ပ္ဍဲတွဵုရးဍုၚ်မန် (၁၀) ပွိုၚ်ဍုၚ်ဂှ် ပပ္တံနူဂိတုဂျာန်နဝါရဳ ၂၀ စဵုကဵု ၂၉ နူဌာနက္ဍိုက်ပ်ပရေၚ်ထတ်ယုက်ညးဍုၚ်ကွာန် တွဵုရးဍုၚ်မန် သ္ပက္ဍိုပ်တုဲ ဗက်ဖျုၚ်ဂဥုဲစဵုဒၞါဲယဲဇိုၚ်ခ္ဍိုပ် (ယဲဇိုၚ်စိၚ်) ရောၚ်တုဲ ညးဍုၚ်ကွာန်တံ လ္ပဖေက်ဂဥုဲအိုတ်ညိ သာ်ဝွံ ဌာနက္ဍိုက်ပ် ပရေၚ်ထတ်ယုက်ညးဍုၚ်ကွာန်တွဵုရး ဆဝ်မ္ၚုဟ်ပၟိၚ်ပၟဟ်လဝ်ရ။

ပ္ဍဲဒေသ စၟယဲဇိုၚ်ခ္ဍိုပ် (ယဲဇိုၚ်စိၚ်) ကၠောံထၞာန်လေပ်ဂှ် မွဲသၞာံတှေ် ဗၞတ် (၅) ဝါ ဟဂွံသ္ကုတ်ခြာ ဗက်ဖျုၚ်ဂဥုဲ ကုညးတန်တဴပ္ဍဲဒေသတံဂှ် အလုံဖအိုတ်ကီုလေဝ် ညးဍုၚ်ကွာန်တံ ပါဲဂြိပ်မံၚ်သၟးရဂွံဆဵုကေတ်၊ ဒၟါနူဂှ်ရ ဟွံမိက်ကဵုဒှ်သာ်ဂှ်တုဲ ပ္ဍဲဂိတုဂျာန်နဝါရဳ (၁၇) ဂှ် နူဌာနက္ဍိုက်ပ်ပရေၚ်ထတ်ယုက်ညးဍုၚ်ကွာန်တွဵုရး ကၠောန်ကၠုၚ် “ပေါဲသောၚ်က္လး ကဵုပညာ ကမၠောန်ဖျုၚ်ဂဥုဲစဵုဒၞါယဲဇိုၚ်ခ္ဍိုပ် (ယဲဇိုၚ်စိၚ်) ကုအလုံညးဖအိုတ်” ပ္ဍဲယှိုဲမျေအ်မဵုထောန်ဟဝ်တေဝ် ဂးရ။

“သွက်ဂွံစဵုဒၞါ ယဲဇိုၚ်စိၚ်ဂှ် နကဵုဌာနပရေၚ်ထတ်ယုက်ညးဍုၚ်ကွာန် ဖျုၚ်ကၠုၚ်ဂဥုဲ ၃ သၞာံတုဲမံၚ်ကီုရ၊ ပ္ဍဲပိသၞာံဏံ ပိုဲ ဂွံဆဵုကၠုၚ်ဂှ် ညးလ္ၚဵုလ္ၚဵုတံ ဟွံသုၚ်ဂဥုဲဂှ် နွံဂၠိုၚ်၊ လ္ၚဵုဂှ်ပၠန်လေဝ် ပ္ဍဲဇကု မုယဲလေဝ်ဟွံမွဲဂးတုဲ ဟွံသုၚ်ရ၊လ္ၚဵုဟီုပၠန်ဂှ် သုၚ်ဂဥုဲဏံတှေ် ချိုတ်မာန်မံၚ် ဂးပၠန်ရ၊ ဂွံမိၚ်ကၠုၚ်နာနာသာ်ရ” သာ်ဝွံ ဒံက်တာညာဏ်သေအ် ဒုသ္ကိုပ်က္ဍိုက်ပ် နူဌာနက္ဍိုက်ပ်ပရေၚ်ထတ်ယုက်ညးဍုၚ်ကွာန် တွဵုရးဍုၚ်မန် ဟီုရ။

