နူကဵုလ္ပာ်ဒပ်ပၞာန်အလဵုအသဳတံ ဍိုက်ထ္ပက်ပၞာန်ဂှ် ဗီုဂွံဒေါံ ညိလေဝ်ဟွံမွဲဏီဂှ်ရ ဒပ်ပံၚ်ကောံမဟာမိတ်သ္ကုတ်သၟဝ်ကျာ မတွံဂး ဒပ်ပၞာန်ဗၠးၜးကချေၚ် KIA၊ ဒပ်ပၞာန်ဗၠးၜးတအာၚ် (ပလံၚ်) TNLA ၊ ဒပ်ကဝ်က MNDAA ကေုာံ ဒပ်ပၞာန်ရခေၚ် AA တံ ပပ္တံနူဂိတုနဝ်ဝေမ်ဗာ ၂၀ တုဲဂှ် ပံၚ်တောဲကလေၚ်ထ္ပက်ပၞာန်ကီုရ သာ်ဝွံ သ္ကိုပ်ဗိုလ်ဇၞော် တာဖုၚ်ကျဝ် ညးအုပ်ကာနာနာ TNLA ဟီုရ။

“လ္ပာ်ဒပ်ကောန်ဍုၚ်အရၚ်ပိုဲဏံ TNLA ပိုဲကီု ၊ ဒပ် KIA ကီု ဒးထ္ပက်ပၞာန်ကီုဏောၚ်ဂးတုဲ ကိစ္စပံၚ်တောဲ ထ္ပက်ပၞာန်ဏံ ဒှ်ကၠုၚ်။ လၟုဟ်ဏံ အလဵုအသဳလေဝ်ကီု ဒပ်ပၞာန်ဗၟာဂှ်ကီု တၠုၚ်လအာ ဗီုဂွံဒေါံပၞာန် ညိလေဝ်ဟွံမွဲရ၊ ကလောန်ထ္ပက်ပၞာန်ရ ကၠောန်သ္ကာတ်တိုန်ရိုဟ်တ္ၚဲတှေ် သွက်ဂွံကလေၚ်ပသောၚ်ကိစ္စဏံ မဟာမိတ်ပိုဲတံ ပံၚ်တောဲမွဲစွံတုဲ ဒးကလေၚ်ချဳပရေၚ် ထ္ပက်ပၞာန်ဏံ” သ္ကိုပ်ဗိုလ်ဇၞော်တာဖုၚ်ကျဝ် ဟီုကဵုဌာန်ပရိုၚ်မန်ရ။

ဒပ်ပံၚ်ကောံမဟာမိတ်သၟဝ်ကျာဝွံ ပ္ဍဲဂိတုနဝ်ဝေမ်ဗာ ၂၀ အခိၚ်ဗ္တံၜိုတ် (၂) နာဍဳ အခိၚ်မွဲဒမြိပ်ဓဝ် လုပ်ဗ္တိုက်ဗ္ဒိုပ်ဒပ်ဗၟာ ၁၁ ဒၞါဲ ဒေသတွဵုရးသေံသၟဝ်ကျာ မပ္တံ မုၚ်ကိုဝ်၊ မာန်တုၚ်၊ ကောတ်ခါၚ်၊ သၞေဟ်ကၚ်ဗၞိက် ၁၀၅ တိုၚ် မူဇြေဝ်၊ ပါန်သာၚ် (ကျူကုက်) တံရ။

“ နဝ်ဝေမ်ဗာ ၂၁ ဖါနူဂယးဂှ်လေဝ် ပေါဲဗ္တိုက်ဒှ်မံၚ်ဖိုဟ်။ လ္ပာ်မုၚ်ကိုဝ်ဂှ်လေဝ် မဟာမိတ်ပိုဲ MNDAA ၊ ဂကောံမဟာမိတ်ပိုဲကဵု ဒပ်ပၞာန်ဗၟာ ဒှ်ဒၟံၚ်ပေါဲဗ္တိုက်၊ လ္ပာ်ဏါပ်ခါမ်တေံလေဝ် ဒှ်။လ္ပာ် မာန်တုၚ်၊ ကောတ်ခါၚ်ဏံလေဝ် ပေါဲဗ္တိုက် ဆက်ဒၟံၚ်ဖိုဟ်။ ပေါဲဗ္တိုက်သ္ကာတ်တ်ဂှ် ပြဟ်ဟ်ဏံ လ္ပာ်ဒေသမုၚ်ကိုဝ်တေံ သ္ကာတ်မြဟ်မံၚ်၊ ပ္ဍဲဒစပ် မာန်တုၚ် ကဵု ကောတ်ခါၚ်ဂှ်လေဝ် သ္ကာတ်မြဟ်မံၚ်” သ္ကိုပ်ဗိုလ်ဇၞော် တာဖုၚ်ကျဝ် ဂးရ။

