သွက်ဂွံထ္ပက်စၟတ်တဲ NCA လိက်ကသုက်တုပ်စိုတ်ဒိုအ်ပန်ပှော် အလုံမွဲဍုၚ်ဂှ် ဗော်ဍုၚ်မန်တၟိ သ္ပဇြဟတ်ကဵုကောန်ဂကောံ ဒပ်ပံၚ်ကောံ UNFC မသၟေဟ်မံၚ်တံဂှ်တုဲ ဂစာန်ကသေအ်ကၟဝ်အာရောၚ် ဂွံတီကေတ်ရ။

“ပ္ဍဲဒပ်ပံၚ် UNFC ဂှ် ဂကောံလ္ၚဵုလ္ၚဵု ဟွံထ္ပက်စၟတ်တဲ NCA ရပုဟ်၊ ဗီုညးတံ ညးတံဒတူလိုၚ်အာ ဏောၚ်တှေ် ဂကောံသှေ်မံၚ်တံဂှ်ရ ညံၚ်ဂွံထ္ပက်စၟတ်တဲ NCA ဂှ် ဖ္တိုက်ဖၟောဝ်အာဏောၚ်” နာဲဝေန်လှ ညးတာလျိုၚ် ဌာနအပ္ဍဲဍုၚ် ဗော်ဍုၚ်မန်တၟိ ဟီုရ။

ပ္ဍဲဖေဖဝ်ဝါရဳ ၂၄ တုဲကၠုၚ်ဏံ ဂကောံရပ်လဝ်ကောန်ဍုၚ်အရၚ် (၇) ဂကောံ ဒေသသၟဝ်ကျာတေံ ပံက်ပ္တန်ကမ္မတဳသဳကၠဳပရေၚ်ဍုၚ်ကွာန်တုဲ တးပါဲကၠေံ သွက်ဂွံထ္ပက်စၟတ်တဲ NCA ရ။ အပ္ဍဲဂှ် ဂကောံပရေၚ်ဗၠးၜးကချေၚ် KIO ကေုာံ ဗော်ပရေၚ်တောတက်ရးသေံ SSPP မဒှ်ကောန်ဂကောံ UNFC ဂှ်လေဝ် ပါအာကရောံဂှ်ကီု ဂွံတီကေတ် နူလိက်လလောၚ်တြး ပါန်သာန် အလန်တတိယ ရ။

“ဒုၚ်သဇိုၚ်ကဵု ဂၠံၚ်ပေါဲသဳကၠဳပရေၚ်ဍုၚ်ကွာန်တုဲ သွက်ဂွံဒက်ပ္တန်အာ ပရေၚ်ၜိုဟ်လလံဂှ် နူသၞာံ ၂၀၁၂ တေံရ ထ္ပက်စၟတ်တဲကဵုအလဵုအသဳတုဲ ကေတ်ကၠုၚ်ပရေၚ်ဒိုအ်ပန်ပှော် နအဆံၚ်တွဵုရး၊ အဆံၚ်ကၟိန်ဍုၚ်တုဲကၠုၚ်ယျ၊ ဒှ်သာ်ဂှ်ရ ပေါဲသဳကၠဳပရေၚ်ဍုၚ်ကွာန်ဂှ် ဆေၚ်ကဵုဗော်ဍုၚ်မန်တၟိ မွဲဓဝ်ဟွံသေၚ်။ ဍေံဆေၚ်ဆက်ကဵု ပရေၚ်အလုံကေါန်ဂကူမန်ရ၊ ဣဂှ်ရ သွက်ဂွံထ္ပက်စၟတ်တဲ NCA ဂှ် အရာဒးဗပေၚ်နွံတှေ် ညံၚ်ဂွံဗပေၚ်မာန် ကၠောန်သ္ပပေါဲသောၚ်က္လးဏံ” နာဲဝေန်လှ ဆက်ဟီုထ္ၜးရ။

