ဝဏ္ဏမာန်၊ ဖေဖဝ်ဝါရဳ ၁၄၊ ၂၀၂၀

ကွဳလိုန်ဓာတ်ဟွံမွဲကဵုလာၚ်ဇြေန်တံဂှ် နူကဵုအစဳဇန် အလဵုအသဳတွဵုရးဍုၚ်မန် ကၠောန်ပ္တိတ်ဒၟံၚ်ဂှ် ၚုဟ်က္ဍၚ်ဒၟံၚ်ရောၚ် တၠကွဳတံ ဟီုအိုတ်ရ။
ကွဳလိုန်ဓာတ်မွဲဖ္ဍိုက်မ္ဂး တၟော်ကဵုၚုဟ်မးတုဲ (၅၀% – ကဝက်) ရ။ ၚုဟ်ကွဳလိုန်ဓာတ်မွဲဖ္ဍိုက် (၂၀) ကိုတ်မ္ဂး ၚုဟ်ကၠောန်လာၚ်ဇြေန်ဂှ် (၁၀) ကိုတ်တုဲ ၚုဟ်က္ဍၚ်ဒၟံၚ်ရောၚ် တၠကွဳနူမုဟ်ဍုၚ်မွဲတၠ ဟီုသာ်ဏံရ။
“ဥပမာ ကွဳလိုန်ဓါတ် မဝ်ဒေဝ် (၂၀၁၃) မွဲမဂှ် ၚုဟ်နွံ (၂၅) ကိုတ်တှေ် ၚုဟ်ကၠောန်လာၚ်ဇြေန်သၟးဂှ် (၁၂) ကိုတ်ပြၚ်မံၚ်၊ ဒးကဵုဂၠိုၚ်လောန်အာ ဒတုံအာ ကွဳလိုန်ဓာတ်ဂှ် ကၠောန်လာၚ်ဇြေန်တုဲတှေ် ဒှ်အာ (၃၇) ကိုတ် ဒှ်ဟွံထေက်ပုဟ်” သာ်ဏံ နာဲဗၠာဲ နူမုဟ်ဍုၚ်ဂှ်ဟီုရ။
ကာလအကြာ အလဵုအသဳကၠောန်ပ္တိတ်ဒၟံၚ်ကဵု လာၚ်ဇြေန်ကွဳလိုန်ဓာတ်အဆံၚ်တွဵုရးဂှ် ပ္ဍဲပွိုၚ်ဍုၚ်ဂမၠိုၚ်ဂှ် ရပ်ကၠုၚ် ကွဳလိုန်ဓာတ်တုဲ တက်ဒါန်သြန် လၟေၚ်အဆံၚ်ဆံၚ်ရ။
“ကၠောန်ပ္တိတ်ကဵုလာၚ်ဇြေန်ဂှ် ခိုဟ်သက်ဟီုဟွံမွဲမံၚ်ရ၊ ဆဂး ကေတ်က္ဍၚ်လောန်အာညိ၊ ၚုဟ်လာၚ်ဇြေန်ဂှ် ကဝက် ၚုဟ်ကွဳလိုန်ဓာတ် ဒှ်ဟွံထေက်၊ ၜါဂအုံမွဲဂအုံ ၚုဟ်ကွဳတှေ် မွဲဗီု၊ ဥပမာ ၚုဟ်ကွဳ (၂၀) ကိုတ်တှေ် ၜိုတ် (၆) ကိုတ် (၇) ကိုတ်တှေ် မွဲဗီု၊ ဣဏံ ၚုဟ်ကွဳ (၂၀) ကိုတ်တှေ် ၚုဟ်လာၚ်ဇြေန်ဂှ် (၁၀) ကိုတ် က္ဍၚ်လောန်အာညိ” သာ်ဏံ မိဣဃာၚ် နူမုဟ်ဍုၚ်ဟီုရ။
အလုံတွဵုရးဍုၚ်မန်မွဲဂှ် ရေၚ်တၠုၚ်ကၠောန်ကၠုၚ်ကဵုလဝ်တုဲဂှ် (၆၇၄၃) ဖ္ဍိုက် တုဲအာတုဲရ။ အဓိကပိုဲကံက်ၚုဟ်ဒုဟ်ဒန်ဂှ် ဟီုမွဲနဲပၠန်တှေ် ၚုဟ်လာၚ်ဇြေန်ဂှ် ကံက်ဂွံသြန် (၁ ဒဿမ ၈၅၄) ဗဳလဳယာန် (185,400,000 MMK) တုဲရ” ဝန်ဇၞော်ပရေၚ်တဵုလွဳကဵု ပရေၚ်ပလံၚ်ဗစိုပ် ဥုထောန်ဌေ ဟီုကဵုရဲပရိုၚ်တံရ။
ကွဳလိုန်ဓာတ်ဟွံမွဲကဵုလာၚ်ဇြေန်တံဂှ် နကဵုသၞောတ် OSS (One Stop Service) တုဲ စတံနူဂိတုဒဳဇြေမ်ဗာ (၉) ဂှ်တုဲ ကၠောန်ပ္တိတ်ဒၟံၚ်ကဵုလာၚ်ဇြေန် တွဵုရးတုဲ စဵုစိုပ်ဂိတုမာတ် (၁၁) ဂှ် လက္ကရဴအိုတ်တုဲ ကၠောန်ပ္တိတ်ဒၟံၚ်ရ။