အခါစိုပ်အခိၚ်ကၠောန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံတေံလေဝ် ညံၚ်ဂွံဆဵုညးသ္ကံကဵု က္ဍိုပ်သ္ကိုပ်ကောန်ဍုၚ်အရၚ် မကၠုၚ်တိုန်ကောံဓရီုဏံမွဲဝါပၠန်ဂှ် စၟဳမံၚ်ရောၚ် သာ်ဝွံ Mr.Sun Guoxiang ကလုတ်တၟေၚ် သွာၚ်ပရေၚ်ကေၚ်ကာအာယှ နူဌာနပရေၚ်ဍုၚ်သၟာၚ် ကၟိန်ဍုၚ်ကြုက် ဂးဏာဂလာန် ပ္ဍဲကောံဓရီုမုက်ဇဳ ဂကောံပၠန်ဂတးရပ်လွဟ် ကောန်ဍုၚ်အရၚ်ဂှ်ရ။

ပ္ဍဲဂျူလာၚ် ၂၉ ဖါနူဂယး မဒှ်တ္ၚဲစတုတ္ထ ကောံဓရီုမုက်ဇဳ ဂကောံပၠန်ဂတး ရပ်လွဟ်ကောန်ဍုၚ်အရၚ် မကၠောန်ဒၟံၚ် ပ္ဍဲမာၚ်ဂျာယာန် ဒေသတိဍာ် ကချေၚ်ကေအိုၚ်အိုဝ် KIO ဂှ် Mr.Sun Guoxiang ကလုတ်တၟေၚ် သွာၚ်ပရေၚ်ကေၚ်ကါအာယှ နူဌာနပရေၚ်ဍုၚ်သၟာၚ်ကၟိန်ဍုၚ်ကြုက် ဂးဏာဂလာန်ဗ ္ကန် ရ။

ကောံဓရီုမုက်ဇဳ EAO’s ပ္ဍဲမာၚ်ဂျာယာန် (MNA)

Mr.Sun Guoxiang ကလုတ် သွာၚ်ပရေၚ်ကေၚ်ကါအာယှ နူဌာနပရေၚ်ဍုၚ်သၟာၚ်ကၟိန်ဍုၚ်ကြုက် (MNA)

“ ပ္ဍဲသ္ဘၚ်သဳကၠဳပေန်လုၚ် ၂၁ ဗွဝ်ကၠံတေံလေဝ် ညံၚ်ဂွံဆဵုကဵုက္ဍိုပ်သ္ကိုပ်ကောန်ဍုၚ်အရၚ် ကၠုၚ်စိုပ်မံၚ်လၟုဟ်ဏံပၠန်ဂှ် အဲစၟဳမံၚ်ဏောၚ်၊ တၚ်ဂုဏ်အလုံညးဖအိုတ်ရ” သာ်ဝွံ Mr.Sun Guoxiang ဂးရ။

တုဲပၠန် “ အရာပိုဲသဳကၠဳ ပ္ဍဲကောံဓရီုလၟုဟ်ဏံဂှ် ဒှ်အရာပၟိက်ဇၞော်ဇၞော်ဖအိုတ်ရ။ အပ္ဍဲဂှ်ပၠန် ဣလဵုပၟိက်ဇၞော်အိုတ်ပၠန်ရောဂှ် ဒးသတီလဝ်ကီုဏောၚ်။ အရာလဵု ဒးကဵုကၠာ ဒးကၠောန်ကၠာရောဂှ် ဒးဍံက်လဝ်ဏောၚ်။ ပရူ မသဳကၠဳမံၚ် ပ္ဍဲကောံဓရီုဏံဂှ် ကိစ္စ ဒးကၠောန်ဍာ်ဂမၠိၚ်လေဝ်နွံ ကိစ္စဍာ်ဒမၠေံလေဝ်နွံရ။ လညာတ်အဲတှေ် အရာလောဲလောဲဂှ် သဳကၠဳကၠာတုဲ ညံၚ်ဂွံဒှ်သ္ပဒ္တန်ဂှ် ပၟိက်ဇၞော်မံၚ်ဏောၚ်ထေၚ်” ညးစၞးကြုက်ဂှ် ဂးရ။

ပ္ဍဲညးမကၠုၚ်တိုန်ကောံဓရီုဏံ ညးလ္ၚဵု ကေၚ်တိုန်လဝ် ပေါဲကောံဓရီု ဍုၚ်နာနာနွံကီုတုဲ လဆဵုဂဗညးတံဂှ် ဒှ်ဂုန်ဖဵု ဒှ်အထံက် ကောံဓရီုဏံ ဂၠိုၚ်ၚ်မာန်ဏောၚ်တုဲ ပိုဲတံ သ္ဂောံဂွံသွဟ်ခိုဟ်ဟ်ဂှ် အရာလ္ၚဵု ဒးဗဗွဲဗက်ကဵုလေဝ်နွံ၊ ပတေၚ်လဝ်လၟိုန် ဟွံဂွံလေဝ်နွံ ညးတေံ ဆက်ဂးရ။

