ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရေဝ်ဒဳမဝ်ကရေဇြဳမ္ဂး ညံၚ်ဂွံနွံကဵုအရာတုပ်သၟဟ် အလုံကောန်ဍုၚ်အရၚ် အိုဿီုဂှ် ယၟုကၟိန်ဍုၚ်လေဝ် ညံၚ်ဂွံသ္ပစၞး မခ္ၜံအလုံဂကူဖအိုတ်မာန်ဂှ် ဒးက္လေၚ်ကဵုယၟုတၟိရောၚ် နကဵုဒပ်ပံၚ်ကောံ UNFC နွံလညာတ်သာ်ဂှ်တုဲ နာဲဟံသာ(ဒုဥက္ကဌဗော်ဍုၚ်မန်တၟိ) မဒှ်ဒုဥက္ကဌဂကောံ UNFC ပ္တိုန်ထ္ၜးဏာ လညာတ် ပ္ဍဲအသေအဟာန် သ္ဘၚ်သဳကၠဳပရေၚ်ၜိုဟ်လလံဍုၚ် (ပေန်လုၚ် ၂၁ ဗွဝ်ကၠံ) အလန်ပထမ ဂှ်ရ။

လိက်စံၚ် ပ္တိုန်ထ္ၜးလညာတ် ဒပ်ပံၚ်ကောံ UNFC ဂှ် ပါ်လဝ် ပိသ္ကုတ်တုဲ ပ္ဍဲသ္ဘၚ်သဳကၠဳပေန်လုၚ် ၂၁ အလန်ပထမ တ္ၚဲတတိယ (ဂိတုသေပ်တေမ်ဗာ ၂) မကၠောန်ကၠုၚ်လဝ် ပ္ဍဲ (မြန်မာအပြည်ပြည်ဆိုၚ်ရာ ကွန်ဗၚ်းရှၚ်းစၚ်တာ) နေပျဳဒဝ် ဂှ် နာဲဟံသာ ပ္တိုန်ထ္ၜးဏာ သ္ကုတ်ပထမ ဂးရ။

“ဗမာ ကဵု မျာန်မာ တုပ်ပ်ရဂှ် တီမံၚ်သီုညးဖၟိုတ်ရ၊ ဗမာ ဂှ် ဒှ်ဝေါဟာ စကာကၠုၚ်တြေံတြေံတေံတုဲ ဗွဲကြဴဏံ စကာကၠုၚ် ဝေါဟာမ္ဂး မျာန်မာရ” သာ်ဝွံ အဟိန်ညးဗှ်ဏာ လိက်စံၚ်ဂှ် ပြံက်ဟီုစုတ် ဂလာန်ဏံရ။

နကဵုဝေါဟာမ္ဂး မျာန်မာ ဒှ်ဒှ်၊ ဗမာ ဒှ်ဒှ်၊ နကဵုဘာသာအၚ်္ဂလိက် Burma ဒှ်ဒှ် ၊ Myanmar ဒှ်ဒှ် ရပ်စပ်စကာကၠုၚ် သာ်ဏံဂှ် ပၞောဝ်ကဵုကောန်ဂကူဂမၠိုၚ် တန်တဴကၠုၚ် အပ္ဍဲကၟိန်ဏံဂှ်မ္ဂး ယၟုဏံဂှ် ဟွံဒှ်သွက်အလုံကောန်ဂကူ အိုဿီုတုဲ သရုပ်ဍေံမံက် သွက်‘ဗမာ’ မွဲဂကူဟေၚ်ရဂှ်လေဝ် ဗှ်ဏာလဝ် ဂွံမိၚ်ကေတ်ရ။

