ပ္ဍဲအရာတောဲဓလုၚ်ဇုက်ဇၞော်ဓါတ်လလဳ 66 KV နူမတ်မလီု အာကဵုတ္ကံခၟိုၚ်ဂှ် ဂအာၚ်တိလ္ၚဵုလ္ၚဵု ဒးဒုၚ်ချောံအာ ဒၟါနူပ္တဴတိုၚ်ပၟတ်ပြ (တိုၚ် tower) နွံကၠုၚ်တုဲ သွက်တၠတိတံဂှ် ဂိတုဂျာန်နဝါရဳ (၂၀) ဏံတှေ် နူဌာနကိုန်အစဳဇန် ဗလးဒြဟတ်ဓါတ်လလဳ (ဓါတ်အားပို႔လႊတ်ရေးစီမံကိန်းဌာန) ကၠုၚ်လေဲကဵုသြန် ၚုဟ်တိချောံအာတံဂှ်ရောၚ် သ္ကိုပ်အေန်ဂျေန်နဳယာတွဵုရးမန် ဥုတိတ်ပါၚ်မျဵု နူဌာန်ကမၠောန် ပါ်ပရးပၟတ်ဓါတ်လလဳ (လျှပ်စစ်ဓာတ်အားဖြန်႕ဖြူးရေးလုပ်ၚန်း ) တွဵုရးမန် ဟီုရ။
ပ္ဍဲဂရိပ်ဂၠံၚ်ဇုက်ဓါတ်ပၟတ်တတ်အာဂှ် သွက်ရဲတၠတိ လ္ပာ်တ္ကံခၟိုၚ် (၉၃) တၠဂှ် လေဲကဵုၚုဟ်ချောံလေၚ် (၁၇၇) ကိုဋ်ဒကေဝ်ရောၚ်၊ သွက်ရဲတၠတိ လ္ပာ်မတ်မလီု (၁၇) တၠဂှ် လေဲကဵုၚုဟ်ချောံလေၚ် (၂၇၄) ကိုဋ်ဒကေဝ်ရောၚ် ဂးရ။
ဂအာၚ်တိ ဒၞါဲသိုၚ်ပ္တဴတိုၚ်ပြ (tower) သွက်ဂွံတောဲဇုက်ပၟတ် (MNA)
ပ္ဍဲအရာအာတ်မိက်ၚုဟ်လေဲဂှ်လေဝ် နူမတ်မလီုကဵုတ္ကံခၟိုၚ် မၞိဟ် (၁၀၀) ပ္တိုန်ထ္ၜးကၠုၚ်တုဲမှ မၞိဟ်ဂလုဲမံၚ် (၆) တၠမံက်ကၠုၚ်ပၠန်၊ သွက်မၞိဟ် (၆) တၠဏံ ယးသၞာံတေံ ညံၚ်ဂွံဖျေံကဵုသြန်လေဲပၠန်ဂှ် ဒးဆက်အာတ်ပၠန်ရောၚ် ဥုတိတ်ပါၚ်မျဵု ဟီုရ။
သွက်ဂွံတောဲဓလုၚ်ဏာဇုက်ပၟတ်ဓါတ်လလဳ အာကဵုတ္ကံခၟိုၚ်တေံဂှ် ပ္ဍဲသၞာံ ၂၀၁၅ ၊ ဂိတုအံက်တဝ်ဗာ (၂၄) ဂှ် စကၠောန်ခၞံတိုၚ်ပြဇုက်ပၟတ် (တိုၚ် tower) တုဲ စနူဂိတုအံက်တဝ်ဗာ (၂၈) ဂှ် တၠတိတံ အာတ်မိက်ကၠုၚ် ၚုဟ်လေဲ ဆက်က်ရ ဂွံတီကေတ်။
“သွက်ဂွံကဵုၚုဟ်လေဲဂှ် နူဝါဒိတေံရ တုပ်စိုတ်ညးသ္ကံနွံမံၚ်၊ ဆ္ဂး လအ်ဒၟံၚ်ကွေံကွေံ၊ မုဒှ်ရော အဲသၟာန်ရံၚ်ဂှ် ဟိုတ်နူဂွိုအ်တော်တၟော်သြန်ဏီဂး၊ လၟုဟ်တော်တၟော်တုဲယျတှေ် ကဵုၚုဟ်လေဲဏောၚ် ကလေၚ်နၚ်ပရိုၚ်ကဵုအဲ” သာ်ဝွံ ဒံက်တာအံၚ်နာၚ်ဥူ ညးစၞးကၠတ်ထဝ် နူဒေသမာဲ စၟတ် (၁) ပွိုၚ်ဍုၚ်တ္ကံခၟိုၚ် ဟီုရ။
နူဌာနကိုန်အစဳဇန်ဗလးဒြဟတ်ဓါတ်လလဳ (ဓါတ်အားပို႔လႊတ်ရေးစီမံကိန်းဌာန) တေံ ကဵုနၚ်ၚုဟ်လေဲလၟုဟ်ဏံ လၟိဟ်သြန်ဂွံ ကေုာံဗၞတ်ဗ္ၜတ်တိ ဒးချောံအာဂှ် ဍေံဟွံကြိုက်တန် ဍေံဟွံဒှ်ဗဗွဲဓဝ် ဂွံအောန်အာဏောၚ်ဒှ်မ္ဂး သ္ပစၞးသွက်တၠတိတံတုဲ ဆက်ရေၚ်တၠုၚ်ကဵုပၠန်ရောၚ် ဒံက်တာအံၚ်နာၚ်ဥူဂးရ။
ဟိုတ်နူတောဲဓလုၚ်ဇုက်ဓါတ်လလဳတုဲ ဒးကဵုၚုဟ်လေဲ သွက်ဂအာၚ်တိဂှ် ပ္ဍဲတွဵုရးမန်ဏံမ္ဂး ပွိုၚ်ဍုၚ်ရေဝ်တေံ ဒှ်အလန်ပထမတုဲ၊ မတ်မလီု-တ္ကံခၟိုၚ် ဏံ ဒှ်အလန်ဒုတိယရ။
သၞာံဘဏ္ဍာ ယးသၞာံတေံမ္ဂး သွက်ဂွံသိုၚ်ခၞံကၠောန်အာ ဂၠံၚ်တောဲဓလုၚ်ဓါတ်လလဳ 66 KV မတ်မလီု-ဗြဝတဳ၊ မတ်မလီု-ဇြပ်ဗု ပၠန်ဂှ် နူဌာနကိုန်အစဳဇန်ဗလးဒြဟတ်ဓါတ်လလဳ (ဓါတ်အားပို႔လႊတ်ရေးစီမံကိန်းဌာန) ပဠေဝ်ပဠေတ်မံၚ်ဖိုဟ် ဂွံတီကေတ်ကီုရ။
0 Comments