သွက်ဂွံပါလုပ် ပ္ဍဲပရေၚ်ၜိုဟ်လလံဍုၚ်ကီုဂှ် ကမ္မယှေန်ပရေၚ်ၜိုဟ်လလံ အလဵုအသဳကဵု က္ဍိုပ်သ္ကိုပ်မဟာမိတ်ပိဂကောံ မတွံဂး ရခေၚ် AA၊ ပလံၚ် TNLA၊ ကဝ်က MNDAA တံ ပ္ဍဲဂိတုအဝ်ဂါတ် (၉) ၜိုန်ဆဵုဂဗသဳကၠဳလဝ် ပ္ဍဲဍုၚ်မာၚ်ဠာ ရးသေံသ္ကုတ်ဗၟံက်ဂှ်ကီုလေဝ် စပ်ကဵု ဂလာန်မ္ဂး “ဂၠံၚ်တရဴရပ်လွဟ်ကဵုပဋိပက္ခရပ်လွဟ်” ဂှ်တုဲ ပ္ညဳပ္ညပ်သဳကၠဳညးသ္ကံဟွံ ရဴဝွံ ဂွံတီကေတ်ရ။

မဟာမိတ်ပိဂကောံ (AA ၊TNLA ၊ MNDAA) တံ မိက်ဂွံပါလုပ် ပ္ဍဲကမၠောန်ပရေၚ်ၜိုဟ်လလံ အစဳဇန်ဒပ်ပၞာန်ဂှ်ကီုမ္ဂး လိက်လလောၚ်တြး ဒဒှ်ရ“သၠးကၠေံဂၠံၚ်တရဴရပ်လွဟ်ပေၚ်ၚ်၊ဆန္ဒမိက်ဂွံကဵုၜိုဟ်လလံ နွံပေၚ်ၚ်ရဏောၚ်”ဂှ် ဒးလလောၚ်ကဵုဏောၚ် ညးစၞးအလဵုအသဳ သဳကၠဳပ္တိုန်ထ္ၜးကၠုၚ်နွံ သ္ကိုပ်ဗိုလ်ဇၞော် တာဖုန်ကျဝ် ညးအုပ်ကာနာနာ TNLA ဟီုရ။

တာအိုက်ဖုန် ဥက္ကဌ TNLA အဃောဆဵုကဵုအ္စာပရိုၚ်ဂမၠိုၚ် ပ္ဍဲမာၚ်ဂျာယာန် (TNLA)

ဆ္ဂး က္ဍိုပ်သ္ကိုပ်မဟာမိတ်ပိဂကောံတံလေဝ် အတိုၚ်ဂလာန်ဂှ် ပ္တိတ်ကဵုဟွံမာန် နကဵုဂလာန်မ္ဂး “သွက်ဂွံလလံကၠေံ ပဋိပက္ခလွဟ် လၟိတ်ကာလဂှ် ဆန္ဒနွံပေၚ်ၚ်ရ” ဂှ်ဟေၚ် လလောၚ်ကဵုမာန်ဏောၚ် သဳကၠဳပ္တိုန်ထ္ၜးလဝ်သာ်ဂှ်တုဲ ဟွံက္လိဂွံ ပရေၚ်တုပ်စိုတ်ရ သ္ကိုပ်ဗိုလ်ဇၞော် တာဖုန်ကျဝ် ဂး။

“လ္တူအရေဝ်ၜါပါၚ်မ္ဂး ဂၠံၚ်တရဴရပ်လွဟ် ကဵု ပဋိပက္ခရပ်လွဟ် ဂှ် လစွံစိုတ်ဟွံတုပ်ညးသ္ကံရ။ သွာၚ်ညးကဵုညး ဒးက္လေၚ်ပ္တိုန်ထ္ၜးကဵု က္ဍိုပ်သ္ကိုပ်အဆံၚ်လ္တူတံပၠန်ဏောၚ်။ အတိုၚ်ဍေံတံဟီု ပိုဲပိဂကောံ လလောၚ်ဟွံမာန်ပုဟ်။ ဍေံတံလေဝ် ဗဗွဲဗက်ကဵုဟွံမာန်တှေ် ဍေံတံ က္လေၚ်ပ္တိုန်ထ္ၜးကဵုညးဇၞော်ဍေံတံပၠန်ဏောၚ်။ ပိုဲလေဝ် ဂကောံမိတ်ပိုဲကဵုပိုဲ သဳကၠဳညးသ္ကံပၠန်ဏောၚ်”ဂှ်လေဝ် သ္ကိုပ်ဗိုလ်ဇၞော် တာဖုန်ကျဝ် ဂးရ။

ပ္ဍဲပေါဲသဳကၠဳဂှ်ဝွံ နူကမ္မယှေန်ၜိုဟ်လလံအလဵုသသဳဂှ် ဒုဥက္ကဌ ဥူတိၚ်ဇြဝ်၊ ညးအုပ်ကာ ဒုသ္ကိုပ်ပၞာန်ဇၞော် ဥူခေန်ဇြဝ်ဥူ (ဇူ)၊ ဥူအံၚ်ကျဳ ဝန်ဇၞော်ကၟိန်ဍုၚ် (ဇူ) မဒှ်ညးက္ဍိုပ်ဂကောံ မကဵုကသပ်ကုကမ္မယှေန် တံတိုန်စိုပ်တုဲ လ္ပာ်မဟာမိတ် ဂကောံရပ်လွဟ် ကောန်ဍုၚ်အရၚ် ပိဂကောံဂှ် ဂအုပ်က္ဍိုက်ပ်ပၞာန်ဒုသ္ကိုပ်ပၞာန် ထောန်မျာတ်နာၚ် ဥက္ကဌ ဂကောံ AA ၊ ဥူထောန်မျာတ်လေန် နူ MNDAA၊ တာအိုက်ဖုန် ဥက္ကဌ TNLA တံ တိုန်စိုပ်လဝ်ရ။

ပ္ဍဲပေါဲသဳကၠဳဂှ်ဝွံ စပ်ကဵုပရေၚ်ပဠေဝ်ပဠေတ်မံၚ် သွက်ဂွံကၠောန်သ္ဘၚ်သဳကၠဳပေန်လုၚ် ၂၁ ဗွဝ်ကၠံဂှ်ကီု သွက်ဂွံသ္ၚဳဂၠိပ် မူပၞောန် ပေါဲသဳကၠဳပရေၚ်ဍုၚ်ကွာန်ဂှ်ကီု ညးစၞးအလဵုအသဳ ဟီုသောၚ်ထ္ၜးလဝ်ကီု ဂးရ။

အဃောဂိတုဂျောန်တေံ ညးစၞးအလဵုအသဳကဵု ညးစၞးမဟာမိတ်ပိဂကောံဏံ ဆဵုဂဗသဳကၠဳကၠုၚ်လဝ်ဗွဲပလးဂှ် “ညံၚ်ဂွံပ္တိတ်ကဵုလိက်လလောၚ်တြး ဒဒှ်ရဒုၚ်ဂုန်ဝန်ကျဝ် ကုညးဍုၚ်ကွာန် ကေုာံ သွက်ဂွံသၠးကၠေံ ဂၠံၚ်တရဴရပ်လွဟ်”ဂှ် ညးစၞးအလဵုအသဳ ဟီုဖအောဝ်ကၠုၚ်လဝ် ဂွံတီကေတ်ရ။