ဝဏ္ဏမာန်၊ ဂိတုမာတ် ၁၁၊ ၂၀၂၀
ညးဒေသပွိုၚ်ဍုၚ်ဍာ်ဗု အကြာကွာန်တဵုလွဳဂှ် ပ္ဍဲဂိတုမာတ် ၁၁ ပွိုၚ်မွဲတ္ၚဲဓဝ် ကောန်ကွာန်ညးဒေသကွာန်တဵုလွဳ လိုန်ဒးမခတိုဟ် (ဗမ်) ၜါတၠတုဲ ကိုပ်ကၠာမွဲတၠဂှ် ဇိုၚ်လ္ပာ်ပုၚ်သၠေက်အာကီု ညးလိုန်ဒးလက္ကရဴဂှ် ဇိုၚ်သီုၜါဒိုဟ်ဂှ် ဒးလဝ်ဝပ်ရောၚ် ဂွံတီကေတ် နူညးတာလျိုၚ်ခရိုၚ်ထဝဲါ ဗော်ဍုၚ်မန်တၟိရ။
အခိၚ်နူဂယး ဗၞတ်ၜိုတ် ၈ နာဍဳဂှ် နာဲဗာၚ် ကွာန်တဵုလွဳဝွံ အဃောအာကျောဝ်ပၠံၚ်ဍာ် (ပိုက်ဍာ်) ဂှ် လိုန်ဒးမာၚ် ခ တိုဟ်တုဲ ဇိုၚ်လ္ပာ်ပုၚ်ဒကုတ်သၟဝ်ဂှ် ဒးဝပ်သၠေက်အာရ။ တက်အခိၚ် ၜိုတ် ၉ နာဍဳပၠန်ဂှ် မၞုံယၟု နာဲဝေန်လှာၚ် (နူဍုၚ် ပံၚ်) အဃောအာကၠအ်ဂှ် ထပ်လိုန်ဒးမခတိုဟ်မွဲမပၠန်ဂှ် ဇိုၚ်သီုၜါဒိုဟ် ဒးအာဝပ်တုဲ ဒရိပ်ဏာရုၚ်ဂဥုဲရ။
“နူဂယး ၜိုတ် ၈ နာဍဳဂှ် ပ္ဍဲကွာန်တဵုလွဳ ကၠအ်သြၚ်လ္ပာ် (ပုလဲ) ဒေသကေန်အေန်ယူတံ ဍေံဟီုတှေ် ကောန်ကွာန်တံ တောဲလဝ်ပၠံၚ်ဍာ် (ပိုက်ဍာ်) အရၚ်ကွာန်သုၚ်စောဲ၊ အာပလေဝ် (ပၠံၚ်ဍာ်) အာပလေဝ်တုဲတှေ် လိုန်ဒး ‘ဗမ်’ ဍေံ တိုပ်လဝ်အကြာပိုက်တဂှ် အဵုဂှ်မွဲ၊ တုဲတှေ် ၜိုတ် ၉ နာဍဳဂှ် မွဲပၠန် လ္ပာ် (အိုၚ်ရှည်) ဂှ် သြၚ်ကရေၚ်တံပၠန်ရ ညးတေံအာကၠအ်ညးတေံဂှ် အဵုပ္ဍဲဂၠံၚ်ဂှ် ဒးအာ ‘ဗမ်’ မွဲပၠန် ညးတေံဂှ်တှေ် ဇိုၚ်ၜါဒိုဟ်ဂှ် ဆီပြိုဟ်အာညိညိ ဒးအာဝပ် ဇိုၚ်မွဲဒိုဟ်ဂှ် ဂၠိုၚ်ညိ၊ မၞိဟ်ဒး ၈ နာဍဳတေံဂှ်တှေ် ဇိုၚ်သၠေက်အာမွဲဒိုဟ်” သာ်ဏံ ညးတာလျိုၚ်ခရိုၚ်ထဝဲါ ဗော်ဍုၚ် မန်တၟိမွဲတၠ ဟီုလဴထ္ၜးရ။
ဒၞာဲမခတိုဟ် (ဗမ်) ညးဒေသကောန်ကွာန်တံလိုန်ဒးဂှ် ဒှ်ဒေသ (ဂွၚ်) (အိုၚ်ရှည်-ပုလဲ)၊ သၠုၚ်ကျာကြုၚ်ကၚ် ဒေသအုပ်ဓုပ် ကေအေန်ယူတံတုဲ ဗော်ဍုၚ်မန်တၟိတံ ချဳဓရာၚ်အာကၠုၚ် ပ္ဍဲဒေသဂှ် ဟွံဂွံရောၚ် ညးတာလျိုၚ် ခရိုၚ်ထဝဲါဂှ် သ္ဂးရ။
