ဂကောံပၠန်ဂတးရပ်လွဟ် ကောန်ဍုၚ်အရၚ်တံ သွက်ဂွံကၠောန်ကောံဓရီုမုက်ဇဳ (အလုံဂကောံဖအိုတ်) နွံဒၟံၚ်တုဲ အခါရအာမာၚ်ဂျာယာန်တေံမ္ဂး ညံၚ်ဟဂွံဒှ်အခက်ခုဲ ပ္ဍဲအကြာဂၠံၚ်ဍာန်ဂှ် အရီုဗၚ်ပရေၚ်အုပ်ဓုပ် (မံၚ်စံၚ် ဇူဒီု စသုၚ် ညံၚ်ဂွံစိုပ်ဒၞါဲရန်တၟံ) ၜိုတ်ဖန်ဂွံဂှ် ရီုဖန်ဒၟံၚ်ဖိုဟ်ရ သာ်ဝွံ ပ္ဍဲဂိတုဂျူလာၚ် ၂၃ သၞာံ ၂၀၁၆ ဂှ် ကမ္မေယှန် ပရၜေိုဟ်လလံ ပ္တိတ်လဝ်လိက်လလောၚ်တြးရ။
ပ္ဍဲလိက်လလောၚ်တြးဂှ်ဝွံ သၞာံ ၂၀၁၆၊ ဂိတုဂျူလာၚ် နူ ၂၆ ဒဵုကဵု ၂၉ ဂှ် ဂကောံကောန်ဍုၚ်အရၚ် မရပ်လွဟ်တံ ကၠောန်ကောံဓရီုမုက်ဇဳ ပ္ဍဲမာၚ်ဂျာယာန် တွဵုရးကချေၚ်ဂှ်ရောၚ် ဂွံတီကေတ်ရ သာ်ဝွံ ဂးလဝ်ပ္ဍဲလိက်လလောၚ်တြးဂှ်ရ။
လိက်လလောၚ်တြး နူကမ္မေယှန်ပရၜေိုဟ်လလံ (Copy)
“ညးတံလေဝ် နွံပၟိက်ကဵုပရၜေိုဟ်လလံကီုရေတှ် ၜိုတ်ဏံဒးဖန်ကဵုတွဵုရ၊ လၟုဟ်လေဝ် ၜိုတ်ရီုဗၚ်မာန်ဂှ် ညးတံရီုဗၚ်မံၚ်ပိုဲဖိုဟ်ရ၊ ဂကောံရပ်လွဟ်ကောန်ဍုၚ်အရၚ်ပိုဲ လၟုဟ် အာမာၚ်ဂျာယာန်တေံယျ” သာ်ဝွံ ဒံက်တာ နာဲယှိုဲတိၚ် ဖက်ဆောညးအုပ်ကာ ကမ္မတဳကောံဓရီုမုက်ဇဳ ဂှ် ဟီုရ။
သၟာၚ်နူဂှ်ပၠန် သွက်ဂကောံရပ်လွဟ်ကောန်ဍုၚ်အရၚ်တံ သ္ဂောံအာမာၚ်ဂျာယာန်တေံ က္လိတ်တ်က္လောတ်တ် ပြေပြေပြံၚ်ၚ်မာန်ဂှ်လေဝ် လ္ပာ်ကဏ္ဍပရေၚ်အုပ်ဓုပ် အရာထေက်ကဵုရီုဗၚ်ဂွံ ညံၚ်ဂွံရီုဗၚ်မာန်ဂှ်လေဝ် နကဵုကမ္မေယှန်ပရၜေိုဟ်လလံဏံ အာတ်မိက်ပ္တိုန်ထ္ၜးလဝ် ကုဌာနဗဟဵု ပရေၚ်ညဳသာသၟဟ်န်ကောန်ဂကူ ကေုာံ ပရၜေိုဟ်လလံ တုဲ ရေၚ်တၠုၚ်ဒၟံၚ်ပရေၚ်ကဵုအရီုဗၚ်ဖိုဟ် ရဴဝွံဓမံက်ထ္ၜးလဝ်ကီုရ။
ဂကောံရပ်လွဟ်ကောန်ဍုၚ်အရၚ်တံဝွံ ပ္ဍဲဂျူလာၚ် (၂၄) နူဍုၚ်မျေတ်ကျဳဏာ တိတ်အာမာၚ်ဂျာယာန်တေံ အိုတ်တုဲ ပ္ဍဲဂကောံဓရီုမုက်ဇဳဂှ်ဝွံ ဂကောံရပ်လွဟ် ထ္ပက်စၟတ်တဲ လိက်ကသုက် NCA (၈) ဂကောံကဵု ဂကောံရပ်လွဟ် ဟဂွံထ္ပက်စၟတ်တဲ ၁၃ ဂကောံ ပံၚ်သီုဖအိုတ် ဘိက်လဝ် အလုံ ၂၁ ဂကောံရ သာ်ဝွံ ဂွံတီကေတ် နူကမ္မတဳကၠောန်ဗဒှ် ပေါဲကောံဓရီုမုက်ဇဳ ဂှ်ရ။
