ပ္ဍဲတွဵုရးဍုၚ်မန်ဝွံ ကောန်ၚာ်မၞုံအာယုက်အကြာ ၅ သၞာံကဵု ၁၇ သၞာံတအ်ဂှ် တိုန်ဘာအောန်မံၚ်ဗွဲမလောန်တုဲ ကောန်ၚာ် ၆၄ က္ဍိုပ်ကၠံဟေၚ် တိုန်ဘာမာန်အိုတ်ရောၚ်ဂှ် နူဂကောံ UNICEF ရုၚ်လစှေ်ပ္ဍဲမတ်မလီု မစ္စစ် Anne-Cecile Vialle ဟီုဏာပ္ဍဲ ဂိတုဂျူလာၚ် ၂၅၊ တ္ၚဲစၟတ်သမ္တီ UNICEF ဍုၚ်မတ်မလီုပေၚ် ၁၀ သၞာံ ကၠောန်ဗဒှ်ပ္ဍဲ ၚိုဲမိုဝ် ဟို၀်တေဝ် ဍုၚ်မတ်မလီုဂှ်ရ။
“တွဵုရးမန်ကဵု တွဵုရးကရေၚ်၊ တွဵုရးသေံတအ်ဂှ်တုပ်ပ်ရ ကောန်ၚာ်တိုန်ဘာ အောန်ဗီုဏံဂှ် မုလက်သဏ်ဍေံ ထ္ၜးကဵု ရောဟီုတှေ် ကောန်ၚာ် ၁၀ သၞာံၜက်အာတအ်ဂှ် အံၚ်အာကဆံၚ်တန်မူလတုဲ သွက်ဂွံကလေၚ်တိုန် တန်လ္ဒောဝ်ဂှ် အောန်အာ၊ လုပ်ကၠောန်ကမၠောန်ဂှ်သၟးရ ဂၠိုၚ်တိုန်မံၚ်ဏောၚ်” သာ်ဝွံ မစ္စစ် Anne-Cecile Vialle ဟီုရ။
ဂွံဆဵုကေတ် ကောန်ၚာ်အဝဲမံၚ်ဘာမွဲတၠ အဃောကၠောန်မံၚ်ကမၠောန်ရုပ်ထ္ၜိုတ် (MNA)
မွဲလပါ်ပၠန်ဂှ် သ္ပဟိုတ်ကဵုပရေၚ်ပိုန်ဂြပ်တုဲ အကြာဗွိုၚ်ကမၠောန်မပ္တံကဵုဆေၚ်ဍာ်လဖက်၊ ကပှ်ခၟိက် (ပလတ်စတစ်) တံကီု ပ္ဍဲပရေၚ်ကမၠောန်သိုၚ်ခၞံတံဂှ်လေဝ် ကောန်ၚာ်တံ ဒးလုပ်ကၠောန်မံၚ်ကမၠောန်ကီုရောၚ် ဂွံတီကေတ်ရ။
သၟာကမၠောန်ကောန်ၚာ်ဂွံဒှ်ဂှ် ဟိုတ်နူဟွံဂွံဗ္တောန်ပညာလေဝ်ပါမံၚ်ကီုတုဲ ဟိုတ်နူစသုၚ်ဝါတ်ကျာတ်သၟး ဟွံသေၚ်ကီု ဟိုတ်နူၚုဟ်စရိတ်တိုန်ဘာအိုတ်ဂၠိုၚ်လေဝ်ပါမံၚ်ကီု ဒးပြံၚ်တိုန်ဘာကဆံၚ်သၠုၚ် တရဴသ္ၚောဲခြာမံၚ်ဂှ် ပရေၚ်ဂီုကၠီု ဟွံမွဲတုဲ မ္ဒးတိတ်ထောံနူဘာအိုတ်ရောၚ် သာ်ဝွံ ညးမချဳဒရာၚ်အခေါၚ်အရာညးဗြဴကေုာံ အခေါၚ်အရာကောန်ၚာ် မိသုတဇဝ် ဟီုရ။
