ရဲဒပ်ဗော်ဍုၚ်မန်တၟိ ကေုာံ ရဲဒပ်ကေအေန်ယူ မဖျေံလဝ်သဇိုၚ် ပ္ဍဲပွိုၚ်ဍုၚ်ဍာ်ဗု ရးတနၚ်သဳတံ က္တဵုဒှ်ပရေၚ်ခ္ဍိုၚ်ပန်ညးသ္ကံ ပ္ဍဲသေပ်တေမ်ဗာ (၈) ပယာံတ္ၚဲစေၚ်ဂှ် ဟိုတ်နူမၞုံကဵုတၚ်ဍိုန်လျ ပ္ဍဲအရာပိုၚ်ခြာတိဍာ်ကဵု ပရေၚ်ဆက်စၠောံရောၚ် ညးလျိုၚ် ရုၚ်ဆက်ဆောံ ခရိုၚ်ဗိက်ထဝါဲ ကေအေန်ယူ ပဒဵုဝေန်ခါၚ် ဟီုကဵုဌာန်ပရိုၚ်မန် ပ္ဍဲဂိတုသေပ်တေမ်ဗါ ၉ ဂှ်ရ။
“ကိစ္စဏံ အခါရ ပိုဲက္လေၚ်သ္ၚဳဂၠိပ်ရံၚ်တှေ် အဓိက တၚ်ဍိုန်လျဍေံမွဲဂှ် ဗွဲတၟေၚ်ပ္ဍဲပရေၚ်ပိုၚ်ခြာတိဍာ်ဂှ် ချိုတ်တ်ပၠိုတ်တ် မုဟွံမွဲပုဟ်၊ မွဲပၠန်ဂှ် သွက်ဂွံဆက်စၠောံ ဆက်ဆောံညးသ္ကံဂှ်လေဝ် ဍိုန်လျမံၚ်တုဲ က္တဵုဒှ်ကၠုၚ်ဗီုဏံ ဒးဘဲဝပ်ကီုဟာဂှ် ဟွံမိၚ်ဏီ ဍေံတံ ညးမွဲဟွံဒးဘဲပုဟ်ဂှ် ဟီုကၠုၚ်နွံ” သာ်ဝွံ ပဒဵုဝေန်ခါၚ်ဂှ် ဂးရ။
ညံၚ်ဟဂွံဒှ်ပဋိပက္ခလွဟ်ဂှ် ညးလျိုၚ်အဆံၚ်ခရိုၚ် KNU ကဵု NMSP တံ ဆဵုဂဗဗွဲပလး ပ္ဍဲတ္ၚဲ ၀၉-၉-၂၀၁၆ (Yekha Mon Facebook)
“ပန်တုဲတှေ်တုဲအာရ မုလေဝ်ဟွံဆက်ဒှ်ရ၊ ကဵုညးတာလျိုၚ်ဒေသ (ဗော်ဍုၚ်မန်တၟိ) ဂှ်လေဝ် ဂွံအဆက်ဣရ၊ ဗော်ဍုၚ်မန် တၟိလေဝ် ညးတံဘိက်လဝ် လံမံၚ်ရ သွက်ဂွံဆဵုညးသ္ကံဂှ်လေဝ် ဒုၚ်စဳရေၚ်လဝ်ကဵု အဆံၚ်လ္တူတေံ တုဲမံၚ်ကီုရ ဆ္ဂး မုပရိုၚ် ဟွံက္လေၚ်ဏီ” ပဒဵုဝေန်ခါၚ် ဟီုရ။
ပရေၚ်ခ္ဍိုၚ်ပန်ညးသ္ကံ ဗၞတ်ပွိုၚ် ၄၀ မိဏေတ် က္တဵုဒှ်အာ ပ္ဍဲဇရေၚ်ကွာန်ကြုၚ်ဗ္တဳ မလုပ်အဝေါၚ် ဂအုံကွာန်ဌာန်ဇၞူ ပွိုၚ်ဍုၚ်ပါ် ကလိၚ်အံၚ် ပွိုၚ်ဍုၚ်ဍာ်ဗုဂှ်ဝွံ သ္ၚိညးဇၞော်ကွာန် ကဵု သ္ၚိတၞဟ်ဟ်လီုလာ်အာညိညနွံရောၚ် ဂွံတီကေတ်ရ။
“ပြဟ်ဟ်ဏံ မုလေဝ် ဟွံတၟေၚ်ဏီ၊ လ္ပာ်ဍေံတံလေဝ် ကၠေံအာနူကွာန်အိုတ်ရ၊ ရဲပိုဲတံဂှ်တှေ် ကဵုမံၚ်ဒၟံၚ်ပ္ဍဲဗ္ဒိုပ်ရ” သာ်ဝွံ ကေၚ်ကာခရိုၚ်ထဝါဲ မွဲတၠ (ဗော်ဍုၚ်မန်တၟိ) ဟီုလဝ်ကဵုဌာန်ပရိုၚ်မန် ပ္ဍဲသေပ်တေမ်ဗါ ၉ ဂှ်ရ။
ဆေၚ်စပ်ကဵုကိစ္စဒှ်အာဝွံတုဲ ညးတာလျိုၚ်ခရိုၚ်ကဵုခရိုၚ်တံ သွက်ဂွံဆဵုဂဗသဳကၠဳညးသ္ကံမာန် နူကဵုခရိုၚ်ထဝါဲဗော်ဍုၚ်မန်တၟိ ပလံၚ်ဗ္စိုပ်လိက်လဝ်ကု ခရိုၚ်ဗိက်ထဝဲါ ဗော်ကေအေန်ယူကီု၊ နူကဵုညးလျိုၚ်ရုၚ်ဆက်ဆောံ ခရိုၚ်ဗိက်ထဝါဲကေအေန်ယူ မွဲ တဆံၚ် ဆက်ဟီုလဝ် နကဵုဖုၚ်နွံကီုလေဝ် စဵုကဵုအခိၚ်တ္ၚဲဏံ မုပရိုၚ်ဟွံက္လေၚ်ကၠုၚ်ဏီရောၚ် ညးတာလျိုၚ်ကေၚ်ကာ ခရိုၚ် ထဝဲါ ဗော်ဍုၚ်မန်တၟိ ဆက်ဟီုလဝ်ရ။
ဒေသ နွံဗၟံက်ကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် ဒှ်တိဍာ်နွံကဵုသြဇာ ခရိုၚ်ထဝါဲ (ဗော်ဍုၚ်မန်တၟိ) တုဲ ကေုာံတိဍာ် ခရိုၚ်ဗိက်ထဝါဲ KNU ဂှ်လေဝ် ဆက်စပ်ဒၟံၚ်ကီုရ။
ဒေသဗၟံက်ကွာန်ဌာန်ဇၞူဂှ်ဝွံ အတိုၚ် Gentlemen Agreement အလဵုအသဳနဝတ ကဵု ဗော်ဍုၚ်မန်တၟိတံ တုပ်စိုတ် ပ္ဍဲပရေၚ် ဒေါံပန်ပှော်အလန်ပထမ သၞာံ (၁၉၉၅) တေံဂှ် သ္ပသမ္တီ နဒဒှ် ဒေသဒ္တန်ဒပ် ဗော်ဍုၚ်မန်တၟိတုဲ ပွမပ္တန်ကွာန်တၟိကီု ပွမဗဒှ် ကၠအ်သွဝ်ကီု ကမၠောန်ဖေါအ်ဗြေဝ် ဒေသကီု ကၠောန်ကၠုၚ်လဝ်ဂှ် ဂွံဆဵုကေတ်ရ။
0 Comments