သွက်ဂွံထ္ပက်စၟတ်တဲ NCA လိက်ကသုက်တုပ်စိုတ်ဒိုအ်ပန်ပှော်အလုံမွဲဍုၚ်ဂှ် ကဵုအခိၚ် ၜိုတ် ၃ ဂိတုညိ နူဗော်ဍုၚ်မန်တၟိအာတ်မိက်လဝ် ဗွဲလၟေၚ်မေတ္တာရောၚ် သာ်ဝွံ ပ္ဍဲအဝ်ဂါတ် ၂၃ ကြဴနူညးစၞးၜါလ္ပာ်တံ ဆဵုဂဗသဳကၠဳညးသ္ကံတုဲဂှ် သ္ကိုပ်ဝန်ဇၞော် တွဵုရးဍုၚ်မန် ဟီုကဵုအ္စာပရိုၚ်တံရ။
သ္ကိုပ်ဝန်ဇၞော်တွဵုရးဍုၚ်မန် ဒံက်တာအေဇြာန်က္ဍိုက်ပ် ဂကောံအလဵုအသဳ တွဵုရးဍုၚ်မန် ကေုာံ ဖက်ဆောညးအုပ်ကာ ဗော်ဍုၚ်မန်တၟိ သ္ကိုပ်ပၞာန်ဇဲယက္ဍိုက်ပ် ဂကောံညးစၞးဗော်ဍုၚ်မန်တၟိတံ ဆဵုဂဗညးသ္ကံ လက်ထက်သ္ကိုပ်ဝန်ဇၞော်လၟုဟ်ဏံ အလန်ဒုတိယ ပ္ဍဲရုၚ်အလဵုအသဳ တွဵုရးမန် ဍုၚ်မတ်မလီုတုဲ ဗော်ဍုၚ်မန်တၟိ အာတ်မိက်လဝ်အခိၚ် ဗွဲလၟေၚ်မေတ္တာရောၚ် ဂးရ။
သ္ကိုပ်ဝန်ဇၞော်တွဵုရးမန် ကေုာံ ညးတာလျိုၚ်ဂမၠိုၚ် နူဗော်ဍုၚ်မန်တၟိ (Facebook)
ဂတနူဏံ အလဵုအသဳ တွဵုရးမန် ကဵု ဗော်ဍုၚ်မန်တၟိတံ လၟေၚ်မွဲဂိတု မွဲဝါ ညံၚ်ဂွံကၠောန်အာ ပေါဲဆဵုဂဗသဳကၠဳ၊ ပ္ဍဲအခိၚ် အကြာအကြာဂှ်လေဝ် နွံပၟိက်တှေ် ဗီုနွံပၟိက် ညံၚ်ဂွံဆဵုဂဗမာန်ဂှ် တုပ်စိုတ်ညးသ္ကံနွံ သ္ကိုပ်ဝန်ဇၞော် ဂးရ။
ညးစၞးဗော်ဍုၚ်မန်တၟိ နာဲဝေန်လှ ညးလျိုၚ်ဗွိုၚ်အပ္ဍဲဍုၚ်ဂှ်လေဝ် “ သွက်ဂွံထ္ပက်စၟတ်တဲ NCA ဂှ် အဃောဆဵုညးသ္ကံကဵု သ္ကိုပ်ဝန်ဇၞော် ပ္ဍဲအလန်ပထမတေံဂှ်လေဝ် ညးတေံဖ္တိုက်ဖၟောဝ်လဝ်ကီုရ၊ ဆဵုဂဗအလန်ဏံဂှ်လေဝ် ထပ်ဖ္တိုက်ဖၟောဝ်ပၠန်ရ၊ ပိုဲလေဝ် ညံၚ်ဂွံပါလုပ်မာန် ပ္ဍဲပေန်လုၚ် ၂၁ ဗွဝ်ကၠံ အလန်တတိယတေံဂှ် အကြာဏံ ညံၚ်ဂွံဒှ်ထ္ပက်စၟတ်တဲမာန် ဂစာန်ဒၟံၚ်ဖိုဟ်ရ၊ သွက်ဂွံထ္ပက်စၟတ်တဲ NCA ဏံဂှ်လေဝ် ဂစာန်ဒၟံၚ်လၟိုန်ကီုဏောၚ်” ဂးရ။
တုဲပၠန် ကိစ္စ ညံၚ်ဂွံကဵုအခေါၚ် ဗ္တောန်လိက်မန် ပ္ဍဲအခိၚ်ဘာအလဵုအသဳဂှ်ကီု၊ ကိစ္စရုၚ်စက်တိဗုတ် မတ်မလီု MCL စကာဒၟံၚ်ချးတၟံဂှ်လေဝ် ညံၚ်ဂွံလှာဲစကာ စုတ်အဇာ စၞပရက်တၞဟ်ဟ်ဂှ်ကီု ဟီုဖ္တိုက်ဖၟောဝ်လဝ် အလဵုအသဳတွဵုရးမန်ကီုဏောၚ် ဂွံတီရ။
သ္ကိုပ်ဗိုလ်ဇၞော် ဝေန်နာၚ်ဥူ ဝန်ဇၞော်ဂီုကၠီုကေုာံကေၚ်ကာပယျဵုဓနက် နူဂကောံအလဵုအသဳ တွဵုရးဍုၚ်မန်ဂှ်လေဝ် “ပရူပရာကေုာံ စေဝ်ပၞောန်ဖၟိုတ် ပါဒၟံၚ်ပ္ဍဲလိက်ကသုက် NCA ဂှ် ချူလဝ် အရၚ်အလဵုအသဳကီု အရၚ်ဒပ်ပၞာန်ကီု ဟွံမွဲပုဟ်၊ ကဵုလဝ်ပရဲကဵု မုရောဟီုမ္ဂး သ္ပဇြိုဟ်နက်ကဵု ဂကောံရပ်လွဟ် ကောန်ဍုၚ်အရၚ်တံတုဲမှ အလဵုအသဳကဵုဒပ်ပၞာန် တုပ်လဝ်စိုတ်ဏောၚ်၊ လိက်ကသုက်ချူလဝ် အလိုက်ပၟိက်စိုတ်ညးတံရဂှ် မုဟိုတ် ဟွံဒှ်ထ္ပက်စၟတ်တဲရောဟီုဂှ် ဟိုတ်ဍေံ နွံလ္ပာ်ညးတံဏောၚ်” ဂးရ။
လိက်ကသုက် NCA နာဲဟံသာ ဒုဥက္ကဌ ဗော်ဍုၚ်မန်တၟိ က္ဍိုက်ပ်တုဲချူလဝ်ဂှ် ဗော်ဍုၚ်မန်တၟိရ ဟွံထ္ပက်စၟတ်တဲ လလုဲသှေ်မံၚ်ဏောၚ် ညးတေံ ထံက်ထ္ၜးရ။
ပ္ဍဲသၞာံ ၂၀၁၂ လက်ထက်အလဵုအသဳ သမ္မတတိၚ်သိၚ်တေံ ဗော်ဍုၚ်မန်တၟိ ထ္ပက်စၟတ်တဲ ဒိုအ်ပန်ပှော် အဆံၚ်တွဵုရး၊ အဆံၚ်ကၟိန်ဍုၚ် တုဲကီုလေဝ် မွဲကရောံကဵု ကောန်ဂကောံ UNFC ဂှ် ဒဵုလၟုဟ် ဟွံဒှ်ထ္ပက်စၟတ်တဲ NCA ဏီရ။
