ဌာန်ပရိုၚ်မန် (ဂိတုနဝ်ဝေမ်ဗာ ၂၇)

ထ္ၜးဟိုတ်ကဵု ကိစ္စပၞောန်ပယျဵု (ဗၟာ-သေံ) တုဲ တ္ၚဲဏံ (ဂိတုနဝ်ဝေမ်ဗာ ၂၇) ဖါနူဂယး နူဒပ်ပၞာန်ဗၟာ ဇက်လုပ်ကၠုၚ် ပ္ဍဲဒပ်ဒတန် – “တပ်တည်” (ဗော်ဍုၚ်မန်တၟိ) ကွာန်ပလိုၚ်ဂျပါန်ဂှ် ဒှ်ပွဖံက်ပကဝ် လိက်ကသုက်တုပ်စိုတ် ဒေံါပန်ပှော်အလုံဍုၚ် (NCA) ရဏောၚ် ဗော်ဍုၚ်မန်တၟိ ဟီုရ။

သ္ကိုပ်ပၞာန်လျးဂကူ နူဗော်ဍုၚ်မန်တၟိ သ္ဂးဂှ် “ပ္ဍဲဒၞဲါကဵုလဝ်အခေါၚ် စွံဒတန်ဒပ်ပိုဲဂှ် သီုဟွံဂွံအခေါၚ်မွဲသာ် ဇက်လုပ်ကၠုၚ် နကဵုဇြဟတ်ဒပ်ဂှ် ဒှ်ကလောန်ဖံက်ပကဝ် လိက်ကသုက် NCA ရဏောၚ်။ အတိုၚ်တၚ်တုပ်စိုတ် ဒေံါပန်ပှော်မ္ဂး ပိုဲကဵုအခေါၚ်တုဲမှ လုပ်ကၠုၚ် ပ္ဍဲဗွိုၚ်ပိုဲဂွံဏောၚ်၊ သီုဟွံဂွံအခေါၚ်မွဲသာ် လုပ်ကၠုၚ်အတေၚ်ဏောၚ်တှေ် သၟဝ်တေံဂှ် ဒှ်ပန်တဝဵုရ” သာ်ဝွံ ညးဟီု။

နူဒပ်ပၞာန်ဗၟာဂှ် သ္ကိုပ်ဗျူဟာကီု သ္ကိုပ်တံဒပ်ဒေသ ကေုာံ ဒပ်ဍေံကီု ကရောံဂှ် ညးတာလျိုၚ်မွဲတၠ နူရုၚ်ဆက်ဆောံကျာ်ပိ (ဗော်ဍုၚ်မန်တၟိ) ကီု ပ္ဍဲဂိတုနဝ်ဝေမ်ဗာ (၂၇) ဖါနူဂယး ၜိုတ် (၉) နာဍဳ လုပ်ကၠုၚ် နကဵုကွဳစက် ပ္ဍဲကွာန်ပလိုၚ်ဂျပါန်တုဲ ဒပ်ကၚ် နူဗော်ဍုၚ်မန်တၟိ ပန်ဏာရ။ ပ္ဍဲအရာပန်ဏာဏံ လ္ပာ်ဗၟာ ဒးဘဲ ဂိချိုတ်နွံကီုဏောၚ် ၜိုန်ပရိုၚ်တိတ်မံၚ်ကီုလေဝ် ကိစ္စဏံ နူဌာန်ပရိုၚ်မန် ဟီုသ္ပဒတန် ချိုတ်တ်ပၠိုတ်တ် ဟွံမာန်ဏီရ။

“နူရုၚ်ဆက်ဆောံပိုဲ ဒေံါမံၚ်ဖိုဟ်ရ၊ မၚ်လဇကဵု မွဲလစုတ်ညိ၊ ဂွံအခေါၚ်နူဗဟဵုတေံတုဲမှ အာညိ၊ ဆဂး ဍေံတံဟွံက္လၚ် ဆက်အာတဝဵုတှေ် လွဟ်ဗြုကၠုၚ်” သာ်ဝွံ ညးဆက်ဟီုရ။

လွဟ်ဗြုတုဲ ဒပ်ကရေၚ်မၚ်ပယျဵု (BGF) လေဝ် ထပ်စိုပ်ကၠုၚ် နူဂှ် ဍေံတံ လုပ်ပန်ရုၚ်ဒပ်ပါ်၊ တံဒပ်လၟိဟ် (၅) (ဗော်ဍုၚ်မန်တၟိ) မၞုံပ္ဍဲတၞုၚ်ကွာန်ပလိုၚ်ဂျပါန်တုဲ ပယျာံတ္ၚဲစေၚ် ၜိုတ် (၂) နာဍဳ နူဒပ်ပၞာန် ထိၚ်သီကေတ်ထောံ ၜိုတ်ကဝက်ကွာန် သီုဖဠာတ်ဗဝ်ကီု ဂွံပရိုၚ်ရ။

ဒၟါနူဂှ်ရ ကောန်ကွာန် ၜိုတ် (၅၀၀) တၠ နူပလိုၚ်ဂျပါန်ကဵု ကွာန်ဂူၜဴ ဂစာန်ဂြိပ်ဒဴ လုပ်ဗ္ဒဒၟံၚ် ပ္ဍဲဘာလကျာ်မန် အပ္ဍဲတိဍာ်သေံတေံ ဂွံတီကေတ် နူဂကောံရီုဗၚ်ဟံၚ်ပြာ်တံကီုရ။

ကလေၚ်ရံၚ် တၚ်တုပ်စိုတ်ဒေံါပန်ပှော် သၞာံ (၁၉၉၅) လက်ထက် အလဵုအသဳ နဝတတေံကီု၊ တၚ်တုပ်စိုတ် သၞာံ (၂၀၁၂) အဆံၚ်တွဵုရး / အဆံၚ်ကၟိန်ဍုၚ် ပ္ဍဲလက်ထက် အလဵုအသဳ သမ္မတ ဥူတိၚ်သိၚ်ကီု၊ အခါဗော်ဍုၚ်မန်တၟိ ထ္ပက်စၟတ်တဲ NCA ဂှ်လေဝ် ကလေၚ်ဒုၚ်သဇိုၚ်ကဵု တၚ်တုပ်စိုတ် တံဂှ်တုဲ ထပ်သ္ပလဝ်ဒတန် ကွာန်ပလိုၚ်ဂျပါန်ဏံ နဒဒှ် ‘ဒတန်ဒပ်’ လၟိုန် သွက်ဗော်ဍုၚ်မန်တၟိဏောၚ် ဂွံတီလဝ်ရ။