ဒုၚ်သဇိုၚ်ကဵု ဂကောံရပ်လွဟ်ကောန်ဍုၚ်အရၚ် (၇) ဂကောံတံ ပံၚ်ကောံဒက်ပ္တန်လဝ် “ကမ္မတဳသဳကၠဳ ပ္ညဳပ္ညပ် ပရေၚ်ဍုၚ်ကွာန်အဆံၚ်ကၟိန်ဍုၚ်”ဂှ်တုဲ ဂၠာဲအာသွဟ်ပရေၚ်ၜိုဟ်လလံ နူမ္ၚးဂၠံၚ် NCA ရောၚ် သ္ကိုပ်ဗိုလ်တာအိုက်ကျဝ် ညးတာလျိုၚ် ကဏ္ဍ လလောၚ်ပရိုၚ် နူဒပ်ပၞာန်ဗၠးၜးကောန်ဂကူတအၚ် (ပလံၚ်) PSLF/TNLA ဟီုလဴကဵုဌာန်ပရိုၚ်မန် ပ္ဍဲတ္ၚဲအေဗရဴ ၂၀ ရ။

“သွက်ဂွံဓမံက်ပ္တိုန်ပရေၚ်ၜိုဟ်လလံဂှ် ပိုဲဗက်အာ မွဲကရောံကဵု ဂကောံရပ်လွဟ် (၇) တံဏောၚ်၊ ဆ္ဂး ကဏ္ဍပရေၚ်ပၞာန်တှေ် အတိုၚ်ဂကောံမဟာမိတ် သၟဝ်ကျာပိုဲ ပန်ဂကောံဂှ်ရ ဆက်ပံၚ်ကောံ လုပ်အာ ပေါဲဗ္တိုက်ဏောၚ်” သ္ကိုပ်ဗိုလ် တာအိုက်ကျဝ် ဂးရ။

နကဵုကဏ္ဍပရေၚ်ပၞာန်မ္ဂး ဒပ်ကချေၚ် KIA ၊ဒပ်ပလံၚ် TNLA ၊ ဒပ်ကဝ်က MNDAA ၊ ဒပ်ရခေၚ် AA တံ ၄ ဂကောံရ ဆက်တန်တဴကၠုၚ် ဗီုပြၚ်မဟာမိတ် ပၞာန်သ္ကုတ်သၟဝ်ကျာတုဲ ပ္ဍဲသၞာံ ၂၀၁၇ ဂိတုဖေဖဝ်ဝါရဳ တုဲကၠုၚ်ဏံ နကဵုဂကောံမဟာမိတ်သၟဝ်ကျာ စချဳကၠုၚ်ပရေၚ်လဝေၚ်ပၞာန်ရ။

ပ္ဍဲသၞာံ ၂၀၁၇၊ ဂိတုအေဗရဴ နူ ၁၅ ဒဵုကဵု ၁၉ ဂှ် က္ဍိုပ်သ္ကိုပ်ဂကောံပၠန်ဂတးရပ်လွဟ် ကောန်ဍုၚ်အရၚ် သ္ကုတ်သၟဝ်ကျာတံ ကၠောန်ကၠုၚ်ကောံဓရီုအလန်စတုတ္ထ ပ္ဍဲဍုၚ်ပါန်ခါမ် ဌာန်ဒ္တန်ဒပ်ပၞာန်ဝ UWSA တုဲ ပံက်လဝ် ကမ္မတဳသဳကၠဳပ္ညဳပ္ညပ် ပရေၚ်ဍုၚ်ကွာန် အဆံၚ်ကၟိန်ဍုၚ်ရ။

ပ္ဍဲကောံဓရီုဏံ ဂကောံရပ်လွဟ်ဒေသသၟဝ်ကျာ (၇) ဂကောံတံ ဟွံဗက်ဂၠံၚ် NCA ရောၚ်တုဲ သွက်ဂွံဓမံက်ပ္တိုန် ကမၠောန်ပရေၚ်ၜိုဟ်လလံဍုၚ်ပၠန်ဂှ် ဗီုလဵုဂွံ ဆက်ထပါ်အာ အခက်ခုဲကမၠောန်ၜိုဟ်လလံ ဒးဆဵုဂဗမံၚ် လၟုဟ်ဏံရောဂှ် ချူခၞံလိက်ကၞပ်မွဲတုဲ ပလံၚ်ဗ္စိုပ်ကဵု အလဵုအသဳဗၟာဏောၚ် ရဴဝွံ ချူဓမံက်လဝ် ပ္ဍဲလိက်လ လောၚ်တြး ကောံဓရီုပါန်ခါမ် တ္ၚဲအေဗရဴ ၁၉ ဂှ်ကီုရ။