ရဲနူဌာနထတ်ယုက်တံ ကၠုၚ်ဖျုၚ်ဂဥုဲတှေ် ညးဍုၚ်ကွာန်တံ လ္ပဂိုၚ်စွံထောံဂဥုဲညိ၊ သုၚ်လွာဲဂှ်ညိ၊ ဂွံသုၚ်လဝ် ဂဥုဲဂှ်မ္ဂး ဟွံဒးဂွိၚ်ကဵု ဒှ်ယဲဇိုၚ်စိၚ်ရ၊ ဂဥုဲဏံ ဟွံဒှ်အန္တရာဲလမျီုရ ဂှ်လေဝ် ညးဆက်ဟီုရ။

ဂဥုဲစဵုဒၞါယဲဇိုၚ်စိၚ်ဏံဂှ် ပါဲနူ ကောန်ၚာဲအယုက် သၟဝ် (၂) သၞာံ၊ ညးဗြဴနွံကဵုယဲဒိုက်၊ ဟိုတ်နူယဲမွဲမွဲသာ်တုဲ ညးဒးဒတိက်မံၚ် ပ္ဍဲဒၟံၚ်သတိက်၊ ညးဒးသုၚ်မံၚ် ဂဥုဲမွဲမွဲသာ် တံဂှ်တုဲ မၞိဟ်သှေ်မံၚ်တံ သီုဂွံသီုညးဖအိုတ်ရ၊ ကောန်ၚာ် နူ ၂ သၞာံ စဵုကဵု ၅ သၞာံမ္ဂး ဒးဖျုၚ်ဂဥုဲ အေဝ်ဗာန်ဒါန်ဇြဵု ၁ မ၊ ဒဳအဳဇြဳ ၁ မ။ အယုက် နူ ၆ သၞာံစဵုကဵု ၁၄ သၞာံဂှ် ဒးသုၚ် ဂဥုဲ အေဝ်ဗာန်ဒါန်ဇြဵု ၁ မ၊ ဒဳအဳဇြဳ ၂ မ။ အယုက် ၁၄ သၞာံဖါလ္တူမ္ဂး ဒးသုၚ် အေဝ်ဗာန်ဒါန်ဇြဵု ၁ မ၊ ဒဳအဳဇြဳ ၃ မရောၚ် နူဌာနက္ဍိုက်ပ် ပရေၚ်ထတ်ယုက်ညးဍုၚ်ကွာန် တွဵုရးဍုၚ်မန် ကဵုလဝ်စၞောန်ရ။

“ယဲဇိုၚ်စိၚ်မ္ဂးဂှ် ကၠောံကၠုၚ်နူဂမိတ်ရ၊ မုဟိုတ် ဒးဖျုၚ်ဂဥုဲစဵုဒၞါ ယဲဇိုၚ်စိၚ်ရောဟီုမ္ဂး ပ္ဍဲရးဒေသဇၞော် ကဵု တွဵုရးတံဂှ် မၞိဟ်စၟယဲဇိုၚ်စိၚ်ကၠောံလဝ် နွံမံၚ်၊အခါစိုပ်သၞာံ ၂၀၂၀ တေံမ္ဂး ယဲဇိုၚ်စိၚ် ညံၚ်ဂွံကၠက်ဂှ် နူဌာနပရေၚ်ထတ်ယုက် ဆက်ဂစာန်မံၚ်ဖိုဟ်”သာ်ဝွံ ဒံက်တာ (စည်သူရဲနောၚ်) ဒုသ္ကိုပ်စၞောန်ပ္ညုၚ် နူဌာနက္ဍိုက်ပ်ပရေၚ်ထတ်ယုက်ညးဍုၚ်ကွာန် တွဵုရးဍုၚ်မန် ဟီုရ။

ရန်ကဵုညံၚ်ဟဂွံဒှ်ယဲဇိုၚ်စိၚ်တုဲ နူဌာနက္ဍိုက်ပ်ပရေၚ်ထတ်ယုက်တွဵုရး ပ္ဍဲသၞာံ ၂၀၁၃ ဂှ် ဖျုၚ်ဂွံဂဥုဲ ၈၉ တၟံကၠံ၊ ပ္ဍဲသၞာံ ၂၀၁၄ ဂှ် ၈၈ တၟံကၠံ၊ ပ္ဍဲသၞာံ ၂၀၁၅ ဂှ် စဵုကဵု ၉၁ က္ဍိုပ်ကၠံ ဂွံတီကေတ်ရ။