ပ္ဍဲတွဵုရးဍုၚ်မန်ဝွံ ဆေၚ်သွံဒၟံၚ်အရက်ဂမၠိုၚ်ဂှ် နကဵုလၟေၚ်ဂိတုစၟဳစၟတ်မံၚ်တုဲ ပ္ဍဲသၞာံဘဏ္ဍာ (၂၀၁၇-၂၀၁၈) နူဂိတုအေဗရေဝ် ဒဵုကဵုဂိတုသေပ်တေမ်ဗာဂှ် ဆေၚ်သွံအရက် (၅၄) ဆေၚ် ဖံက်ပလီုစေဝ်ပၞောန်အခေါၚ်(လာၚ်ဇြေန်)တုဲ ကေတ်လဝ်အရေဝ်နွံရောၚ်ဂှ် ဥုကာန်ဝေန် ညးသၟဝ် (လက်ထောက်) သ္ကိုပ်စၞောန်ပ္ညုၚ် ဌာနက္ဍိုက်က္ဍိုပ် ပရေၚ်အုပ်ဓုပ်နာနာ တွဵုရးဍုၚ်မန် ဟီုရ။

“ဆေၚ်တံဂှ်တှေ် နကဵုလၟေၚ်ဂိတု ဟွံပိုတ်သ္ကုတ် ကၠောန်ပမံၚ် ပရေၚ်စၟဳစၟတ်ကီုရ။ ပ္ဍဲဂိတုဏံဂှ်လေဝ် ဆေၚ်ကေတ်လဝ်အရေဝ်တံ စရၚ်တိုန်ကၠုၚ်မံၚ်ဏီရ။ ဂိတုဟွံအိုတ်ဏီတှေ် ဟွံဂွံသရောပ်စရၚ်ဏီ၊ ဟီုချိုတ်တ်ပၠိုတ်တ် ဟွံဂွံဏီပုဟ်။ ညးစၞးကၠတ်ထဝ်တံ ဟီုကၠုၚ်ညိညိတှေ် လက္ကရဴဏံ ဗွဲမဂၠိုၚ် ကၠောန်ကၠုၚ် ပရေၚ်ရပ်စပ်ကီုရ” သာ်ဝွံ ဥုကာန်ဝေန် ဟီုရ။

ဆေၚ်ဒးဒုၚ်ကေတ်လဝ်အရေဝ်တံဂှ်ဝွံ အလန်ပထမဂှ် ဒးကဵုဒဏ်သြန်ကီု၊ အလန်ဒုတိယ ထပ်ကလေၚ်ရပ်ဂွံပၠန်မ္ဂး ပဲါနူဒဏ်သြန်တုဲ အတိုၚ်ဥပဒၜေူမာဲ (ယစ်မျိုးဥပဒေ) ဂှ်မ္ဂး ဒဵုကဵုဒးဒဏ်ထံၚ်ကီု ဒးဒုၚ်ကေတ်အရေဝ်ရောၚ်ဂှ် ဂွံတီကေတ် နူကဵုဌာနက္ဍိုက်က္ဍိုပ် ပရေၚ်အုပ်ဓုပ်နာနာ တွဵုရးဍုၚ်မန်ရ။

ဆေၚ်ဒးဒုၚ်ကေတ်လဝ်အရေဝ် ဗွဲမဂၠိုၚ်တံဝွံ နူကဵုပွိုၚ်ဍုၚ်ရေဝ်၊ ပွိုၚ်ဍုၚ်ကျာ်ထဝ် ကေုာံ ပွိုၚ်ဍုၚ်မတ်မလီုတံ ဒှ်ဂၠိုၚ်ရဂှ် ဥုကာန်ဝေန် ဆက်ဟီုလဝ်ရ။

ပ္ဍဲကဵုအလုံတွဵုရးဂှ်ဝွံ ဆေၚ်အရက် ဂွံလဝ်အခေါၚ်(လာၚ်ဇြေန်) နွံဒၟံၚ် (၁၉၇၂) ဆေၚ်တုဲ ဂကူအခေါၚ်(လာၚ်ဇြေန်) သွံအရက် (၁၃) ဂကူ ဖျေံကဵုလဝ်တုဲ အပ္ဍဲဂှ်ဝွံ ဆေၚ်သွံအရက်ဗု ဂၠိုၚ်အိုတ်ရောၚ်ဂှ် ဂွံတီကေတ် အတိုၚ်စရၚ် ဌာနက္ဍိုက်က္ဍိုပ် ပရေၚ်အုပ်ဓုပ်နာနာ တွဵုရးရ။

အရက်ဗု မကေတ်လဝ်အခေါၚ်(လာၚ်ဇြေန်) ဂၠိုၚ်အိုတ်ဂှ်ဝွံ သွံဒၟံၚ် အရက်ဂကူတၞဟ်ဟ်ကီုတုဲ ဒးကၠောန်သ္ပမံၚ် ပရေၚ်စၟဳစၟတ် မွဲဏှေံမွဲဏှေံရောၚ် ဥုကာန်ဝေန် ဆက်ဟီုလဝ်ရ။

“အခေါၚ်(လာၚ်ဇြေန်) အရက်ဗုဂှ် နွံၜိုတ်မွဲကိုဋ်ရ။ FL 17 (နိုၚ်ၚံခြားအရက်များ ဟိုတယ်နှၚ့် နားနေခန်း ဥပစာတွၚ်း သောက်သုံးရန် ကောၚ်တာဖွၚ့်၍ လက်လီရောၚ်းချခွၚ့်လိုၚ်စၚ်) ဂှ် နွံ (၁၂) ကိုဋ်ရ။ ၚုဟ်တၞဟ်ခြာ(ကွာ)လောန်တှေ် ကေတ်အခေါၚ်(လာၚ်ဇြေန်) အရက်ဗုတုဲ သွံဒၟံၚ် FL 17 ဂှ်လေဝ် နွံရ” သာ်ဝွံ ညးတၠဆေၚ်အရက် ဂွံလဝ်အခေါၚ်(လာၚ်ဇြေန်) FL 17 ပ္ဍဲဍုၚ်မတ်မလီု မွဲတၠဂှ် ဟီုတုဲ ဂွံတီကေတ်ရ။

ပ္ဍဲတွဵုရးဍုၚ်မန်ဝွံ သၞာံဘဏ္ဍာ (၂၀၁၇-၂၀၁၈) နူဂိတုအေဗရေဝ် ဒဵုကဵုဂိတုသေပ်တေမ်ဗာ အပ္ဍဲပွိုၚ် (၆) ဂိတုဂှ် ကလိဂွံအကံက်အခေါန် နူကဵုအခေါန်ၜူမာဲ (ယစ်မျိုးလိုၚ်စၚ်ခွန်) (၅၇၂၀၀) ကိုဋ်(ဒကေဝ်)ပြၚ် နွံရောၚ်ဂှ် ဂွံတီကေတ် နူကဵုဌာနက္ဍိုက်က္ဍိုပ် ပရေၚ်အုပ်ဓုပ်နာနာ တွဵုရးဍုၚ်မန်ရ