ဟိုတ်နူအကာဲအရာ ကမၠောန်ဗော် (NLD) နွံကၠုၚ်ပၟိက်တုဲ နအလိုက်စိုတ်ဇကုကဵုဇကုရ နုက်တိတ်ထောံ နူတာလျိုၚ်ဝန်ဇၞော် အလဵုအသဳတွဵုရးမန်ရောၚ် ဝန်ဇၞော်တြေံ နာဲထေန်အံၚ်ဟာန် နူဌာနဝန်ဇၞော် ဓါတ်လလဳ၊ အစောံဇြဟတ် ကေုာံကွတ်စက် ဟီုရ။

“အကာဲအရာဗော်လၟုဟ်ဂှ် ပြံၚ်လှာဲဒၟံၚ်မၞိဟ်တၟာဂလိုၚ်ရ၊ ဣဏံဂှ် ဟိုတ်နူဗော် နွံကၠုၚ်ပၟိက်တုဲ ဗော်ရ ဒးကၠောန်၊ ဟိုတ်နူကၠောန်ဒၟံၚ်ပရေၚ်ဍုၚ်ကွာန်ဂှ်ရ အတိုၚ်ဗော်စၞောန်ဂှ် ဒးကၠောန်ဏောၚ်” နာဲထေန်အံၚ်ဟာန် ဂးရ။

ဝန်ဇၞော်တြေံ နာဲထေန်အံၚ်ဟာန် နူဂကောံအလဵုအသဳ တွဵုရးမန် (MNA)

အတိုၚ်သၞောဝ်ဥပဒေအုပ်ဓုပ်ဍုၚ် ၝောံပိုဒ် ၂၆၄၊ ၝောံပိုဒ်ဍောတ် (က) ကေုာံ ဥပဒေဂကောံအလဵုအသဳ ရးဒေသဇၞော် (ဟွံသေၚ်သာ်ဂှ်) ဥပဒေဂကောံအလဵုအသဳ တွဵုရး ၝောံပိုဒ် ၅၂ ၊ ၝောံပိုဒ်ဍောတ် (ခ) ဂှ်ရ ဝန်ဇၞော်နာဲထေန်အံၚ်ဟာန် ဌာနဝန်ဇၞော် ဓါတ်လလဳ၊ အစောံဇြဟတ် ကေုာံကွတ်စက်ဂှ် နွံပၟိက် မိက်ဂွံနုက်တိတ် နူတာလျိုၚ်ဝန်ဇၞော်တွဵုရး နဂၞပ်စိုတ်ဆန္ဒဇကုတုဲ သၠးကဵုအခေါၚ်နုက်တိတ်ဣရရောၚ်ဂှ် ရုၚ်သမ္မတကၟိန်ဍုၚ် လလောၚ်ပ္တိတ်လဝ် ပ္ဍဲဂိတုမေ ၂၉ ရ ဂွံဆဵုကေတ်။

“ကဵုမၞိဟ်ဇၞော်ဇၞော်တံဂှ် ဟီုလဝ်တုဲမံၚ်ရ၊ ဒှ်အာဗီုဏံဂှ် တၠမာဲဆန္ဒ စုတ်လဝ်မာဲကဵုအဲတံ ပ္ဍဲစိုတ်ညးတံ ထေၚ်မွဲမွဲဗီုဏောၚ်လေဝ်၊ ဣဏံဂှ် အခိုက်ကမၠောန်ဗော်ရလေဝ် ပရေၚ်ဍုၚ်ကွာန်ဟီုဂှ် ဗီုဏံရဏောၚ်ဂှ် သောၚ်က္လးကဵုညးတံဏောၚ်။ စိုတ်ညးတံ ညံၚ်ဂွိုအ်ယောၚ်၊ ပ္ဍဲဂကောံအလဵုအသဳဂှ် အဲဟွံမွဲရကီုလေဝ် ကမၠောန်ဒှ်ဖဵုသွက်ညးတံဂှ် အဲကၠောန်ကဵုမာန် ဂၠိုၚ်နူဏံဏီဏောၚ်ဂှ် သောၚ်ထ္ၜးကဵုညးတံဏောၚ်” နာဲထေန်အံၚ်ဟာန် ဂးရ။

အခိၚ်ကေတ်ကၠုၚ်တာလျိုၚ် ပ္ဍဲအလဵုအသဳ တွဵုရးမန် ပွိုၚ် ၂ သၞာံဂှ် ပြသၞာတောဲပၟတ်ပ္ဍဲကွာန်တံ ပသောၚ်ကဵုကၠုၚ်တၟာဂလိုၚ်ကီုရ၊လၟုဟ်မ္ဂး ဆၜိုတ်တာလျိုၚ် ညးစၞးကၠတ်ထဝ်သၟးဟွံက တာလျိုၚ်ပရေၚ်စန်ဒက်၊ ပရေၚ်ဒက်ပ္တန်ဗော်ဂှ်လေဝ် ဂွံယိုက်ဂၠေၚ်အာကီုဏောၚ် နာဲထေန်အံၚ်ဟာန် ဆက်ဟီုရ။

ပ္ဍဲပေါဲရုဲမာဲ သၞာံ ၂၀၁၅ ဂှ် နာဲထေန်အံၚ်ဟာန် လုပ်ဒုၚ်ရုဲ ပ္ဍဲဒေသမာဲ လၟိဟ် (၁) ပွိုၚ်ဍုၚ်မတ်မလီု နဒဒှ်ညးစၞးဗော် (NLD) တုဲ ဇၞးအာမာဲရ။