“ဒေသအကြာတဂှ်တှေ် မန်ကဵု ကရေၚ်တံရ ချဳဓရာၚ်မံၚ် ပိုဲတီဟဂှ်ရ၊ လဒှ်လၟုဟ်မှ ဂကောံလဵုလေဝ် ဟွံဘိုၚ် ကေတ်လျိုၚ်ပုဟ်၊ ညးကွာန်တံ ဒးဒုၚ်မံၚ်ဘဲမာၚ် (ဗမ်) ဏံ လံကဵုသၞာံရ၊ ညးမွဲလေဝ် ဂကောံလဵုလေဝ် ဟွံဘိုၚ် ကေတ်ကဵုလျိုၚ်ပုဟ်၊ ညးဒေသတံရ ဒးဒုၚ်မံၚ် ဒှ်ဟွံထေက်” သာ်ဏံ သကိုပ်အုပ်ဓုပ်ကွာန် ဌာန်ဇၞူ (ဂကောံကွာန် ၄ ကွာန်) နာဲတေန်သာန် ဟီုရ။
ဆက်တုဲ ညးတာလျိုၚ်ခရိုၚ်ထဝဲါဂှ် “ပရေၚ်ဂွံဆက်ဖန်ဟီုဂှ်တှေ် သွာၚ်ပိုဲဂှ်တှေ် စပ်ကဵုဌာနမဆေၚ်စပ် လ္ပာ်အလဵုအသဳကီု၊ ကဵုအလဵုအသဳကီု ပိုဲကေတ်လဝ်အဆက်ရ၊ ဂကောံအုပ်ဓုပ်ကွာန် အဃောအာကျာမံၚ်ကဵု ဍေံတံ (ဂကောံရပ်လွဟ်ကရေၚ်) ဂှ်ရ ကိစ္စဏံ ကတဵုဒှ်အာ၊ နကဵုဗော်ပိုဲဂှ်တှေ် ချိၚ်လဝ်တုဲ ပဆုဲဏာ ပဆုဲနၚ်တုဲတှေ် ဟွံဒှ်တက်ကျာဟဂှ်၊ ဒေသ (ဂွၚ်) ဏံဂှ် ဒှ်မံၚ် ဒေသ (ဂွၚ်) ဍေံတံ (ဂကောံရပ်လွဟ်ကရေၚ်) ဏောၚ်၊ လ္ပာ်ပိုဲအာလေဝ် အာဟွံဂွံပုဟ်” သ္ဂးရ။
တုဲကၠုၚ်ဂိတုဖေဖဝ်ဝါရဳ ၂၉ တုဲကၠုၚ်ဏံလေဝ် ကောန်ကွာန်တဵုလွဳ မၞုံယၟု နာဲသိုက်လောန်ဝွံ အဃောအာ ကၠအ် နကဵုကွဳလိုန်ဓါတ်တုဲ လိုန်ဒးမာၚ် (ဗမ်) နကဵုသၠာကွဳလိုန်ဓါတ်ဂှ် သၠာဍိုပ်သၠေက်အာ မွဲဒကုတ်၊ ပ္ဍဲကဵု သ္ကေမ်တဲလ္ပာ်ပုၚ်ဂှ် ဒးအာဝပ်ညိညရ။
ဆက်တုဲ ဂိတုမာတ် (၁) ဂှ် ရဲကွာန်တဵုလွဳမွဲတၠ အဃောအာရံၚ်ပၠံၚ်ဍာ်တုဲ ထပ်လိုန်ဒးမာၚ် (ဗမ်) တိုပ်လဝ်မွဲမပၠန်ဂှ် ဟွံခတိုဟ်တုဲ ညးတာလျိုၚ်ဗော်ဍုၚ်မန်တၟိ ခရိုၚ်ထဝဲါတံ ဂိုၚ်သီကေတ်ဏာ မခတိုဟ် (ဗမ်) ဂှ်ရ။
ဘဲဒဏ်မာၚ် (ဗမ်) ဒေသမွဲဒမြိပ် ပွိုၚ်ဍုၚ်ဍာ်ဗု ဗွိုၚ်ကွာန်ဌာန်ဇၞူဂှ် ပ္ဍဲပွိုၚ်သၞာံ ၂၀၁၈-၂၀၁၉-၂၀၂၀ ဂှ် ဖအိုတ် ခတိုဟ်ကၠုၚ် ဟွံအောန်နူ (၈) အလန် တုဲ ညးဒေသတံကီု ကောန်သ္ဂံၚ်ဗော်ဍုၚ်မန်တၟိကီု လ္ၚဵုဒးဒုၚ်ကုတ်ဏာဇိုၚ်နွံ၊ ဒးဝပ်နွံ၊ ကွဳလိုန်ဓါတ်လီုသရိုဟ်အာလေဝ်နွံရ။
