ညံၚ်ကောန်ဂကူကရေၚ်တံ ကၠောန်ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ နအလိုက်ဂကူဂှ်ကီု ဂကူတၞဟ်ဟ်တံလေဝ် ထေက်ကဵုသ္ဒးကၠောန် ပေါဲသဳကၠဳပရေၚ်ၜိုဟ်လလံကီုရောၚ် သ္ကိုပ်ပၞာန်ဇၞော် မူတူသေဖိုဝ် ဥက္ကဌ ဗော် KNU ဟီုဂးကၠုၚ် ပ္ဍဲပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ (ဂကူကရေၚ်) မကၠောန်လဝ်ပ္ဍဲတွဵုရးကရေၚ်ဂှ်ရ။
“လၟုဟ်ဒုၚ်သဇိုၚ်ကဵုဂကူကရေၚ်တုဲ ညံၚ်မကၠောန်ပေါဲသဳကၠဳပရေၚ်ၜိုဟ်လလံ အဆံၚ်ကောန်ဂကူကီု ကောန်ဍုၚ်အရၚ်သှေ်မံၚ်ဏီတံလေဝ် ထေက်ကဵုသ္ဒးကၠောန် ပေါဲသဳကၠဳပရေၚ်ၜိုဟ်လလံ အဆံၚ်ကောန်ဂကူ မဒုၚ်သဇိုၚ်ကဵု ကောန်ဂကူဇကုကီုရောၚ်၊ ကၠောန်သာ်ဂှ်မ္ဂး က္လိဂွံလညာတ်ကောန်ဂကူဇကုမာန်ရောၚ်တုဲ ပ္တန်ကၟိန်ဍုၚ်ပံၚ်ကောံဖေဝ်ဒရေဝ် မၜိုဟ်လလံမာန်ရောၚ်၊ မိက်ဂွံကလေၚ်ပ္တန် ကၟိန်ဍုၚ်ပိုဲတံ ပိုၚ်ပြဳကၠုၚ်လဝ်မွဲစွံဏံဂှ်မ္ဂး ဒးပ္တဝ်က္ဍိုပ်ကဵုကၟိန်ဍုၚ်ပံၚ်ကောံ ဖေဝ်ဒရေဝ်ရောၚ်” သ္ကိုပ်ပၞာန်ဇၞော် မူတူသေဖိုဝ် ဂးရ။
ဗီုပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ ဂကူကရေၚ် (MNA)
ကမၠောန်သ္ပဇြိုဟ်နက်ကဵု ပရေၚ်သၟဟ်သၟန်ညဳသာဂကူဂှ် ပိုဲတံ ဒးဓမံက်ရုပ်ရဴ ကၠောန်အာမွဲစွံရောၚ်၊ သွက်ဂွံကၠောန် ဓမံက်ရုပ်ရဴဂှ်လေဝ် ဍေံတန်ဒၟံၚ် ပ္ဍဲ NCA ပၠန်ရောၚ်၊ ပ္ဍဲအရာဒက်ပ္တန်ကၟိန်ဍုၚ်ပံၚ်ကောံဖေဝ်ဒရေဝ် မဒှ်ကမၠောန်ၜိုဟ်လလံ အလုံညးဖအိုတ်ဂှ်လေဝ် ကောန်ဍုၚ်အရၚ်ဖအိုတ်တံ ညံၚ်ဂွံပံၚ်ကၠောန်မွဲစွံမာန်ဂှ် ပဋိပက္ခလွဟ် က္တဵုဒှ်ဒၟံၚ် ပ္ဍဲဒေသကောန်ဍုၚ်အရၚ်လ္ၚဵု ညံၚ်ဂွံဒေါံဂှ်လေဝ် အလဵုအသဳကၟိန်ဍုၚ်ကဵု ဂကောံရပ်လွဟ်မဆေၚ်စပ်တံ သောၚ်က္လးပရေပရံၚ် နကဵုပရေၚ်ဍုၚ်ကွာန်ညိ သ္ကိုပ်ပၞာန်ဇၞော်မူတူသေဖိုဝ် ဖ္တိုက်ဖၟောဝ်လဝ်ကီုရ။
