲပေါဲရုဲမာဲ ၂၀၁၅ တုဲကၠုၚ်ဏံဂှ် ညးစၞး (၁) တၠဟေၚ်ရ ဇၞးကၠုၚ်မာဲ။
ကၠာဟွံစိုပ်ပေါဲရုဲမာဲ ၂၀၁၅ ဂှ် ခမိဳသၚ်မန် ကေုာံ ညးစိုတ်လုပ်စကဵုပရေၚ်ကောန်ဂကူတံ ၜိုန်ဂစာန်ကၠုၚ် သွက်ဗော်ကောန်ဂကူမန် (MNP) ကဵု ဗော်ဒဳမဝ်ကရေဇြဳအလုံရးမန် (AMDP) တံ ညံၚ်ဂွံဒှ်မွဲဗော်ကီုလေဝ် ဟွံအံၚ်ဇၞးရ။
