ရုၚ်စက်တိဗုတ်မတ်မလီု Mawlamyine Cement Ltd. (MCL) နွံပ္ဍဲဒေသဒဵုသာဲ ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ဒးက္လေၚ်ပ္တိုန်လိက်ဒုၚ်စဳရေၚ် စၟဳစၟတ်အကာဲအရာ မလေပ်ဇီုကပိုက် သဘာဝပွဳပွူ EIA ကုအလဵုအသဳ တွဵုရးပၠန်ဏောၚ် နူဌာနဝန်ဇၞော်ထိၚ်ဒဝ် သယံဇာတကေုာံသဘာဝပွဳပွူ ကၟိန်ဍုၚ် ၜိုန်ကဵုလဝ်စၞောန် နူဂိတုမာတ်တေံကီုလေဝ် ဒဵုလၟုဟ် ဟွံဂွံပ္တိုန်ဏီဖိုဟ် ဂွံတီကေတ် နူရုၚ်ဂကောံအလဵုအသဳ တွဵုရးဍုၚ်မန်ရ။

“MLC ဂှ် ဍေံတံဟီု နူဂိတုမေ ၁၅ ဂှ်ရ ပ္တိုန်လဝ်ကဵု ကၟိန်ဍုၚ်တေံဣရ။ ယဝ် ဍေံတံပ္တိုန်ကဵုကၟိန်ဍုၚ်တှေ် တၞးချာဲဂှ် ဒးပလံၚ်ကဵုပိုဲကီုဏောၚ်။ ဆ္ဂး လၟုဟ်လေဝ်ဟွံစိုပ်ပိုဲပုဟ်” သာ်ဝွံ အ္စာသဝ်နာဲဟံၚ်ဍုၚ် ဝန်ဇၞော်ထိၚ်ဒဝ်သယံဇာတ ကေုာံ သဘာဝပွဳပွူ နူဂကောံအလဵုအသဳ တွဵုရးဍုၚ်မန် ဟီုရ။

ရုၚ်စက်တိဗုတ်မတ်မလီု ပ္ဍဲဒေသဒဵုသာဲ (MNA)

ကၠာတေံ အလုံရုၚ်စက်မွဲမဂှ် ဆေၚ်ကဵု EIA မွဲရ ဒးကၠောန်၊ ဗွဲကြဴဏံ လိက်ဒုၚ်စဳရေၚ် စၟဳစၟတ်အကာဲအရာ မလေပ်ဇီုကပိုက် သဘာဝပွဳပွူ ဗွဲကၠာအိုတ် (IEE) သွက်ကမၠောန်တၟံခပဵု၊ ဗီုကမၠောန်ရုၚ်စက်ဂေတ်၊ ပရေၚ်ဇြဟတ်ဓါတ်လလဳ ကၠောန်ပ္တိတ်နကဵုချးတၟံ ကေုာံ သၞေဟ်က္ၜၚ် Jetty တံလေဝ် ဒးကၠောန်ကီုဏောၚ် ထပ်ကဵုလဝ်စၞောန်ပၠန် အ္စာသဝ်နာဲဟံၚ်ဍုၚ် ဟီုရ။

“လာၚ်ဇြေန်ကွတ်စက်လေဝ် ဍေံတံဒးကၠောန်ဏောၚ်။ နူဌာနထိၚ်ဒဝ်သဘာဝပွဳပွူတေံ စှေ်စိုတ် ကဵုတၚ်ထံက်ဂလာန်တှေ် ဂွံလာၚ်ဇြေန်ကွတ်စက်မာန်ဏောၚ်။ လစွံစိုတ်ပိုဲဂှ် ဟီုထ္ၜးလဝ်တုဲမံၚ်ရ။ EIA ပိဂကူ ကဵု IEE မွဲဂကူကၠောန်လဝ်ညိ ဟီုလဝ်နွံမံၚ်” သာ်ဝွံ ဥူသဵုနာၚ် ဒုသ္ကိုပ်စၞောန်ပ္ညုၚ် ဌာနက္ဍိုက်ပ် ထိၚ်ဒဝ်သဘာဝပွဳပွူ တွဵုရးမန် ဟီုရ။