“ကောန်ၚာ်ကၠောန်မံၚ် ပ္ဍဲမပ္တံဆေၚ်ဍာ်လက်ဖက်တအ်ဂှ် ရဲတွဵုရးပိုဲဂှ်အောန်မံၚ်ဏောၚ်၊ ကၠုၚ်နူမပ္တံ ရးဨရာဝတဳတေံ ဏောၚ်ဂၠိုၚ်ဂှ်။ ဆ္ဂး ကောန်ၚာ်နူတွဵုရးမန်ပိုဲဂှ် အာကၠောန်စမံၚ်ပ္ဍဲဍုၚ်သေံတေံရဂၠိုၚ် ကောန်ၚာ် နူကွာန်ရးတအ်ဂှ်ရ တိတ်နူဘာတုဲ အာကၠောန်စဂၠိုၚ်မံၚ်။ ကောန်ၚာ်နူဍုၚ်ပိုဲတအ် တိတ်ဘာတုဲဂွံအာကၠောန်စဂှ် အောန်မံၚ်” သာ်ဏံ မိသုတဇဝ် ဆက်ဟီုရ။
ပ္ဍဲကာလလၟုဟ်ဝွံ သွက်ကောန်ၚာ်ပြးဇးမံၚ်ပ္ဍဲကွာန်တအ် ဂွံစိုတ်လုပ်စပ္ဍဲဗ္တောန်လိက်ဘာဂှ် နူဘာကောန်ဂကူမန် သီ ဗၜေါ၀်တုဲ ဗ္တောန်ကဵုမံၚ်လိက်ကီုတုဲ သွက်အ္စာဘာဗ္တောန်မံၚ်ကဵု ပ္ဍဲဘာကောန်ဂကူမန်တံဂှ် နူကဵုအစီဇန်အလဵုအသဳ မပ္တံပရေၚ်သြန်ဂိတုတအ်ဂှ် ဒးကဵုတၚ်ဒုၚ်လျိုၚ်ထေက်ရောၚ် ညးချဳဓရာၚ်မံၚ် ပရေၚ်လိက်ပတ်ယေန်သၞာၚ်တံ ဟီုဂး လဝ်နွံရ။
ကောန်ၚာ် ဟွံဂွံမံၚ် ပ္ဍဲကဵုမိမဗွဲမဂၠိုၚ်တံဂှ် ဒးမံၚ်သၟဝ်တဲ မပ္တံကဵုယာဲနော်၊ မသကလောတအ်ဂှ် ဟိုတ်နူထိၚ်ဒဝ် ဗီုမိမ ဟွံမာန်ဂှ်ရ ကောန်ၚာ်ဂမၠိုၚ်ဝွံ သွက်ဂွံဗ္တောန်လိက် စိုတ်လုပ်စ အောန်စှေ်အာတုဲ ဍေံတံစိုတ်ဂွံလုပ်စဂှ် ဒးပြံၚ်သၠာဲ သၞောတ်ပရေၚ်ပညာထေက်မံၚ်ရောၚ်ဂှ် ညးမချဳဓရာၚ် အခေါၚ်အရာညးဗြဴ ကေုာံ ကောန်ၚာ်တံ ဟီုရ။
ပ္ဍဲတွဵုရးဍုၚ်မန်ဝွံ အတိုၚ်လၟိဟ်စရၚ်မၞိဟ်ဗက်ကံက်လဝ် ပ္ဍဲသၞာံ ၂၀၁၄ ဂှ်မ္ဂး ကောန်ၚာ်အကြာအာယုက် ၅ သၞာံကဵု အာယုက် ၁၇ သၞာံတအ်ဂှ် နွံမံၚ်လၟိဟ် (၅၅၉၈၇၁) တၠအိုတ်တုဲ ပ္ဍဲလၟိဟ်ကောန်ၚာ်တအ်ဂှ် ဗၞတ် ၆၄ က္ဍိုပ်ကၠံဟေၚ် ဂွံတိုန်ဘာအိုတ်ရောၚ် ဂွံတီကေတ်ရ။
