ကမ္မတဳလ္ၚတ်သ္ၚဳဂၠိပ် လိက်တေၚ်ဗ္စိုပ်၊ လိက်ဒုၚ်ကရုဏာ၊လိက်ပ္တိုန်ထ္ၜးကေုာံကိစ္စနာနာ နူကၠတ်ထဝ်တွဵုရးမန်ပံက်လဝ်ဂှ် ပပ္တံနူ ဂိတုအေဗရဴ ၈ ဒဵုကဵု ဂိတုဂျူလာဲ ၅ တုဲကၠုၚ်ဏံဂှ်မ္ဂး လိက်တေၚ်ဗ္စိုပ် နွံ ၁၆၀ စံၚ်တုဲ အပ္ဍဲဂှ် ပသောၚ်တုဲနွံ ၃၉ စံၚ် ဂွံတီကေတ် နူကမ္မတဳဂှ်ရ။
ရုၚ်ကၠတ်ထဝ်တွဵုရးဍုၚ်မန် (MNA)
ပ္ဍဲလိက်တေၚ်ဗ္စိုပ် ၁၆၀ စံၚ် မစိုပ်တဲကမ္မတဳဂှ် ၜိုတ် ၃၀ က္ဍိုပ်ကၠံ ပသောၚ်ကၠုၚ်မာန်တုဲ ၜိုတ် ၂၀ က္ဍိုပ်ကၠံဂှ် ဟိုတ်နူဆက်စပ်မံၚ်ကဵု ကိုန်အစဳဇန်ဂှ်ရ ဆက်ရၚ်တၠုၚ်မံၚ်ဖိုဟ်၊ သှေ် ၅၀ က္ဍိုပ်ကၠံဂှ် ဆၜိုတ်ဒးမၚ် လိက်ကလေၚ်ပရိုၚ် နူဌာနမဆေၚ်ဆက်တံဟေၚ်ရ သာ်ဝွံ ဥူအံၚ်ကျဝ်ဒူ ဥက္ကဌ ကမ္မတဳလ္ၚတ်သ္ၚဳဂၠိပ် လိက်တေၚ်ဗ္စိုပ်၊ လိက်ဒုၚ်ကရုဏာ၊ လိက်ပ္တိုန်ထ္ၜးကေုာံကိစ္စနာနာ ဂှ် ဂးရ။
“လိက်တေၚ်ဗ္စိုပ် ပသောၚ်တုဲ ၃၉ စံၚ်ဂှ် သီုဖအိုတ် ဟတီဟွံဒးရ၊ တီကၠးမွဲဂှ် ကိစ္စပရေၚ်တိ ပါဂၠိုၚ်အိုတ်” ဥူအံၚ်ကျဝ်ဒူ ဂးရ။
ပ္ဍဲလိက်တေၚ်ဗ္စိုပ် ၁၆၀ စံၚ်ဂှ် လိက်ကဵုပရိုၚ်ကုဌာနအလဵုအသဳဂှ် ၃၀ စံၚ်၊ နူဌာနအလဵုအသဳ ကလေၚ်နၚ်ပရိုၚ်ဂှ် ၁၃ စံၚ်၊ လိက်ဒးပအပ်ကဵုဌာနအလဵုအသဳဂှ် ၂ စံၚ်၊ လိက်ဒးပအပ်ကဵု ညးစၞးကၠတ်ထဝ်ဂှ် ၉ စံၚ်၊ ဒးပအပ်ကဵု ဌာနခၞံသၞောဝ်ဥပဒေဂှ် ၃၃ စံၚ်၊ ဖန်ဖက်ရၚ်တၠုၚ်တုဲအာဂှ် နွံ ၃၉ စံၚ် သာ်ဝွံ ဂွံတီကေတ် နူကမ္မတဳ ဂှ်ရ။
“ကိစ္စဆေၚ်ကဵုညးဂလိုၚ် ကိစ္စဆေၚ်ကဵုဌာနဥပဒေတံဂှ်မ္ဂး ဌာနမဆေၚ်စပ်တံ စဳဇန်ဖန်က်မံၚ်ဗီုလဵုရော၊ ယဝ်ပသောၚ်မ္ဂး ညံၚ်ဂွံပသောၚ်ကဵုပြဟ်ဟ်၊ ဂွိုအ်ပသောၚ်ဏီတှေ် ညံၚ်ဂွံပသောၚ်ထောံ ဖ္တိုက်ဖအောဝ်လဝ်၊ ဆေၚ်ကဵုမၞိဟ်မွဲရတှေ် ဟွံကၠောန်ပုဟ်၊ ဆေၚ်ကဵုမၞိဟ်ဂလိုၚ်ရ ဖန်ပသောၚ်ကဵု” ဥူဇြဝ်ဝ်ထူ ညးအုပ်ကာ ကမ္မတဳလ္ၚတ်သ္ၚဳဂၠိပ် လိက်တေၚ်ဗ္စိုပ်၊ လိက်ဒုၚ်ကရုဏာ၊လိက်ပ္တိုန်ထ္ၜးကေုာံကိစ္စနာနာ ဂးရ။