သၟာၚ်နူဂှ်ပၠန် ပ္ဍဲကောံဓရီုဏံ စပ်ကဵုသွက်သ္ဂောံဂွံပရေၚ်ၜိုဟ်လလံဍုၚ်မ္ဂး ညးညးအဲအဲ နူကဵုဇဳဇဳဒိုဟ် ဗိုၚ်ဂစာန်အာ ညးသ္ကံဏောၚ်ဂှ်လေဝ် အဲစၟဳကေတ်လဝ်ဗီုဂှ် ဂးရ။

ကောံဓရီုဝွံ နူဂျူလာၚ် ၂၆ ဒဵုကဵု ၂၉ ရန်လဝ်သွက်ဂွံကၠောန် ဗၞတ် (၄) တ္ၚဲဓဝ်ကီုလေဝ် ဟိုတ်နူသဳကၠဳဟွံဒှ်က္ဍၚ်တုဲ ဆက်ကၠောန် ဒဵုကဵုဂျူလာၚ် ၃၀ ဂွံတီကေတ်ရ။

“သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဂှ် ထ္ပက်စၟတ်တဲ NCA တုဲမှတိုန်ဟာ ဟွံထ္ပက်လေဝ်တိုန်ဟာဂှ် တဴရဴအလဵုအသဳရ။ ထ္ပက်စၟတ်တဲတုဲမှ ဂွံအခေါၚ်တိုန်မ္ဂး ဒးက္လေၚ်ပ္ညဳ မူ NCA ဂှ်ပၠန်ဏောၚ်၊ ဂွိုအ်ထ္ပက်စၟတ်တဲလေဝ် တိုန်ဂွံဏောၚ်မ္ဂး လောဲသွာအာရ။ သွက်ဂွံထ္ပက်စၟတ်တဲ NCA ပၠန်ဂှ်လေဝ် အလဵုအသဳဟီုလဝ် ဂကောံတေံ ဂကောံဏံ ပါဟွံဂွံတှေ် ဒှ်အခက်ခုဲကဵုပိုဲပၠန်၊ ဂကောံရပ်လွဟ်တံ ဟွံဂွံအခေါၚ် ပါလုပ် အလုံဖအိုတ်မ္ဂး ဍုၚ်ပိုဲ စိုပ်အဆံၚ်ၜိုဟ်လလံဟွံမာန်၊ ဒၟါနူဂှ်ရ ညံၚ်ဂွံပါလုပ်မာန် အလုံညးဖအိုတ်ဂှ် ပိုဲတံဒးကေံလဝ်” နာဲဟံသာ ဒုဥက္ကဌ UNFC ဂးရ။

ဆ္ဂး ပ္ဍဲကောံဓရီုမုက်ဇဳ မာၚ်ဂျာယာန်ဏံ ပၞောဝ်ကဵုဂကောံရပ်လွဟ် နွံ ၂၁ ဂကောံဂှ် ဂကောံရပ်လွဟ် ဂကူဝ UWSP/UWSA၊ ဂကောံရပ်လွဟ် ဂကူတအာၚ် (ပလံၚ်) TNLA၊ ဂကောံရပ်လွဟ်ကိုဝ်က MNDAA၊ ဂကောံရပ်လွဟ် ဂကူနာဂ NSCN-K တံ ပန်ဂကောံဂှ် ဟွံကၠုၚ်တိုန်ကောံဓရီုရ။

ပ္ဍဲကောံဓရီုမုက်ဇဳ ဂကောံရပ်လွဟ် ကောန်ဍုၚ်အရၚ် မကၠောန်ဒၟံၚ်ပ္ဍဲမာၚ်ဂျာယာန် တွဵုရးကချေၚ်ဂှ်ဝွံ သီုဖအိုတ် ညးစၞးဂမၠိုၚ် ဗၞတ် (၂၀၀) ပြၚ် နူကဵုဂကောံဂမၠိုၚ်မတွံဂး ဂကောံ UNFC မွဲဟာန်ဂကောံရပ်လွဟ် ကောန်ဍုၚ်အရၚ် (၁၇) ဂကောံ၊ ဂကောံမဟာမိတ် ကောန်ဍုၚ်အရၚ်ဂမၠိုၚ် မညဳသာသၟဟ်သၟန် (UNA)၊ ဖေဝ်ဒရေယှေန် ဗော်ကောဒေံ ကောန်ဍုၚ်အရၚ်ဂမၠိုၚ်(NBF )၊ ဂကောံညးဗြဴ (ကၟိန်ဍုၚ်ဗၟာ) WLB တံ တိုန်စိုပ်သဳကၠဳမံၚ်ရ။