ရာမညရဋ္ဌ ဗုဒ္ဓတက္ကသိုလ် နွံပ္ဍဲအရာပ်မျာၚ်သာယာ ဍုၚ်မတ်မလီုဂှ်ဝွံ ပပ္တံနူဂိတုဂျူလာၚ် ၂၄ တုဲ ပံက်ဗ္တောန်အာ တန် Diploma in Buddhism ရောၚ် ကျာ်ဇၞော်အ္စာ ဘဒ္ဒန္တပါလရာမည ဥက္ကဌကမ္မတဳပရေၚ်ပ္တန်ဗဒှ်ဗုဒ္ဓတက္ကသိုလ် မြော်ထ္ၜးတုဲ ဂွံတီကေတ်ရ။

“ပ္ဍဲရာမညရဋ္ဌ ဗုဒ္ဓတက္ကသိုလ်ဏံ ညံၚ်ဂွံစိုပ်အဆံၚ်ဂၠးတိဂှ် ထပ်လဝ်ဂလိုၚ်လဝ် အဘိဓရ်မွဲဘာသာရ၊သွက်ဂွံတိုန် တန် Diploma in Buddhism ဏံဂှ် ယဝ်ဒှ်ခမဳသၚ်တှေ် သဝ်အိုတ် ဒးအံၚ်လဝ်တန်ဇၞော်(တန်မဟာ) နူဂကောံ ရာမညဓမ္မာစရိယ ဟွံသေၚ်သာ်ဂှ် ဒးအံၚ်လဝ်တန်ဇၞော် နူအလဵုအသဳရောၚ်၊ ယဝ်ခရှ်မ္ဂး ဒးအံၚ်လဝ် စှ်တန်ရောၚ်” ကျာ်ဇၞော်အ္စာ ဂးရ။

ရာမညရဋ္ဌဗုဒ္ဓတက္ကလိုလ် (MNA)

အဓိက ကုခမဳသၚ် ကေုာံ သဳလတံဂှ် ရေၚ်တၠုၚ်ကဵုကၠာရောၚ်ဒှ်တုဲ ပြဟ်ဟ်ဏံ သၚ် ၁၈ ဇကုကေုာံ ခရှ် ၅ တၠ ပၠောပ်လဝ် စရၚ်နွံတုဲ သွက်သ္ဂောံဂွံအခေါၚ်လုပ်ဂှ် ဂိတုဂျူလာၚ် ၁၆ ဏံမ္ဂး စၟဳစၟတ်သၟာန်သှ်အာရောၚ်၊ ညးနွံကဵုအစောံစရာဲ သၟဟ်ရထမာန်တံဂှ် က္လိဂွံအခေါၚ်တိုန်ရောၚ်တုဲ သွက်ညးမအောန်ကဵုအစောံအရာဲ ဟွံသၟဟ်ရထတံဂှ် ဗ္တောန်ကဵုလိက်အၚ်္ဂလိက် ၜိုတ်ပန်မသုန်ဂိတုရောၚ်၊ လၟုဟ်ဏံ ဒုၚ်တဲကောန်တန်ဗ္တောန်ဖအိုတ်ရောၚ် ရဴသာ်ဝွံ တၠဂုန်ခေမာသာရ (ညးထိၚ်ဒဝ်စရၚ်) ဂးရ။

“တိုန္ၜိုတ္ၜါသၞာံ အံၚ်အာတှေ် အဂုန်တံ ဇိုန်ကဵုတဆိပ်ကြာ ဒဳပၠဝ်မာဏောၚ်၊ဗွဲကြဴ ၂ သၞာံပၠန်တှေ် ကျာ်ဇၞော်အ္စာ သွက်ဂွံကၠုၚ်ဗ္တောန်ကဵု ပ္ဍဲအဂုန်တံ လၟိဟ်ရုံဂပ်ဍိုက်ပေၚ်ကၠုၚ်ဏောၚ်တုဲ အခါဂှ်မ္ဂး ဆက်ဗ္တောန်ကဵု တန် BA ပၠန်ဏောၚ်၊ ယဝ်ဟွံမိက်တိုန် ပ္ဍဲအဏံတှေ်လေဝ် ပိုဲဆက်လဝ်ကဵု ပိတက္ကသိုလ် မပ္တံ MCU ပ္ဍဲဍုၚ်သေံတေံတုဲရ၊ အတေံလေဝ် ညးတံ မၚ်ဒုၚ်တၠုၚ်မံၚ်ရ” တၠဂုန်ခေမာသာရ ဂးရ။

ရာမညရဋ္ဌ ဗုဒ္ဓတက္ကသိုလ်ဝွံ နူဗုဒ္ဓတက္ကသိုလ် မွဲဟာန် ကဝ်လိက် ၂၁ နွံအပ္ဍဲဍုၚ်ဗၟာဏံ သ္ပလဝ်သမ္တီတုဲဒၟံၚ်ရ၊ဒှ်သာ်ဂှ်ရ အံၚ်လဝ်တန်ဒဳပၠဝ်မာ ပ္ဍဲတက္ကသိုလ်ဏံတုဲမ္ဂး ပ္ဍဲဗုဒ္ဓတက္ကသိုလ် ကေုာံ ကဝ်လိက် နွံအပ္ဍဲဍုၚ်ဗၟာဏံ မမိက်ကဵုမွဲမွဲဒၞါ နွံပၟိက်မိက်ဂွံဆက်တိုန် တန် BA မ္ဂး တိုန်ကတ်ဗ္တောန်ဂွံမံၚ်ကီုရဂှ်လေဝ် တၠဂုန်ခေမာသာရ ဂးရ။

ရာမညရဋ္ဌ ဗုဒ္ဓတက္ကသိုလ် ဂွံဒှ်ကၠုၚ်ဂှ် အ္စာဓမ္မကထိုက်မန် (အ္စာဓရ်မန်) တၠဂုန်အ္စာသဳလာစာရ သ္ပက္ဍိုပ် သိုၚ်ပ္တန်ကၠုၚ်လဝ် ပပ္တံနူ သၞာံ ၂၀၁၂ ဂိတုမေ ၂၆ တေံတုဲ ဓမံက်ကၠုၚ်ရုပ်ရဴ သၟဝ်ပရေၚ်ပၠတရဴ ဂကောံသၚ်မန် ရာမညဓမ္မာစရိယရ။

ပ္ဍဲတန် Diploma in Buddhism ဏံ ဗ္တောန်အာ ဗွဲပန်ဘာသာမ္ဂး ပါဠိသဒ္ဒါ၊ သဒ္ဒါအၚ်္ဂလိက်၊ သုတ်(သုတ္တ န္တ) ကေုာံ အဘိဓရ် တံရောၚ်၊ပ္ဍဲသုတ္တ န္တ ဂှ် ယမကဝဂ် မကၠုၚ်နူဓမ္မပဒ ကေုာံ ပရဘာဝသုတ် ပ္ဍဲမၚ်္ဂလသုတ် (ခုဒ္ဒကပါဌ) တံဂှ် ပါ်တုဲဗ္တောန်အာကီုလေဝ် ပ္ဍဲပေါဲသၟာန်သှ်လိက်တေံဂှ် တောဲပံၚ်အာမွဲစွံရောၚ်၊ အခါဗ္တောန်ပၠန်လေဝ် အတိုၚ်ဇုတ်ဓရံၚ် (စစ်ကိုၚ်းသီတဂူဗုဒ္ဓတက္ကသိုလ်) တေံဂှ်ရ ဗ္တောန်အာရောၚ် ဂွံတီကေတ်ရ။