ကိစ္စဆေၚ်ကဵုညးဂလိုၚ် မပ္တံ ရုၚ်စက်တိဗုတ် MCL ၊ ရုၚ်စက်မာၚ်တၟံ၊ ရုၚ်စက်ပ္တိတ်ပဠက်အရက် (အရက်ဒဴ-အရက်ပြန်) ၜဳကလေၚ် တံဂှ်မ္ဂး အလဵုဇကု ရဲဂကောံကမ္မတဳတံစှေ်လ္ၚတ် က္လၚ်ရမျှာၚ်မှာဇန်၊ ပကောံပကေဝ်တၚ်နၚ် ပ္တိတ်တၚ်သ္ၚဳဂၠိပ်တုဲ ဒးဒုၚ်စဳရေၚ်ကဵုကၠတ်ထဝ် ဥူဇြဝ်ဝ်ထူ ဂးရ။
ကမ္မတဳလ္ၚတ်သ္ၚဳဂၠိပ် လိက်တေၚ်ဗ္စိုပ်၊ လိက်ဒုၚ်ကရုဏာ၊လိက်ပ္တိုန်ထ္ၜးကေုာံကိစ္စနာနာဏံ မံက်ကၠုၚ် အတိုၚ်သ္ဂုတ်သွာတ် ကၠတ်ထဝ်တွဵုရးမန်အလန်ဒုတိယ ကောံဓရီုပကတိ လၟေၚ်ပထမ တ္ၚဲတိယ ကဵု တ္ၚဲဆဋ္ဌမ မစကၠောန်လဝ် ပ္ဍဲစၟတ်တ္ၚဲ အေဗရဴ (၈) ဂှ်တုဲ ပံက်လဝ် နကဵုလၟိဟ်မၞိဟ် (၁၁) တလရ။
ပ္ဍဲ (၁၁) တလဂှ်ဝွံ ဥူအံၚ်ကျဝ်ဒူ နူဒေသမာဲ လၟိဟ် (၂) ပွိုၚ်သဓီုဂှ် ဥက္ကဌ၊ ကောန်ဂကောံဂှ် ဥူလှခါၚ် ညးရၚ်တၠုၚ် ဂဗုတ်ကၠတ်ထဝ် ပွိုၚ်ဍုၚ်မတ်မလီု၊ ဥူတေန်ညောအ် ညးရၚ်တၠုၚ်ဂဗုတ်အဆံၚ်သၠုၚ် ပွိုၚ်ဍုၚ်မတ်မလီု၊ ဥူကျဝ်မျဵုမေန် ပွိုၚ်ဍုၚ်ၜဳကလေၚ်၊ ဥူတိၚ်တေန် ညးရၚ်တၠုၚ်ဂဗုတ်ကၠတ်ထဝ် ပွိုၚ်ဍုၚ်မတ်မလီု၊ ဥူနဳဠာတ် ပွိုၚ်ဍုၚ်ကျာ်မြဟ်၊ ဥူသဝ်ဠေန်အံၚ် ပွိုၚ်ဍုၚ်တ္ကံခၟိုၚ်၊ မေန်လေန်ကိုဝ်ဝ် ညးရၚ်တၠုၚ်ဂဗုတ်ကၠတ်ထဝ် ပွိုၚ်ဍုၚ်မတ်မလီု၊ ဥူသဵုမဵုမျေအ် ညးရၚ်တၠုၚ်ဂဗုတ် အဆံၚ်သၠုၚ် ပွိုၚ်ဍုၚ်သဓီု၊ သ္ကိုပ်ဗိုလ်တိၚ်ဇြဝ် ညးစၞးဒပ်ပၞာန်၊ ဥူဇြဝ်ဝ်ထူ ဒေသမာဲလၟိဟ် (၂) ပွိုၚ်ဍုၚ်ပံၚ်ဂှ် ဒဒှ်ညးအုပ်ကာ ပါလုပ်ရၚ်တၠုၚ်မံၚ်ကမၠောန်အိုတ်ရ။
