မူသဇိုၚ် ဖေဝ်ဒရေဝ် မခိုၚ်ကၠိုက်မွဲ ညံၚ်ဂွံဒှ်ဂှ် နူပေါဲသဳကၠဳပရေၚ်ဍုၚ်ကွာန် မန် အဆံၚ်ကောန်ဂကူဏံ ဂစာန်လွဳရာအာရောၚ် သာ်ဝွံ ညးမၞုံကဵုအခေါၚ်ဟီုဂး လ္ပာ်ဗော်ဍုၚ်မန်တၟိ နာဲအံၚ်မ္ၚဵု နူကမ္မတဳသ္ကိုပ်သ္က ပေါဲသဳကၠဳပရေၚ်ဍုၚ်ကွာန် အဆံၚ်ကေါန်ဂကူ တွဵုရးမန် ဟီုကဵုဌာန်ပရိုၚ်မန်ရ။
“ပ္ဍဲကဏ္ဍဇၞော် (၄) မတွံဂး ပရေၚ်ဍုၚ်ကွာန်၊ ပရေၚ်ပိုန်ဂြပ်၊ ပရေၚ်မၞိဟ်၊ ပရေၚ်တိဍာ် ကေုာံသယံဇာတတံဂှ် ညံၚ်သ္ဂောံဂွံ မူသဇိုၚ်ဖေဝ်ဒရေဝ်ခိုၚ်ၚ်ကၠိုက်က်မွဲကီု ညံၚ်ဂွံဗဗွဲကဵု မူပၞောန် UPDJC ဖျေံလဝ်ကီုဂှ် နူပိုဲကမ္မတဳသ္ကိုပ်သ္ကဏံ ထံက်ဗပေၚ်ကဵု ဂၠံၚ်စၞောန်ကီုဏောၚ်” နာဲအံၚ်မ္ၚဵုဂးရ။
အစဳဇန်ပေါဲသဳကၠဳ ပရေၚ်ဍုၚ်ကွာန် မန် အဆံၚ်ကောန်ဂကူဂှ် နူဂိတုမေ ၅ ဒဵုကဵု ရ ရန်လဝ် ကၠောန်သ္ပ တ္ၚဲပံက်-ကၟာတ်အသေအဟာန် ဒၞာဲရုၚ်ဝေၚ်ဇြဟတ် ဍုၚ်ရေဝ်တုဲ သွက်အစဳဇန် သဳကၠဳကိစ္စကဏ္ဍဇၞော် ၄ ဂှ် ပါ်ဖျေံဒၞါဲဝါဲ ပ္ဍဲ ဘာအထက(၁)၊ ပ္ဍဲဇြပ်သ္ဘၚ်ဓဝ် ကျာ်ၜါမွဲဇံၚ် ကေုာံဇြပ်မန် နွံဇရေၚ်ဇရေၚ်တံဂှ်တုဲ သဳကၠဳအာဏောၚ် ရန်လဝ်သာ်ဂှ် နာဲအံၚ်မ္ၚဵု ဂးရ။
ဝိုၚ်ကောံဓရီုပ္ညဳပ္ညပ် သွက်ပေါဲသဳကၠဳပရေၚ်ဍုၚ်ကွာန် မန် အဆံၚ်ကောန်ဂကူ-(Min Aung Htoo)
စပ်ကဵုပေါဲဏံတုဲ မာံအံၚ်ထူ (က)ဗညာမန် ညးအုပ်ကာ ကမ္မတဳကၠောန်ဗဒှ် ပေါဲသဳကၠဳပရေၚ်ဍုၚ်ကွာန် မန် အဆံၚ်ကောန်ဂကူ သ္ဂးဂှ်“သွက်ဂွံသဳကၠဳကိစ္စကဏ္ဍဇၞော် ၄ ဏံ ဘိက်လဝ်ညးစၞး ၅၀၀ တၠ၊ ပ္ဍဲတ္ၚဲပံက်အသေအဟာန်ဂှ်တှေ် ဝန်ဇၞော် နူကၟိန်ဍုၚ်တေံ၊ ပူဂဵုရေၚ်တၠုၚ်ဒၟံၚ် ကမၠောန်ပရေၚ်ၜိုဟ်လလံ မပါဒၟံၚ် ပ္ဍဲဂကောံ NRPC,PC,JMC တံ၊ ကမ္မတဳသ္ကိုပ်သ္က အဆံၚ်တွဵုရးတံ၊ ဂကောံအလဵုအသဳတွဵုရး၊ ဂကောံရပ်လွဟ်ကောန်ဍုၚ်အရၚ်တံ၊ ဗော်ပရေၚ်ဍုၚ်ကွာန်တံ ပါလုပ်ပ္ဍဲတ္ၚဲပံက်ဂှ်ဏောၚ်တုဲ သီုဖအိုတ် မၞိဟ်တိုန်စိုပ် နွံမာန်ဏောၚ် အကြာ ၈၀၀ ကဵု ၉၀၀ တၠ” ဂးရ။