စပ်ကဵုအခိၚ် စရေၚ်တၠုၚ် Test Running ကေုာံ Commerical Running တုဲ ဒးပ္တိုန်ကဵုအလဵုအသဳ တွဵုရးဏောၚ်။ သၟုဟ်ဓါတ်တံဂှ် ကၠောန်ပ္တိတ်လဝ်ဗီုလဵုတုဲ ဒဒှ်ရ ဟွံမွဲကဵုအန္တရာဲရောၚ်ဂှ်လေဝ် ဒးထ္ၜးသက်သဳမာန်ဏောၚ်။ လိက်ဒုၚ်စဳရေၚ်ဂှ် ပလံၚ်ဗ္စိုပ်ကဵုဌာန ဆေၚ်စပ်တံတုဲမ္ဂး လ္ပကဵုၜက်အာ ၁၅ တ္ၚဲ ဒးလဴထ္ၜးကဵု ညးဍုၚ်ကွာန်တံ ပရူပရာလိက်ဒုၚ်စဳရေၚ်ဂှ်ဏောၚ် ဥူသဵုနာၚ် ဂးရ။

ရုၚ်စက်တိဗုတ်မတ်မလီု Mawlamyine Cement Ltd. (MCL) ဝွံ ကမၠောန်ရုၚ်စက်ညံၚ်ဂွံဂေတ် ဒးကေတ်ဇြဟတ်ဓါတ်လလဳ ၄၉ မဂ္ဂါဝတ်ဂှ် ဟိုတ်နူပ္တိတ်ကေတ်မံၚ် နကဵုချးတၟံ ၄၀ မဂ္ဂါဝတ်ဂှ်ရ ရုၚ်စက်ဏံ ကေါန်ဒေသတံ ဒ္စဵုဒ္စးမံၚ်ဖိုဟ်ရ။

သွက်ဂွံဗဒေံါကဵု အစဳဇန် စကာချးတၟံဂှ် ကောန်ဒေသတံ ပ္တိုန်ထ္ၜးလဝ်ကဵု အလဵုအသဳ ကေုာံ ကၠတ်ထဝ် တွဵုရးမန်ကီုတုဲ မွဲလ္ပာ်ဂှ် ပ္ဍဲဒေသဒဵုသာဲ ပွိုၚ်ဍုၚ်ကျာ်မြဟ်ဂှ်လေဝ် ပစူပတဴလဝ် မလိက်မ္ဂး “ ဟွံမွဲပၟိက်ကဵုချးတၟံ”၊ ဗက်ပရး လိက်ကဵုဓဝ်ကၠိုဟ်ခၠၚ်၊ပကောံမၞိဟ်တုဲ ထ္ၜးဆန္ဒ သာ်ဝွံ ညံၚ်ဟဂွံစကာချးတၟံဂှ် ဒ္စဵုဒ္စး ထ္ၜးကၠုၚ်ဆန္ဒ နဗီုပြၚ်နာနာသာ်ရ။

ရုၚ်စက်တိဗုတ် မတ်မလီု MCL နွံပ္ဍဲဒေသ ကအ်ဒုန် ကအ်ပၞဟ် ပွိုၚ်ဍုၚ်ကျာ်မြဟ်ဂှ်ဝွံ မွဲမွဲတ္ၚဲ ပ္တိတ်တိဗုတ် လျိုၚ် (၅) လ္ၚီတာန်ရောၚ်ဒှ်တုဲ ပ္ဍဲဂိတုမာတ် ၂၇ ၊ သၞာံ ၂၀၁၆ တေံ ဥူအုၚ်မျေအ် သ္ကိုပ်ဝန်ဇၞော်တြေံ တွဵုရးဍုၚ်မန် ပံက်ကဵုစက်ပြိုက်ရိုက် ပ္ဍဲရုၚ်စက်ဂှ်တုဲ စမ်ၜတ်ဗဂေတ်ကၠုၚ်စက်ရ။