အဆံၚ်သွက်ဂွံစဵုဒပ် ပညဳတိတံဂှ် ကလိဂွံလဝ်သြန်ဒါန် နွံမံၚ်ရတုဲ ဂွံအခေါၚ်နူကဵုအလဵုအသဳဗက် သွက်ဂွံကၠောန်အာ ပရေၚ်သိုၚ်ခၞံဂှ် ဆက်ဒုၚ်ဒါန်အာရောၚ် ညးဆက်ဟီုရ။

ပ္ဍဲကဵုဂိတုအံက်တဝ်ဗာ (၁၄) ဂှ် ဝန်ဇၞော်ကၟိန်ဍုၚ် ဌာနဝန်ဇၞော်ကေၚ်ကာကောန်ဍုၚ်အရၚ် နာဲသက်လောန် ကၠုၚ်စိုပ်ဒေသတ္ကံခၟိုၚ်တုဲ အာလ္ၚတ်ရံၚ်လဝ် ဒၞာဲသွက်ဂွံသိုၚ်တိုက်ထ္ၜးကီု အကာဲအရာဂိုၚ်စွံလဝ်က ပေါတ်တြေံတြဟ်တံကီုတုဲ စပ်ကဵုပရေၚ်ဂွံသိုၚ်ခၞံတိုက်ထ္ၜးဂှ် သွက်ပ္ညဳပ္ညပ်ကဵု ဌာနဝန်ဇၞော်ပရေၚ်သာသနာ ကေုာံ ပရေၚ်ယေန်သၞာၚ်ကီု ပညဳပ္ညပ်ကဵု အလဵုအသဳတွဵုရးဍုၚ်မန်တုဲ ညံၚ်ဂွံကလိဂွံသြန်ဗွဝ်ကီု စပ်ကဵုဒက်ပ္တန်အာ ကမ္မတဳသိုၚ်ခၞံမွဲကီု ပရေၚ်ကမၠောန်ဂွံဓမံက်ရုပ်ရဴပြဟ်ဟ်မာန်ဂှ် ထံက်အာဂလာန်ရောၚ် ဂးလဝ်ရ။ ဝန်ဇၞော်နာဲသက်လောန်ဂှ် “သွက်တိုက်ထ္ၜးကီု ဒဵုကြေဝ်ဍုၚ်တြေံကီု ဍုၚ်တြေံတံဏံဂှ် တန်တဴကၠုၚ်လဝ် လၟေၚ်အဆ က်က်ဂှ်ရ တိုက်ထ္ၜးမန်မွဲဓဝ် ဒှ်ဟွံမာန်ရ၊ ဟိုတ်ဂှ်ရ တိုက်ထ္ၜးဆေၚ်စပ်ကဵု ဒေသအလုံတ္ကံခၟိုၚ်မွဲဏောၚ်။ အာဲကၟာဲ တြေံ ဒေသခၟိုၚ်ဂှ် ဒးစွံပ္ဍဲကဵုဒၞာဲဏံဂှ်ရ ပိုဲတံဂှ် ဂွံကၠောန်တိုက်ထ္ၜးမွဲဂှ် ထံက်မံၚ်ဂလာန်ရ” သာ်ဝွံ ညးထပ်ဟီုရ။ နကဵုညးဒေသတံကဵု ညးစၞးကၠတ်ထဝ်တံ ဗျာံရန်လဝ်ဒၞာဲဂအာၚ် ဗဒဲါကွာန်ဒဵုကြေဝ်နွံမံၚ်တုဲ သွက်ဂွံဂွံအခေါၚ်စကာတိ ဗွဲမလုပ်သၞောဝ်ဂှ် နူကဵုလက်ထက်အလဵုအသဳ (၂၀၁၀) တေံကီု အလဵုအသဳ ၂၀၁၅ ဏံဂှ် ပ္တိုန်ထ္ၜးအာတ်မိက်လဝ်ကီုလေဝ် စဵုကဵုလၟုဟ် အဆံၚ်ဒက်ပ္တန် (အမှုတွဲ) ဂှ် ဟွံစိုပ်ဏီရောၚ် ညးစၞးကၠတ်ထဝ်ဒေသခၟိုၚ် ဒံက်တာအံၚ်နာၚ်ဥု ဂးရ။
ဒံက်တာအံၚ်နာၚ်ဥုဂှ် “လၟုဟ် သွက်ဂွံပ္တိုန်လိက်ဂှ် ပိုဲလေဝ် မိက်ဂွံကၠောန်မံၚ်ရ။ မိက်ဂွံဟီုဂှ် အကာဲအရာညးတံကဵုအခေါၚ်မာန်/ဟွံမာန်ဂှ် ပိုဲဒးချိၚ်ဆမံၚ်ကၠာ၊ အကာဲအရာ ဘိုအ်ဂွံကဵုအခေါၚ်နွံတှေ် ပိုဲပ္တိုန်လိက်ဏောၚ်။ လဆောဝ်တှေ် ပ္တိုန်လဝ်ကဵုသ္ကိုပ်အုပ်ဓုပ်တံတှေ် ညးတံဒးကၠောန်မံၚ် ဖေက်က်ဂံၚ်ၚ်တှေ် လျိုၚ်ညးတံဇြိုၚ်အာဏောၚ်” သာ်ဝွံ ညးဟီုရ။ မွဲလပါ်ပၠန်ဂှ် ပ္ဍဲကဵုဒေသတ္ကံခၟိုၚ်ဂှ် နကဵုပူဂဵု သွက်ဂွံသိုၚ်ခၞံပ္တိုန်တိုက်ထ္ၜး ကပေါတ်တြေံတြဟ်ဂှ်လေဝ် အစဳဇန်နွံမံၚ်ရောၚ် ညးဒေသမွဲတၠ နာဲတာန်ထိုက် ဂးလဝ်အ္စာပရိုၚ်တံနွံရ။