ပ္ဍဲဌာန်တရဴတိုန်ကျာ်ဣသိယဵု (ဍုၚ်ကျာ်ထဝ်၊ တွဵုရးမန်) ဂှ် ဆေၚ်ဖျာကေုာံ ဌာနဒုၚ်ဒါန်သ္ၚိဗယိတံ ယဝ်သ္ပပွပလာပ်စိုတ် ညးတိုန်လ္ၚောဝ်ကျာ်တံမ္ဂး ကေတ်အာအရေဝ် နပွမကၟာတ်ထောံဗွဲယာယဳရောၚ် ရဴဝွံ ဂွံတီကေတ် နူဂကောံဂေါပကကျာ်ရ။
စပ်ကဵုဆေၚ်ဖျာ ကေုာံ ဌာနဒုၚ်ဒါန်သ္ၚိဗယိတံဂှ်တုဲ လက်ထက်ဂကောံဂေါပကတၟိဏံ ပ္တိတ်ကဵုလဝ်စေဝ်ပၞောန် နွံဒၟံၚ်တုဲ ယဝ်ဟွံဒ္ဂေတ်ဗက် အတိုၚ်စေဝ်ပၞောန်ဂှ်မ္ဂး ဗွဲကိုပ်ကၠာ ကော်ကဵုသတိ၊ အလန်ဒုတိယ ဆက်ဒှ်ဒၟံၚ်ဏီမ္ဂး ကဵုဒုဟ်ကၟာတ်ထောံ ဗွဲယာယဳရောၚ်။
ဗီုစေတဳကျာ်ဣသိယဵု (Facebook)
ပ္ဍဲလက်ထက်ဂေါပကတၟိဏံ သွက်ရဲအာလ္ၚောဝ်ကျာ်တံ သ္ဂောံအာလ္ၚောဝ်ၜိုဟ်ဟ် ညံၚ်ဂွိုအ်ဒှ် ပရေၚ်ပလာပ်ပထုဲစိုတ်ဂှ် ဖန်ဇန်လဝ်ကီုရ၊ ညံၚ်ဂွံစှေ်ဗီု ပြေပြံၚ်အလုံညးဖအိုတ်ဂှ် ကေတ်အခိၚ်တုဲ ဒးပလေဝ်အာရောၚ် ဒံက်တာအေဇြာန် ဂးရ။
ဂေါပကတၟိဏံ ဌာနဇၞော်ဒုၚ်ဒါန်သွက်ကျာ်မွဲဂှ်ရ ရပ်လဝ်တုဲ ပၞောဝ်ကဵုသ္ၚိဗယိ (၉) မ နွံပ္ဍဲပွဳဗွိုၚ်ဒဵုကျာ်ဂှ် သ္ၚိဗယိမိနန်ဂြၚ်ထဝ် (ရေႊနန်းကျၚ်) ကဵု သ္ၚိဗယိအပါဇၞော်ဒဵုကျာ်သိယဵု (ကျိုက်ထီးရိုးဘိုဘိုကြီး) ဂှ် ကဵုလဝ်ကာန်ထရာ် ကု (ရိုးရိုးလေး) ရောၚ် သာ်ဝွံ (ဦးစိန်းမြၚ့်) နူဂကောံဂေါပကကျာ် ဟီုရ။
ရဲလ္ၚောဝ်ကျာ်တံ ညံၚ်ဂွံတိုန်အာ နကဵုစိုတ်လျုၚ်ၚ်မာန် သၟးဇ္ၚးအာခၟိက် သီုစွံအာဒၞာဲထောံခၟိက်ကီုရောၚ်တုဲ ဗလးပ္ဍဲဝၚ်ကျာ်တေံ သွက်ဂွံအးၚးလၟိုန်ဂှ်လေဝ် ကော်လဝ် ညးဒုၚ်ကာတၟိတၟိ အရၚ်ဂွံသၟးဇ္ၚးတံကီု ဂွံတီကေတ် နူဂကောံဂေါပကဂှ်ကီုရ။
စေတဳကျာ်ဣသိယဵု ဓါတ်သော်ဂမျိုၚ်ဝွံ ဒှ်ဒ္တန်အာဲကၟာဲယေန်သၞာၚ်တြေံတြဟ်မန်မွဲတုဲ မွဲမွဲသၞာံ ကၟုဲလ္ၚောဝ်ကျာ် သီုအပ္ဍဲဍုၚ် သီုနူဍုၚ်မ္ၚးတံ ကၠုၚ်စိုပ် ၜိုတ် ၂ ပြကောဋိကိုဋ်ပြၚ်ရဂှ်လေဝ် ဂွံတီလဝ် အတိုၚ်စရၚ်ကၟုဲလ္ၚောဝ်ကျာ် ဌာနဟဝ်တေဝ်ကဵုပရေၚ်အာတရဴ ရုၚ်ပါ်မတ်မလီုရ။
ပၞောဝ်ကမၠောန်အာတရဴဂမၠိုၚ် ပ္ဍဲတွဵုရးဍုၚ်မန်ဏံ စေတဳကျာ်ဣသိယဵုဂှ် ဒှ်ဌာန်ဒယှ်ပြာထာအိုတ်မွဲတုဲ နွံကဵု ပွသြန်လုပ်ဂၠိုၚ်အိုတ်ကီု ဂွံတီကေတ်ရ။
0 Comments