လိက်ဒုၚ်စဳရေၚ် ဆေၚ်ကဵုရုၚ်စက်တိဗုတ်မတ်မလီု (MCL) ဂှ် သ္ပကၠေံဒ္တန်ပ္ဍဲကၠတ်ထဝ်တွဵုရးဍုၚ်မန် ပ္ဍဲဂိတုဒဳဇြေန်ဗာ ၁၃ ဂှ်တုဲအာဣရတုဲ မွဲတဆံၚ်ပၠန် ဆက်ပလံၚ်ကဵု သမ္မတကၟိန်ဍုၚ်တေံရောၚ် ဒံက်တာအေဇြာန် ဥက္ကဌ ကမ္မတဳထိၚ်ဒဝ်မၚ်မွဲ သဘာဝပွဳပွူကေုာံပရေၚ်သယံဇာတ ဟီုရ။
“လိက်ဒုၚ်စဳရေၚ်ဏံ ပိုဲသ္ပဒ္တန်ပ္ဍဲကၠတ်ထဝ်တုဲယျတှေ် လိက်ဒုၚ်စဳရေၚ် ပိုဲချူလဝ်တၚ်နၚ်သောဲသောဲဗြောဲဗြောဲဏံ သမ္မတဍုၚ်လေဝ် ဂွံတီကၠးကေတ်မာန် အပ္ဍဲပွိုၚ် ၅ တ္ၚဲဏံ ပိုဲပလံၚ်ဗ္စိုပ်ဏာဏောၚ်၊ သမ္မတ တီဣဏံတှေ် ကိစ္စဒးကၠောန်လ္ၚဵုလ္ၚဵုတံဂှ် ညးကၠောန်ဂွံဏောၚ်” ဒံက်တာအေဇြာန် ဂးရ။
ဒံက်တာအေဇြာန် ပ္တိုန်ထ္ၜး လိက်ဒုၚ်စဳရေၚ် ပရေၚ် MCL ပ္ဍဲကၠတ်ထဝ် (MNA)
“လၟုဟ်ဏံ ညးတာလျိုၚ်ကမ္ပဏဳတံကဵု ကောန်ဒေသတံဂှ် အကာဲအရာကြံၚ်မ္ၚိုဟ်ကၠုၚ်ကွေံကွေံ ဂွံဆဵုကေတ်ရ။ ဖေက်ဒှ်ပြသၞာဂှ်လေဝ် နကဵုညးစၞးဒေသမွဲ ဒှ်ဓဝိၚ်ကွေံကွေံရ။ ရုၚ်စက်တိဗုတ် MCL စကာဒၟံၚ်ချးတၟံဂှ် ကောန်ဒေသ ပွိုၚ်ဍုၚ်ကျာ်မြဟ် မတန်တဴဒၟံၚ်ပ္ဍဲပွဳပွူ ၜဳကဍတ်ဂှ် ဒးဒုၚ်ဘဲဒဏ် ဍာံဍာံရ” သာ်ဝွံ ဒဝ်ခေန်မျဵုမျေအ် ညးစၞးကၠတ်ထဝ်တွဵုရးဍုၚ်မန် ဒေသမာဲ လၟိဟ် (၁) ပွိုၚ်ဍုၚ်ကျာ်မြဟ် ဟီုသဳကၠဳဏာပ္ဍဲကၠတ်ထဝ်ကီုရ။
အခါရဂွံဆဵုကေတ် က္ၜၚ်ဖ္ဍိုက်ချးတၟံ လုပ်စိုပ်ကၠုၚ်ဂှ်ရောၚ် ရဲဒေသတံ ဂွံတီကေတ် ဒဒှ်ရစကာချးတၟံ၊ ကွာန်ဂမၠိုၚ် နွံပွဳပွူၜဳကဍတ်ဂှ် ပတှေ်ကၠုၚ်ကလောန်ၜဳ ဂၠိုၚ်ကဵုသၞာံအခါရတုဲ လၟုဟ်မ္ဂး ဟိုတ်နူက္ၜၚ်ဖ္ဍိုက်ချးတၟံ သွက်ရုၚ်စက် MCL လုပ်တိတ်အာကၠုၚ်ဒၟံၚ်ဂှ်ရ ကမၠောန်ၜဳလေဝ် လီုလာ်ကၠုၚ် တီတီရ ဒဝ်ခေန်မျဵုမျေအ် ဂး။
စပ်ကဵုရုၚ်စက်တိဗုတ်မတ်မလီု (MCL) ဏံတုဲ ပ္ဍဲတ္ၚဲဒဳဇြေမ်ဗာ ၉ မဒှ်တ္ၚဲတတိယ ကောံဓရီုလၟေၚ်ဍာံ အလန်စတုတ္ထ ကၠတ်ထဝ်တွဵုရးမန် အလန်ဒုတိယဂှ် နူကမ္မတဳ မၚ်ရံၚ်ပရေၚ်ထိၚ်ဒဝ် သဘာဝပွဳပွူ ကေုာံပရေၚ်သယံဇာတ ပ္တိုန်ထ္ၜးလိက်ဒုၚ်စဳရေၚ်သ္ကုတ် ၂ တုဲ ပ္ဍဲဒဳဇြေမ်ဗာ ၁၃ မဒှ်တ္ၚဲပဥ္စမဂှ် ညးစၞးကၠတ်ထဝ် (၃) တၠ ထံက်ဂလာန်သဳကၠဳကၠုၚ်တုဲ နူကၠတ်ထဝ် ဒုၚ်တဲသ္ပဒ္တန်ရ။
ကိစ္စရုၚ်စက်တိဗုတ်မတ်မလီု စကားချးတၟံဂှ် ကောန်ကွာန်ဂမၠိုၚ် နူဗွဲပွဳပွူဂှ် ဍဵုထ္ပက်စၟတ်တဲဆေဝ်ဒဝ် ဗၞတ် (၃၇၈၀) တၠတုဲ ဗဒေါံကဵုကိစ္စစကာချးတၟိညိ သာ်ဝွံ ပ္ဍဲဂိတုအေဗရဴ ၂၅၊ သၞာံ ၂၀၁၆ ဂှ် ချူဗ္စိုပ်ဏာလိက်တေၚ် ကုသမ္မတကၟိန်ဍုၚ် ၊ သီုသ္ကိုပ်ဝန်ဇၞော်တွဵုရးမန် မွဲဟာန်ကၠတ်ထဝ်တွဵုရးမန်ကီုရ ဂွံတီကေတ်။
