သွက်ဂွံပ္တန်ဗဒှ်ခအံၚ်ဝဳဖ္ဍတ်တိရစ္ဆာန် (မွေးမြူရေးဇုံ) ပ္ဍဲဇၟာပ်ပွိုၚ်ဍုၚ် တွဵုရးဍုၚ်မန်ဂှ် နူဂကောံအလဵုအသဳ တွဵုရးဍုၚ်မန် ဂၠာဲဒၟံၚ်တိဂအာၚ်ဖိုဟ်ရောၚ် သာ်ဝွံ ဒုၚ်သဇိုၚ်ကဵု ညးစၞးမွဲတၠသၟာန်လဝ် ပ္ဍဲကောံဓရီုလၟေၚ်သတ္တမ ကၠတ်ထဝ်တွဵုရးဍုၚ်မန် အလန်ဒုတိယ တ္ၚဲလက္ကရဴအိုတ် သေပ်တေမ်ဗာ (၂၀) ဂှ်တုဲ နူဂကောံအလဵုအသဳ ဟီုကဵုဏာသွဟ်သာ်ဂှ်ရောၚ် ဂွံတီကေတ်ရ။

သွက်ဂွံဗဒှ်ခအံၚ် ပရေၚ်ဝဳဖ္ဍတ် ပ္ဍဲပွိုၚ်ဍုၚ်မုဟ်ဍုၚ်ဂှ် အစဳဇန် နွံဟာ၊ဟွံမွဲဟာ ဒဝ်မျသိၚ်္ဂဳမဝ် အမာတ်ကၠတ်ထဝ်တွဵုရး နူဒေသမာဲလၟိဟ် (၁) ပွိုၚ်ဍုၚ်မုဟ်ဍုၚ် သၟာန်တိုန်ပ္ဍဲကောံဓရီုကၠတ်ထဝ်တုဲ ဥူထောန်ဌေ ဝန်ဇၞော်ပရေၚ်တဵုလွဳ၊ပရေၚ်ဝဳဖ္ဍတ်ကေုာံပရေၚ်ဆက်စၠောံပလံၚ်ဗ္စိုပ် နူဂကောံအလဵုအသဳ တွဵုရးဍုၚ်မန် က္လေၚ်ကဵုဏာသွဟ် အတိုၚ်ဗွဲလ္တူတေံရ။

ရန်ကဵုကမၠောန်ပရေၚ်ပိုန်ဂြပ်တုဲ ဝဳဖ္ဍတ်မံၚ် စာၚ် ကၠိက် အဒါ ပ္ဍဲပွိုၚ်ဍုၚ်မုဟ်ဍုၚ်ဂှ် ညံၚ်ဂွံဗၠးနူ ပွညးတၞဟ်ကၠုၚ်တေၚ်ကီု၊ညံၚ်ဂွံဗၠးဘဲ ယဲကၠောံထၞာန်ကီု ဂၠာဲရာန်ကေတ်တိကၠအ် သောၚ်ၚ်ၜးၜး မဗၠးနူဗွိုၚ်မၞိဟ်မံၚ်တံတုဲ ညံၚ်ဂွံဗဒှ်ကေတ်ဒၞါဲဝဳဖ္ဍတ်သောၚ်ၚ်ၜးၜး။ တုဲပၠန် ရန်ကဵုပရေၚ်ပိုန်ဂြပ် သ္ၚိဌာန်တုဲ ဝဳဖ္ဍတ်မံၚ် တိရစ္ဆာန် ပ္ဍဲဂအာၚ်သ္ၚိဇကုတံဂှ်လေဝ် ပရေၚ်ဂီုကၠီုဇဳဝ (ဂီုကၠီုယဲဘဲ) တိရစ္ဆာန် ဍိုန်လျမံၚ်ကီုတုဲ ၜိုတ်ထေက်ကဵုအံၚ်ဇၞးဂှ် ဍေံဟွံအံၚ်ဇၞး ဍေံဟွံဗြေဝ်ဗြော် ဒၟါနူဂှ်ရ ဒၞါဲခအံၚ် ပရေၚ်ဝဳဖ္ဍတ် သောၚ်ၚ်ၜးၜး ဗၠးနူဗွိုၚ်မၞိဟ်ဂှ် ပ္တန်ဗဒှ်ထေက်ရောၚ် ဥူထောန်ဌေ ဂးရ။

“လၟုဟ် သွက်ဂွံပ္တန်ဗဒှ်ခအံၚ်ဝဳဖ္ဍတ်ဂှ် အတိုၚ်စၞောန် သ္ကိုပ်ဝန်ဇၞော် အလဵုအသဳ တွဵုရးမန်ပိုဲ ဆပွိုၚ်ဍုၚ်မုဟ်ဍုၚ်သၟးဟွံသေၚ် ပ္ဍဲပွိုၚ်ဍုၚ်တၞဟ်ဟ်တံလေဝ် နူဌာနက္ဍိုက်ပ် ဖန်ဖက်ပြုပြေၚ်တိဗ္ၚ ကေုာံစရၚ်အၚ်ကီု သီုကဵုဌာနမဆက်စပ်တံကီု ပံၚ်တုဲဂၠာဲမံၚ်တိဂအာၚ်ဖိုဟ်ရောၚ်”သာ်ဝွံ ဝန်ဇၞော် ဥူထောန်ဌေ ဂးရ။