တုဲပၠန် အခါရ ဓမံက်ရုပ်ရဴ ကမၠောန်ပရေၚ်ၜိုဟ် လလံဂှ်ပၠန်လေဝ် ကိစ္စဒးသဳကၠဳ နမွဲမွဲဂကောံဂှ် ပါဲကၠေံ တုဲ နကဵု ကမ္မတဳသဳကၠဳပ္ညဳပ္ညပ် ပရေၚ်ဍုၚ်ကွာန် အဆံၚ်ကၟိန်ဍုၚ်ဂှ်ဟေၚ်ရ သဳကၠဳအာဏောၚ်ဂှ် ဟီုဓမံက်လဝ် ပ္ဍဲလိက်လလောၚ်တြးဂှ်ကီုရ။

ပ္ဍဲကောံဓရီုမုက်ဇဳဝွံ ညးစၞး ၂၇ တၠ နူကဵု ဗော်ကောန် ဂကူရခေၚ်(ULA/AA)၊ ဗော်ကချေၚ်(KIO/KIA)၊ ဗော်ကဝ်က (MNTJP/MNDAA)၊ဗော်တအၚ် (PSLF/TNLA)၊ဗော်သေံ(SSPP/SSA)၊ ဂကောံမာၚ်ဠာ (PSC/NDAA)၊ ဗော်ဝ(UWSP/UWSA) တံတိုန်စိုပ်လဝ်ရ။

ညးလ္ၚတ်ပရေၚ်ဍုၚ်ဗၟာ ဥူမိုၚ်မိုၚ်သဵုဂှ် “နူစကၠောန် NCA တေံရ ဂၠံၚ်ဍာန်မိက်ဂွံအာဂှ် ဟွံတုပ်ကၠုၚ် ညးသ္ကံပုဟ်။ ဂၠံၚ် UWSA မိက်ဂွံအာဂှ် (၁) ထ္ပက်စၟတ်တဲ အဆံၚ်တွဵုရးဏောၚ်။ (၂) ထ္ပက်စၟတ်တဲအဆံၚ်ကၟိန်ဍုၚ် ဏောၚ်။ (၃) ကိစ္စဒိုအ်ပန်ပှော်ဂှ် တိုန်သ္ဂုတ်သွာတ် အဆံၚ်ကၠတ်ထဝ် တေံဏောၚ်။ အရာတံဏံတုဲတှေ် ဆက်အာ ပေါဲသဳကၠဳပရေၚ်ဍုၚ်ကွာန်ဏောၚ်။ အဓိပါဲမိက်ဂွံဟီုဂှ် ဒိုအ်ပန်ပှော်တုဲတှေ် ဆက်အာပေါဲသဳ ကၠဳ ပရေၚ်ဍုၚ်ကွာန် ဏောၚ်။ ဒးဒ္ဂေတ်ဗက် ဣတေံဏီဏောၚ် ဒးဒ္ဂေတ်ဗက်ဣဏံဏီ ဏောၚ်ဟီုဂှ် ဟွံကေတ်ပုဟ် အာသောၚ်ၚ် ဏောၚ်။ ဂၠံၚ် NCA လၟုဟ်ဂှ် အတာဒၞါ အရာဒးဒ္ဂေတ်ဗက် နွံဂၠိုၚ်မံၚ်ဏောၚ် ဂကောံရပ်လွဟ် လ္ၚဵုတံ ညာတ်လဝ်သာ်ဂှ်ရ။ ဒၟါနူသဇိုၚ်ဍေံဟွံတုပ်ကၠုၚ် ဗီုဏံဂှ်ရ လညာတ်ဗၠေၚ် ကၠုၚ်ညးသ္ကံဏောၚ်ထေၚ်” ရဴဝွံ ဟီုဂးလဝ် ပ္ဍဲကဏ္ဍ ဓရီုသဳကၠဳ အစဳဇန် VOA ဘာသာဗၟာရ။