ဂကောံမဟာမိတ်သၟဝ်ကျာတံ ဖန်ဇန်ပၞာန်ထ္ပက်ဏံဂှ် မိက်ဂွံကဵုဒေါံတှေ် တန်တဴကဵု လစွံစိုတ် အလဵုအသဳကဵု ဒပ်ပၞာန်အလဵုအသဳရ။ ကလေၚ်ဆဵုဂဗသဳကၠဳညးသ္ကံတုဲ လလောၚ်ဒေါံပန်ပှော်သီုၜါလ္ပာ်ရောၚ်မ္ဂး ပေါဲဗ္တိုက်ဏံ ဒေါံမာန်ရောၚ် သ္ကိုပ်ဗိုလ်ဇၞော် တာဘုၚ်ကျဝ် ဂးရ။

ပ္ဍဲအခိၚ်မွဲဒမြိပ်ဓဝ် ဟိုတ်နူလုပ်ပန် ဗ္ဒိုပ်ဒပ်ပၞာန် သၞေဟ်ကၚ်ဒေသဆက်စၠောံဗၞိက် ၁၀၅ တိုၚ်မူဇြေဝ်၊ ကောတ်ခါၚ်၊ မုၚ်ကိုဝ် ကေုာံ သီုတာဲကၚ်ဗၠာဲသၟိၚ်တံဂှ်ရ ဒဒန်ဏာမ်ပံၚ်၊ ဒဒန်သိန္နဳတံ လီုအာတုဲ ဗၠာဲသၟိၚ်ကီု ကောန်ပၞာန်ကီု ချိုတ် ၉ တၠတုဲ ဒးဘဲဝပ် ၂၉ တၠရ သာ်ဝွံ ပ္ဍဲတ္ၚဲနဝ်ဝေမ်ဗာ ၂၀ ဂှ် နူအလဵုသဳ လလောၚ်လဝ်ပရိုၚ်ရ။

ဒပ်ပံၚ်ကောံမဟာမိတ်သၟဝ်ကျာတံ ထ္ပက်ပၞာန်ဗီုဏံမ္ဂး လ္ပာ်ဒပ်ပၞာန် ကေတ်တၚ်ထ္ၜးဟိုတ်ဏံတုဲ ဖေက်ဗပေၚ်ဒြဟတ်ဒပ်ပၠန်ဂှ် ဒှ်ဓဝိၚ်ကွေံကွေံ သာ်ဝွံ ဒုသ္ကိုပ်ဗိုလ်ဇၞော် သာၚ်ၚေန် နွံကဵုအခေါၚ်ဟီု နူကံၚ်ဇြဳ ကလေၚ်ပ္တန်ရးသေံ RCSS/SSA ဟီုရ။

ပ္ဍဲသၞာံ ၂၀၁၅ တေံ ဒပ် MNDAA အဃောလုပ်ပန် ဒေသလံက်ကာၚ် တွဵုရးသၟဝ်ကျာတေံဂှ်လေဝ် ဒပ် AA ကဵု ဒပ် TNLA တံ ဟိုတ်နူဗိုၚ်ဗ္တိုက်ကီုဂှ်ရ နူဒပ်ပၞာန် ပ္တိတ် အမိၚ်ပရေၚ်အုပ်ဓုပ်ပၞာန်တုဲ ဂကောံရပ်လွဟ် ကောန်ဍုၚ်အရၚ် ပိဂကောံဏံ ဒှ်ရဲတက်ပလီုအဝဵုကၟိန်ဍုၚ်ရောၚ်ဂးတုဲ ဟွံကဵုလုပ် ပ္ဍဲအဝေါၚ်ကမၠောန် ပရေၚ်ၜိုဟ်လလံဍုၚ်ရ။