ဆ္ဂး စပ်ကဵုလညာတ်လ္ၚဵုလ္ၚဵု ကောန်ဍုၚ်အရၚ်တံ ပ္တိုန်ထ္ၜးကၠုၚ်လဝ်ဂှ်တုဲ ဥူမျေအ်သဵု (ဒုသ္ကိုပ်ပၞာန်ဇၞော်တြေံ-စဇၞူ) ကေၚ်ကာဗဟဵုဗော် ကျ/ဖေါအ် သ္ဂးလဝ်ဂှ် “ ဣဂှ်ဂှ် ဒှ်ဟွံမာန်က္ဍၚ်ပုဟ်၊ အရာဒှ်ဟွံမာန်ဂှ် အရာလ္ၚဵုလ္ၚဵု ပ္ဍဲဒၞါဲဏံ ဍေံနွံၜါသ္ကုတ်။ ဣဏံဂှ် ဒှ်သ္ဘၚ်သဳကၠဳပေန်လုၚ် ၂၁ ဗွဝ်ကၠံတှေ် အခါပ္တိုန်ထ္ၜးလညာတ်ဂှ် လညာတ်ညးတံ နွံဗီုလဵုဂှ် ဟီုဂွံ ပ္တိုန်ထ္ၜးဂွံ၊ ဆ္ဂး ပ္ဍဲညးတံ ဟီုကၠုၚ်ဂှ် အရာလ္ၚဵုဂှ် ဒှ်မာန်၊ ဒှ်ဟွံမာန် ဟီုဂှ် လက္ကရဴတေံ မွဲဝါပၠန်တှေ် ဂွံတီကၠးဏောၚ်” သာ်ဝွံ ဟီုဂးလဝ်ကဵု ရဲပရိုၚ်ဂမၠိုၚ်ရ။

သ္ဘၚ်သဳကၠဳ တ္ၚဲတတိယဂှ် ဥူသုဝေ (ဗော်ပရေၚ်ဍုၚ်ကွာန်)၊ ဒံက်တာဝေန်မျာတ်အေ (အလဵုအသဳ)၊ ဒုသ္ကိုပ်ပၞာန်ဇၞော် တေန်မိုၚ်ဝေန် (ဒပ်ပၞာန်)၊ စာပ်ဘာၚ်ခေ (ဂကောံရပ်လွဟ် ကောန်ဍုၚ်အရၚ်)၊ ဥူအေန်ထုန်ခါနဝ်သာမ်(ကၠတ်ထဝ်) တံ တိုန်ဒှ်ဂကောံသဘာပတိတုဲ ဥူညာဏ်ထောန်၊ နဝ်ယှဵုအိအိထောန်၊ သာၚ်ယျေဝ်ကျဝ်သွာမျေအ် တံ နဒဒှ်ညးရေၚ်တၠုၚ်ဖဵု ကေတ်ကၠုၚ်တာလျိုၚ်တုဲ ပူဂဵု ၃၃ တၠနူဂကောံနာနာ မဂွံအခေါၚ်ပ္တိုန်ထ္ၜးဂှ်လေဝ် ပ္တိုန်ထ္ၜးကၠုၚ် လညာတ် ဂကောံညးကဵုညး အိုတ်ရ။

လိက်စံၚ် ဒပ်ပံၚ်ကောံ UNFC ဂှ် ပါ်လဝ်ပိသ္ကုတ်တုဲ နာဲဟံသာ (NMSP)၊ ခူဥူရေဝ်(KNPP)၊ ဥူထောန်ဇြဝ် (ANC) တံ ပ္တိုန်ထ္ၜးကၠုၚ် အခန်ညးကဵုညးရ။

ပ္ဍဲဂကောံ UNFC ဂှ် ဂကောံ (၇) ဂကောံ မတွံဂး ဂကောံပရေၚ်ဗၠးၜးကချေၚ် KIO၊ ဗော်ဍုၚ်မန်တၟိ NMSP ၊ ဗော်ပရေၚ်တောတက် ဂကူကရေၚ်ဍာဲ KNPP ၊ကံၚ်ဇြဳ ကောန်ဂကူရခေၚ် ANC ၊ ဗော်ပရေၚ်တော တက်ရးသေံ SSPP/SSA ၊ ဂကောံ ကောန်ဂကူဝ WNO ၊ ဂကောံဠာဟူဒဳမဝ်ကရေတ်တေတ် LDU တံ တၞီလုပ်လၟိဟ်အိုတ်ရ။