အလဵုအသဳ တွဵုရးဍုၚ်မန်ဂၠာဲမံၚ်တိဂအာၚ် သွက်ဂွံဗဒှ်ခအံၚ်ပရေၚ်ဝဳဖ္ဍတ်ဂှ် အောန်အိုတ်ဒးနွံကဵုသမၠဲ နူ ရ ဨက ဒဵုကဵု ၁၀ ဨကရောၚ်တုဲ ပ္ဍဲပွိုၚ်ဍုၚ်လ္ၚဵု သ္ဂောံဂွံဂအာၚ်ဂှ် ခက်မံၚ်ဖိုဟ် သ္ကိုပ်ဝန်ဇၞော် တွဵုရးဍုၚ်မန် ဒံက်တာအေဇြာန် ဂးရ။

“လၟုဟ် ပ္ဍဲပွိုၚ်ဍုၚ် ကျာ်ထဝ်၊ ၜဳက္လေၚ်၊ သဓီု (၃) ပွိုၚ်ဍုၚ်ဏံဂှ်ရ ဂၠာဲဂွံလဝ်ဂအာၚ်တုဲ။ ပ္ဍဲပွိုၚ်ဍုၚ် ရေဝ်၊ ဇြပ်ဗု၊ မုဟ်ဍုၚ် (၃) ပွိုၚ်ဍုၚ်ဏံဂှ် သွက်ဂွံသမၠဲပ္တိတ် ဂၠာဲဂအာၚ်ဟွံဂွံဏီ။ ပ္ဍဲပွိုၚ်ဍုၚ် ဂၠာဲဂအာၚ်ဂွံဂှ်ရ ကၠောန်ပ္တန်အာကၠာဏောၚ်” သာ်ဏံ ဒံက်တာအေဇြာန် ဂးရ။

ပ္ဍဲပွိုၚ်ဍုၚ်သှေ်မံၚ်တံဂှ်လေဝ် ဂွံဂအာၚ်မ္ဂး ဓမံက်အာရုပ်ရဴကီုဏောၚ်၊ ဂအာၚ်ဂၠာဲဂွံလဝ်ဂှ် ယဝ်ဒှ်တိ အလဵုအသဳပိုၚ်မ္ဂး ရဲကၠောန်ကမၠောန်ပရေၚ်ဝဳဖ္ဍတ်တံ ဒးလိၚ်ကေတ်အာတုဲ ယဝ်ဒှ်ဂအာၚ် ရာန်လဝ် နကဵုသြန် (ဗာတ်ဂျေတ်) အလဵုအသဳမ္ဂး က္လေၚ်သွံကဵုဏောၚ်။ ကမၠောန်ပ္တန်ခအံၚ်ပရေၚ်ဝဳဖ္ဍတ်ဏံ ရုပ်ရဴမံက်မ္ဂး ကုညးဝဳဖ္ဍတ် သွက်ပရေၚ်ပိုန်ဂြပ်သ္ၚိတံဂှ် ရံၚ်လ္တူအကာဲအရာ မဇီုကပိုက်ကဵု သဘာဝပွဳပွူတုဲ ကေတ်အာအရေဝ်ဏောၚ် သ္ကိုပ်ဝန်ဇၞော် ဂးရ။

ကၠတ်ထဝ်တွဵုရးဍုၚ်မန် အလန်ဒုတိယ ကၠောန်ကၠုၚ်လဝ်ကောံဓရီုလၟေၚ်သတ္တမဂှ် သေပ်တေမ်ဗာ ၂၀ ဂှ် ဒှ်တ္ၚဲလက္ကရဴအိုတ်ရ။ ပ္ဍဲကောံဓရီုဏံ လ္တူဂလာန်သၟာန် နွံကၠုၚ် (၄၃) ဂလာန်ဂှ် က္လေၚ်သှ်ကဵုတုဲ ရန်ကြန်လဝ် သွက်ဂွံထပ်ဗပေၚ်သြန်ဗာတ်ဂျေတ်တွဵုရးမန် ပ္ဍဲသၞာံဘဏ္ဍာ ၂၀၁၇-၂၀၁၈ ဏံဂှ်လေဝ် သ္ပလဝ်ဒ္တန်ကီုရ။

တုဲပၠန် နူကဵုရုၚ်စက် MCL သွက်ဂွံသိုၚ်ရုၚ်စက်ဓါတ်လလဳ ၂၀ မဂ္ဂါဝတ် (၂) မ စကာချးတၟံဂှ် ဟိုတ်နူဟဂွံအာတ်လဝ်အခေါၚ်ဂှ်ရ ကေတ်ကဵုအရေဝ် အတိုၚ်ဥပဒေညိ ဂလာန်အာတ်မိက် ဖ္တိုက်ဖၟောဝ်လဝ်သာ်ဏံကီု၊ ရုၚ်စက်ထ္ၜိုတ်တံ ညံၚ်ဂွံဗၠးသ္ၚောဲနူဗွိုၚ်ညးဍုၚ်ကွာန် ညံၚ်ဂွံဗၠးသ္ၚောဲနူကွာန် အရာပ်ဂှ်လေဝ် ပဆုဲပြံၚ် သိုၚ်ခၞံ ပ္ဍဲဌာန်သ္ၚောဲသ္ၚောဲညိ ဂလာန်အာတ်မိက် ဖ္တိုက်ဖၟောဝ်သာ်ဏံကီု သီု (၂) ဂလာန်ဏံ သ္ပလဝ်ဒ္တန်ကီု ဂွံတီကေတ်ရ။