ကိစ္စလိက်တေၚ် ဆေၚ်ကဵုပရေၚ်သ္ကိုပ်ဝန်ဇၞော်တွဵုရးဍုၚ်မန်ဂှ် အကြာမွဲၜါတ္ၚဲဏံ စှေ်လ္ၚတ်စၟဳစၟတ်အာရောၚ် ဥူညာဏ်ဝေန် (ကေၚ်ကာဗဟဵု ဗော်အေန်အေဝ်ဒဳ) ညးက္ဍိုပ်ဂကောံ စှေ်လ္ၚတ်စၟဳစၟတ် ဟီုရ။

ကိစ္စလိက်တေၚ် ဆေၚ်ကဵုပရေၚ်သ္ကိုပ်ဝန်ဇၞော်တွဵုရးဍုၚ်မန် ကဵု ဥက္ကဌ- ဒုဥက္ကဌကၠတ်ထဝ် ရးဒေသဇၞော်တၞၚ်သဳဂှ် ပရေၚ်ဒဒှ်ဍာံဍာံနွံဗီုလဵု မိက်ဂွံတီကၠးတုဲ သွက်ဂွံလ္ၚတ်ပရေၚ်ပရူဂှ်ဂှ် နူဗော်အေန်အေဝ်ဒဳ NLD ပံက်လဝ်ဂကောံစှေ်လ္ၚတ်စၟဳစၟတ် နကဵုကောန်ဂကောံ (၃) တၠ သာ်ဝွံ လလောၚ်ပၟိၚ်လဝ် နစၟတ်တ္ၚဲ နဝ်ဝေမ်ဗာ ၂၈ တုဲရ။

“ပရေၚ်ဒဒှ်ပ္ဍဲတွဵုရးဍုၚ်မန်ဂှ် ကၠုၚ်ပ္တိုန်လဝ်လိက်တေၚ် ကဵုပိုဲနွံမံၚ်၊ ပ္တိုန်ထ္ၜးလဝ် အကာဲအရာ ဒဒှ်တွဵုရးမန်ရ၊ ဣဏံဂှ် ဍာံၜိုတ်လဵုရော အတိုၚ်ပ္တိုန်ထ္ၜးဂှ်ရဟာ၊ မ္ၚးနူဏံ မုနွံဏီရော မိက်ဂွံတီဒဒှ်ဍာံဍာံတုဲ ဒးပံက်ဂကောံစၟဳစၟတ်ဏံ၊ မွဲၜါတ္ၚဲဏံ စှေ်လ္ၚတ်ဏောၚ် ပိုဲကေတ်လဝ်အဆက်ဣရ” သာ်ဝွံ ဥူညာဏ်ဝေန် ဂးရ။

အခါရစှေ်လ္ၚတ်မ္ဂး ပ္ဍဲမၞိဟ်တေၚ်ဗ္စိုပ် ထ္ပက်လဝ်တဲတံဂှ် ကုညးလ္ၚဵုလ္ၚဵုဟာ ဟွံသေၚ်တှေ် အလုံညးတေၚ်လဝ် ဖအိုတ်တံဟာ ဆဵုဂဗသၟာန်သၟုက်အာရောၚ် ဥူညာဏ်ဝေန်ဂးရ။

ပ္ဍဲဂကောံစှေ်လ္ၚတ်စၟဳစၟတ်ဂှ်ဝွံ ဥူညာဏ်ဝေန် နူဂကောံကမ္မတဳကေၚ်ကာဗဟဵု ဗော်အေန်အေဝ်ဒဳ NLD ဂှ် ဒှ်ညးက္ဍိုပ်တုဲ ဒံက်တာမျဵုညောအ် ကဵု ဥူကျဝ်ဟဵုတံ နဒဒှ်ကောန်ဂကောံ ပါလုပ်ရ။

သ္ကိုပ်ဝန်ဇၞော်တွဵုရးဍုၚ်မန်ဝွံ ပ္ဍဲကာလညးတေံကေတ်ကၠုၚ်တာလျိုၚ် သ္ကိုပ်ဝန်ဇၞော် ဂွံပွိုၚ် ၈ ဂိတုဏံ တိုန်ကောံဓရီုလေဝ် လီုဒေက်ကၠုၚ်နွံ၊ ပ္ဍဲအရာပံက်ကမ္မတဳ ကိုန်အစဳဇန်တွဵုရးဂှ်လေဝ် စပ်ကိစ္စစုတ်လဝ် တၠကမၠောန်ပိုန်ဒြပ် ကိစ္စဗက်ဆဵုဒၟံၚ် တၠကမၠောန်ပိုန်ဒြပ်တံ မွဲဏှေံမွဲဏှေံ တံဂှ်တုဲ သီုဒးဒုၚ်ဟီုစောကဵု ညးဍုၚ်ကွာန်တံသၟးဟွံက စပ်ကဵုကိစ္စပရေၚ်မၞိဟ်တုဲ ပရိုၚ်တိတ်မံၚ်ဂှ်လေဝ် ဒးဒုၚ်ဟီုပါ်ပါဲမံၚ်ကီုရ။

ဥူမေန်န်ဥူဝွံ ဂွံဒုၚ်ခါန်ကၞက်လဝ်တာလျိုၚ် သ္ကိုပ်ဝန်ဇၞော်တွဵုရးဍုၚ်မန်သၟးဟွံက သီုကေတ်လဝ်တာလျိုၚ် ဌာနဝန်ဇၞော် ပရေၚ်သိုၚ်ခၞံ ကေုာံ ပရေၚ်ဗဂဵုလဟဵု (ဇြဳပေန်) တွဵုရး ကီုရ။

ပြဟ်ဟ်ဏံ ဟိုတ်နူဟဂွံစှေ်လ္ၚတ်စၟဳစၟတ် ပရူပရာ ဟိုတ်ဖဵု မတေၚ်လဝ်ဏီတံဂှ်ရ လ္ပာ်ဂကောံလ္ၚတ်စၟဳစၟတ်တံ ၜိုန်ဟီုပ္တိတ်မမိက်ကဵုမွဲမွဲဟွံမာန်ဏီကီုလေဝ် ကိစ္စသွက်ဂွံပြံၚ်လှာဲ သ္ကိုပ်ဝန်ဇၞော်တွဵုရးဍုၚ်မန်ဏံဂှ် ဍေံဆေၚ်ဒၟံၚ် ကဵု ပရေၚ်ဒးဒုၚ်ပါ်ပါဲ အပ္ဍဲတွဵုရးမန်ဏံ ဒှ်မာန်ကီုရောၚ် ဟီုဂးမံၚ်အိုတ်ရ။