မိက်ဂွံသဳကၠဳ ကိစ္စသွက်ဂွံထ္ပက်စၟတ်တဲ လိက်ကသုက်တုပ်စိုတ် ဒေါံပန်ပှော်အလုံဍုၚ် NCA သီုကဵုကိစ္စသွက်ဂွံ တိုန်စိုပ်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံ အလန်ဒုတိယဂှ်တုဲ နူဂကောံကမ္မယှေန် ပရေၚ်ၜိုဟ်လလမ် ဗ္စိုပ်လဝ်လိက် ကုဒပ်ပံၚ်ကောံ UNFC ရောၚ် ဥူလှမိုၚ်ယှိုဲ (ညးကဵုကသပ် ပရေၚ်ၜိုဟ်လလံ) ဟီုပ္တိတ် ပ္ဍဲတ္ၚဲ ဖေဖဝ်ဝါရဳ ၁ မံက်ရ။
အဃောဂိတုဂျာန်နဝါရဳ ၁၃ တုဲကၠုၚ်ဏံ ဂကောံ DPN (ဂကောံသွက်ဂွံသဳကၠဳပ္ညဳပ္ညပ်ကိစ္စပရေၚ်ဍုၚ်ကွာန်) နူ UNFC ကေုာံဂကောံကဵုကသပ် ကမ္မယှေန်ပရေၚ်ၜိုဟ်လလံတံ ဆဵုဂဗသဳကၠဳကၠုၚ်ဗွဲပလး ပ္ဍဲဍုၚ်ဇၚ်မာဲ (ဍုၚ်သေံ) ရ။
မၞိဟ်ကဵုကသပ်ပရၜေိုဟ်လလံ ဥူလှမိုၚ်ယှိုဲ (တၞုၚ်အိုတ်လ္ပာ်ပုၚ်) (Khin Zaw Oo -Fb)
ပ္ဍဲဂိတုဂျာန်နဝါရဳ နူ ၂၃ ဒဵုကဵု ၂၅ တုဲကၠုၚ်ဏံ ဂကောံ UNFC ကၠောန်ကၠုၚ်ကောံဓရီုကာမံက်တိုန် ကမ္မတဳကေၚ်ကာဗဟဵု ပ္ဍဲဍုၚ်ဇၚ်မာဲ (ကၟိန်ဍုၚ်သေံ) တုဲ၊ ဂွံအခေါၚ်တိုန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံ နအဆံၚ်ညးလ္ၚတ်ဟေၚ်ရမ္ဂး ဟွံတိုန်ရ၊ ကိစ္စသွက်ဂွံထ္ပက်စၟတ်တဲ NCA ဂှ်ဆက်သဳကၠဳရောၚ်၊ တြၚ်ပေါဲသဳကၠဳ ပံက်မံၚ်ဏီမ္ဂး အခိၚ်လဵုဟွံဟီု ဆက်သဳကၠဳအာရောၚ် UNFC လလောၚ်ပ္တိတ်လဝ်ရ။
“ကိစ္စဏံ အတိုၚ်စၞောန် နူကမ္မယှေန်ပရေၚ်ၜိုဟ်လလံ PC ဂှ်ရ ပိုဲသဳကၠဳအာဏောၚ်။ အတိုၚ်မူဝါဒ (ပဝ်လဇြဳ) အလဵုအသဳရ သဳကၠဳအာဏောၚ်။ အခေါၚ်သွက်ဂွံပါလုပ် ပံက်ကဵုၜိုတ်လဵုရောဂှ် သ္ဂုတ်သွာတ်နွံပ္ဍဲညးဇၞော် အဆံၚ်လ္တူတေံဏောၚ်တုဲ ညံၚ်ဂွံဒှ်ခိုဟ်အိုတ်ဂှ် ပိုဲဂစာန်ကဵုဏောၚ်” ဥူလှမိုၚ်ယှိုဲဂးရ။
ဆ္ဂး နူကၠတ်ထဝ်တွဵုရးသေံ ဖျေံထောံသ္ဂုတ်သွာတ် သွက်ဂွံကော်သၟိတ်စ ဂကောံမဟာမိတ်သၟဝ်ကျာ နဒဒှ်ရဲပလီုပလာ် ပရိုက်ပကီုဍုၚ်ကွာန်ဂှ်ရ က္ဍိုပ်သ္ကိုပ် KIA (ကောန်ဂကောံ UNFC ) တံ သွက်ဂွံလုပ်သဳကၠဳ အပ္ဍဲဍုၚ်ဂှ် ဒှ်ကၠုၚ်အခက်ခုဲ ဂွံတီကေတ်ရ။
တုဲပၠန် ဒပ်ပၞာန်လေဝ် ဒုၚ်တဲသ္ပသမ္တီယၟုဂှ်တုဲ နကဵုတၚ်ထ္ၜးဟိုတ်နာနာသာ် ဍိုက်ထ္ပက်ဒၟံၚ်ပၞာန်ဂှ် ဒှ်ကလောန်မိက်ဂွံပလီု ပေါဲသဳကၠဳ နကဵုကသပ်နွံနွံရောၚ် သာ်ဝွံ ဂးလဝ် ပ္ဍဲလိက်လလောၚ်တြး ဂျာန်နဝါရဳ ၂၇ ဂကောံ UNFC ရ။
“အစဳဇန်ဏံ ယဝ်ဒှ်အစဳဇန် သွက်ဂွံဆဵုကဵု ဒဝ်အံၚ်သာန်သုကျဳရမ္ဂး ပ္ဍဲနေပျဳဒဝ်ဒှ်ဒှ်၊ ပ္ဍဲလ္ဂုၚ်ဒှ်ဒှ် ပိုဲအာဏောၚ်၊ ယဝ်ဆဵုကဵု ကမ္မယှေန်ပရေၚ်ၜိုဟ်လလံရမ္ဂး ပိုဲမိက်ဂွံဆဵု ပ္ဍဲဇၚ်မာဲဟေၚ်ရ” သာ်ဝွံ သဝ်ဝန် နာဲယှိုဲတိၚ် ဂကောံ DPN ဟီုရ။
ဂကောံဟဂွံထ္ပက်စၟတ်တဲ NCA ဏီ နွံပ္ဍဲ UNFC ဂှ် ဗော်ကချေၚ် KIO/ KIA ၊ဗော်ဍုၚ်မန်တၟိ NMSP ၊ ဗော်သေံ SSPP/SSA ၊ ဗော်ကရေၚ်ဍာဲ KNPP ၊ ကံၚ်ဇြဳကောန်ဂကူရခေၚ် ANC ၊ ဂကောံကောန်ဂကူဝ WNO ၊ ဂကောံဒဳမဝ်ကရေတ်တေတ်ဠာဟူ LDU တံ သှေ်မံၚ်ဏီရ။
0 Comments