သၟာၚ်နူဂှ်ပၠန် ပရူပရာ သွက်ဂွံပ္တိုန်ထ္ၜး ပ္ဍဲသ္ဘၚ်သဳကၠဳပရေၚ်ၜိုဟ်လလံကၟိန်ဍုၚ်- ကောံဓရီုပေန်လုၚ် ၂၁ ဗွဝ်ကၠံ အလန်တတိယတေံကီု၊ မူ ထေက်ကဵုဒးသ္ပသဇိုၚ် သွက်အလုံကမၠောန်ပရေၚ်ၜိုဟ်လလံတံဂှ်ကီု သဳကၠဳအာကီုဏောၚ် မာံအံၚ်ထူ ဆက်ဟီုရ။
“ပ္ဍဲပေါဲသဳကၠဳပရေၚ်ဍုၚ်ကွာန်ဏံ ၜိုတ်ဒှ်မာန် လၟိဟ်မၞိဟ်ဗြဴတံ ညံၚ်ဂွံပါလုပ်ဂၠိုၚ်ၚ်ဂှ် ဘိက်အာကီုဏောၚ် အဲစှေ်လဝ်စိုတ်ဗီုဂှ်၊ ဆ္ဂး ဘိက်လဝ်ကီုလေဝ် အခါတိုန်စိုပ်ကွေံကွေံတေံ တိုန်စိုပ်ၜိုဟ်လဵုရောဂှ် ဟီုဟွံဒးဏီ၊အဃော ပေါဲသောၚ်လၟေၚ်ကမၠောန် NCA ပ္ဍဲဗ္ဒိုပ်ညဳသာ တေံဂှ် မၞိဟ်ဗြဴပါလုပ်အောန်ကီုလေဝ် အခါကၠောန် ပ္ဍဲဗ္ဒိုပ်ဝါဇြေန်ဂှ် မၞိဟ်ဗြဴပါလုပ်ဂၠိုၚ်ကၠုၚ်၊ ဒၟါနူဂှ်ရ ပ္ဍဲပေါဲသဳကၠဳလၟုဟ်ဏံ အဲစၟဳလဝ် မၞိဟ်ဗြဴတံ ပါလုပ်ဂၠိုၚ်ဏောၚ်” သာ်ဝွံ မိရတ်ဆာန် ဥက္ကဌ ဂကောံသၟတ်မန်လညာတ်တၟိ MYPO ဂးရ။
ပ္ဍဲအရာလၟေၚ်ဒဒှ်ပရေၚ်ၜိုဟ်လလံ ဍုၚ်ဗၟာကီု၊ပ္ဍဲလၟေၚ်ကမၠောန်ဂမၠိုၚ်ကီု မၞိဟ်ဗြဴတံ ဒးကဵုပါလုပ် ၃၀% ရောၚ် ဂးလဝ်သာ်ဂှ်ကီုလေဝ် အခါက္လေၚ်ရံၚ်ပ္ဍဲသ္ဘၚ်သဳကၠဳပရေၚ်ၜိုဟ်လလံကၟိန်ဍုၚ်- ကောံဓရီုပေန်လုၚ် ၂၁ ဗွဝ်ကၠံတံဂှ်မ္ဂး မၞိဟ်ဗြဴပါလုပ်အောန်မံၚ် ဂွံဆဵုရ။
ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ အလိုက်ဂကူမန်ဏံတုဲမ္ဂး ဂိတုမေ သတ္တဟ လက္ကရဴအိုတ်တေံ ရန်လဝ်သွက်ဂွံကၠောန် သ္ဘၚ်သဳကၠဳပရေၚ်ၜိုဟ်လလံဍုၚ်- ကောံဓရီုပေန်လုၚ် (၂၁) ဗွဝ်ကၠံ အလန်တတိယရောၚ် ဂးဒၟံၚ်ပ္ဍဲပရိုၚ်တံကီုလေဝ် သ္ပဒ္တန်ချိုတ်တ်ပၠိုတ်တ်ဟွံဂွံဏီ။
စနူသၞာံ ၂၀၁၅ ဂိတုအံက်တဝ်ဗာ ၁၅ တေံ ဒဵုကဵုတ္ၚဲဏံ ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲ နွံ ၁၀ ဂကောံကီုလေဝ် ဂကောံဂွံကၠောန်လဝ် ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူတုဲဂှ် နွံဆ ကရေၚ်၊ ချေၚ်၊ ပအိုဝ် (၃) ဂကူဟေၚ်ရ ဂွံတီလဝ်ရ။