သ္ဂးလဝ်ပ္ဍဲလိက်လလောၚ်တြးပၠန်ဂှ် ပ္ဍဲသ္ဘၚ်သဳကၠဳပရၜေိုဟ်လလံကၟိန်ဍုၚ် မဟီုဂးစ ပေန်လုၚ် ၂၁ ဗွဝ်ကၠံဂှ် ညးထေက်ကဵုပါလုပ်တံ ညံၚ်ဂွံပါလုပ်မာန် ရန်တၟံသာ်ဂှ်တုဲ ကေမၠာန် ဒးပဠေဝ်ပဠေတ်စနွံတံဂှ် နူကမ္မေယှန် ပရၜေိုဟ်လလံ ဖန်ဇန်ဒၟံၚ်ဖိုဟ်ရ။ ပ္ဍဲပရေၚ်ပဠေဝ်ပဠေတ်ဖန်ဇန်ဒၟံၚ်လၟုဟ်ဝွံ ကိစ္စသ္ၚဳဂၠိပ် မူပၞောန်ပရေၚ်ဍုၚ်ကွာန်လေဝ် ပါမံၚ်ကီုတုဲ အခါရက္လေၚ်သ္ၚဳဂၠိပ် မူပၞောန်ဂှ်မ္ဂး ဂကောံထ္ပက်စၟတ်တဲ NCA တုဲတံသၟးဟွံက ဂကောံရပ်လွဟ် ဟဂွံထ္ပက်စၟတ်တဲ NCA ဏီတံလေဝ် ညံၚ်ဂွံပါလုပ်မာန်ကီုဂှ် ကော်ဘိက်လဝ်တုဲဣရဂှ်လေဝ် ဓမံက်ထ္ၜးလဝ် ပ္ဍဲလိက်လလောၚ်တြးဂှ်ကီုရ။
ပ္ဍဲလိက်ကသုက်တုပ်စိုတ်ဒေါံပန်ပှော်အလုံမွဲဍုၚ် NCA ဂှ် တၚ်နၚ်ဂမၠိုၚ် သွက်ဂွံဓမံက်အဓိပ္ပါဲ (ပံက်အဓိပ္ပါဲ) လေဝ်နွံမံၚ်ဏီတုဲ သွက်ဂွံပ်ညဳပ်ညပ်သဳကၠဳကိစ္စဏံဂှ်လေဝ် ဖန်ဇန်ဒၟံၚ်ဖိုဟ် ကမ္မေယှန်ပရၜေိုဟ်လလံဂှ် ဂးရ။
ဂကောံရပ်လွဟ် ဟဂွံထ္ပက်စၟတ်တဲဏီတံ ညံၚ်သ္ဂောံပါလုပ်မာန်ကီု သဳကၠဳပ်ညဳပ်ညပ်ကၠုၚ် ပ္ဍဲအစဳဇန်ကေမၠာန် ဒ္စးဒုၚ်ပဠေဝ်ပဠေတ် သ္ဘၚ်သဳကၠဳပရၜေိုဟ်လလံဍုၚ် (ပေန်လုၚ် ၂၁ ဗွဝ်ကၠံ) ဂှ် ဂွံကၠုၚ်အခေါၚ်တုဲရ၊ ဒှ်သာ်ဂှ်ရ ပ္ဍဲသ္ဘၚ်သဳကၠဳပရၜေိုဟ်လလံဍုၚ် (ပေန်လုၚ် ၂၁ ဗွဝ်ကၠံ) မဒုၚ်သဇိုၚ်ကဵု NCA ဂှ် ဂကောံကောန်ဍုၚ်အရၚ် မရပ်လွဟ်ဖအိုတ်တံ ညံၚ်ဂွံတိုန်စိုပ်ဂြုဂြုဂြီုဂြီုမာန်ဂှ် ဂကောံဓရီုမုက်ဇဳ မာၚ်ဂျာယာန်ဏံ ရေၚ်တၠုၚ်ဏာဗ္စိုပ်ကဵု သွဟ်ခိုဟ်ဟ်မာန်ဏောၚ် စၟဳမၚ်ဒၟံၚ် သာ်ဝွံကမ္မေယှန်ပရၜေိုဟ်လလံ ပ္တိတ်လဝ်လလောၚ်ရ။