ပ္ဍဲပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ သွာၚ်ကောန်ဂကူကရေၚ် မကၠောန်ကၠုၚ် ပွိုၚ် ၃ တ္ၚဲ နူဂျာန်နဝါရဳ ၁၈ စဵုကဵု ၂၀ ပ္ဍဲဟဝ်တေဝ်သဳရိဘာအၚ် ၊ဍုၚ်ဘာအၚ် တွဵုရးကရေၚ်ဂှ်ဝွံ ညးစၞးဂမၠိုၚ် နူဗော်ပရေၚ်ဍုၚ်ကွာန်ကရေၚ် (၅) ဗော်၊ ဂကောံ ရပ်လွဟ်ကရေၚ် (၃) ဂကောံ၊ က္ဍိုပ်သ္ကိုပ်ညးစၞး ညးဍုၚ်ကွာန်ကရေၚ် နူကဵု (၉) ဒေသ အပ္ဍဲဍုၚ်ဗၟာ၊ ညးတိုန်လ္ၚတ် နူကောန်ဍုၚ်အရၚ်တၞဟ်ဟ်၊ ညးစၞးနူဂကောံဂမၠိုၚ် ဍုၚ်သၟာၚ်၊ ညးလ္ၚတ် နူ CSO Forum တံတိုန်စိုပ်တုဲ သီုဖအိုတ် လၟိဟ်ညးစၞး နွံ ၅၀၀ တၠပြၚ်ရ။
သ္ကိုပ်ပၞာန်ဇၞော် မူတူသေဖဝ် (MNA)
“သ္ကိုပ်ပၞာန်အံၚ်သာန် ဟီုကၠုၚ်လဝ် နွံပၟိက်ကဵုပရေၚ်သၠးပွးမ္ဂး စေဝ်ပၞောန် ဂပ်ဝ်ကဵုပရေၚ်သၠးပွးဂှ် မၚ်မွဲဒဂေတ်ဗက်အိုတ်ညိ၊ မၚ်မွဲပရေၚ်ကောန်ဂကူညိ၊ ကမၠောန်ပ္တန်ပရေၚ်ၜိုဟ်လလံဂှ်ကၠောန်ညိဂးကၠုၚ်နွံတုဲ ကမၠောန်ပိုဲကၠောန်တ္ၚဲဏံဂှ်လေဝ် ဍေံဒးဒၟံၚ်ကဵုဂလာန်ဂှ်ရ၊ တ္ၚဲဏံပိုဲကၠောန်မံၚ် ကမၠောန်ပ္တန်ပရေၚ်ၜိုဟ်လလံဣရ၊ ကိစ္စမၚ်မွဲစေဝ်ပၞောန် ကိစ္စထိၚ်ဒဝ်မၚ်မွဲ ပရေၚ်ကောန်ဂကူဂှ်လေဝ် စွံအဓိကတုဲ ကၠောန်အာအိုတ်ရောၚ် ပတှေ်လဝ်ပေၚ်ၚ်ရ” သာ်ဝွံ သ္ကိုပ်ဝန်ဇၞော် တွဵုရးကရေၚ် နာန်ခေန်ထိုဲမျေအ် ဂးရ။
“ကမၠောန်ဓမံက်ရုပ်ရဴ ပရေၚ်ၜိုဟ်လလံဂှ် ဟိုတ်နူဒှ်ကမၠောန်ဇြိုဟ်နက်ဇိပ်ဂၠိပ်ဗွဲမလောန်ဂှ်ရ လ္တူအခေါၚ်အဝဵုဂှ် စွံဇြိုဟ်နက်ကဵုစေဝ်ပၞောန်တုဲ ဂွံယိုက်ဂၠေၚ် ရေၚ်တၠုၚ် ကေတ်ကၠုၚ်တာလျိုၚ်နာနာသာ်ဂှ် မိပ်အိုဟ်တၟိုဟ်ဗွဲမလောန်ရ၊ ကေတ်ဂုန်စရာဲ သွက်ကောန်ဗွဲကြဴ စဴဗွဲဂတတုဲ ညံၚ်ဂွံဂစာန်အာ” သာ်ဝွံ သ္ကိုပ်ဝန်ဇၞော် တွဵုရးကရေၚ် ဂးရ။
သ္ကိုပ်ဝန်ဇၞော်တွဵုရးကရေၚ် နာန်ခေန်ထိုဲမျေအ် (MNA)
နနဲဏံကီု ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ နအလိုက်ဒေသဂှ်လေဝ် ပ္ဍဲရးဒေသဇၞော်တၞၚ်သဳဂှ်ကီု၊ ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ နအလိုက်ပရူပရာ (CSO Forum) ဂှ် ပ္ဍဲဒေသကံၚ်ဇြဳ နေပျဳဒဝ်တေံဂှ်ကီု သွက်ဂွံကၠောန်သ္ပအာနွံတုဲ လညာတ်သ္ဂုတ်သွာတ် တိတ်ကၠုၚ်နူပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူတံဏံဂှ် ဆက်ပ္တိုန်ကဵု သ္ဘၚ်သဳကၠဳပရေၚ်ၜိုဟ်လလံဍုၚ် ပေန်လုၚ် ၂၁ ဗွဝ်ကၠံတေံပၠန်ရောၚ်။