ပ္ဍဲစၟတ်တ္ၚဲ ဂိတုမာတ် ၂၂ ဂှ် ဗော်ဍုၚ်မန်တၟိ ကော်ဘိက် ဂကောံမှာဇန်မန်နာနာ၊ဂကောံခမဳသၚ်ဂမၠိုၚ်၊ ဗော်ပရေၚ်ဍုၚ်ကွာန်မန်ဂမၠိုၚ်၊ ဂကောံညးဗြဴမန် ကေုာံညးစိုတ်လုပ်စပရေၚ်မန်တံတုဲ အကာဲအရာပရေၚ်ဍုၚ်ကွာန် ဂတမတ်ဏံကီု ပရူသွက်ဂွံထ္ပက်စၟတ်တဲ NCA အရၚ်ဂွံတိုန် ပေါဲသဳကၠဳပရေၚ်ဍုၚ်ကွာန်ဂှ်ကီု နာဲဝေန်လှ ညးလျိုၚ်ဌာနအပ္ဍဲဍုၚ် လဴက္လး သ္ပဏာပေါဲသောၚ်က္လး ပ္ဍဲတိုက်ဗှ်လိက်နာဲယှိုဲကျေန် ဍုၚ်မတ်မလီုရ။

ဗော်ဍုၚ်မန်တၟိလေဝ် ညံၚ်ဂွံပါလုပ်မာန် ပ္ဍဲပေါဲသဳကၠဳပရေၚ်ဍုၚ်ကွာန်ဂှ် ထ္ပက်စၟတ်တဲ NCA ဂပ်ဝ်မံၚ်ရ သာ်ဝွံ မာံအံၚ်ထူ နူဂကောံမှာဇန်မန် မတိုန်ဒၟံၚ်ပ္ဍဲပေါဲသဳကၠဳသောၚ်က္လးဂှ် ဟီုရ။

“ဗော်ဍုၚ်မန်တၟိ ယဝ်ဟွံဒှ်ထ္ပက်စၟတ်တဲ NCA မ္ဂး ပ္ဍဲပေါဲသဳကၠဳပရေၚ်ဍုၚ်ကွာန်တံဂှ် နကဵုဗော်ဍုၚ်မန်တၟိ ဟိုတ်နူလုပ်စိုပ်ဟွံမာန်ဂှ်ရ သွက်ကောန်ဂကူမန်တံ ဂိခက်အာမာန်မံၚ်၊ ဗော်ဍုၚ်မန်တၟိ ထ္ပက်စၟတ်တဲ NCA တုဲ ယဝ်ပါလုပ်ကၠုၚ် ပ္ဍဲပေါဲသဳကၠဳပရေၚ်ဍုၚ်ကွာန်တံဂှ်မ္ဂး ဒှ်ဖဵုသွက်ကောန်ဂကူမန်တံဏောၚ်” မာံအံၚ်ထူ ဂးရ။

တုဲပၠန် သွက်ဂွံထ္ပက်စၟတ်တဲ NCA လိက်ကသုက်တုပ်စိုတ် ဒိုအ်ပန်ပှော်အလုံမွဲဍုၚ်ဂှ်လေဝ် ဗော်ဍုၚ်မန်တၟိ သဳကၠဳကေတ်အာလညာတ် ညးဍုၚ်ကွာန်တံပၠန်ရောၚ် ဂးလဝ်ပ္ဍဲပေါဲသဳကၠဳဂှ်ကီုရ။
လၟုဟ် ဂကောံ ဆက်သှေ်ဒၟံၚ် ပ္ဍဲ UNFC ဂှ် ဗော်ဍုၚ်မန်တၟိ NMSP ၊ဗော်တဴတက်ကရေၚ်ဍာဲ KNPP ၊ ကံၚ်ဇြဳကောန်ဂကူရခေၚ် ANC ၊ ဂကောံကောန်ဂကူဝ WNO ကေုာံ ဂကောံ ဠာဟူဒဳမဝ်ကရေတ်တေတ် LDU တံ ၅ ဂကောံရ ဂွံဆဵုကေတ်ရောၚ်။

ကမ္မတဳရေၚ်တၠုၚ်ကေၚ်ကာ ဗဟဵု UNFC ကၠောန်ကၠုၚ်လဝ် ကောံဓရီုကာမံက်တိုန် ပွိုၚ်ပိတ္ၚဲ ပ္ဍဲဂိတုမာတ် နူ၁၂ ဒဵုကဵု ၁၃ ဂှ်လေဝ် တၚ်အာတ်မိက် ၉ တၚ်ဂှ် အလဵုအသဳ ဒုၚ်တဲ ‘ဗွဲမူ’ တုဲကီုလေဝ် သွက်ဂွံက္လေၚ်သ္ပဒတန်ဂှ် သ္ပဟွံမာန်ဏီတုဲ သ္ဘၚ်သဳကၠဳအလန်ဒုတိယဂှ်လေဝ် ထပ်ဖျုဲထောံ ဟွံမွဲကဵုအပိုၚ်အခြာအခိၚ်ရ။