မာံပိုန်၊ အေဗရဴ ၁၇၊ သၞာံ ၂၀၂၀

ရံၚ်ကဵုအကာဲအရာ ပရေၚ်ဍုၚ်ကွာန်ကၟိန်ဍုၚ်တ္ၚဲဏအ်မ္ဂး ပွမစဵုဒၞါကောန်ဂကူဇကု နကဵုဇြဟတ်လွဟ်ဂှ် ဒှ်ဇြဟတ်ခိုၚ်ဗိုန်အိုတ်ရောၚ် ဥက္ကဌဗော်ဍုၚ်မန်တၟိ နာဲဟံသာ ဟီုရ။
အပ္ဍဲကဵုကောန်ဂကူဇကု ဇြဟတ်ဒပ်ပၞာန်ဍိုန်လျမ္ဂး နူကဵုကောန်ဂကူမွဲသၟာၚ်တအ် ဟွံသ္ပဂရု၊ ဒးဒုၚ်ဍဵုဍိုက်မာန်ဂှ်ရ ဇြဟတ်ဒပ်ပၞာန်ဇကု ညံၚ်ဂွံဂၠိုၚ်တိုန်ဂှ် ဒးချပ်ဇန်ထေက်ဏောၚ် ဂးရ။
ဥက္ကဌဗော်ဍုၚ်မန်တၟိ နာဲဟံသာဂှ် “လၟုဟ် ဒးဟီုဇေတ်တ်တှေ် ဒပ်ပၞာန်အလဵုအသဳလေဝ် ခိုဟ်ကဵုပိုဲဟွံသေၚ်ပုဟ်၊ ကၠာဂှ် ဒှ်ပေဲါဗ္တိုက်ညးသ္ကံနွံမံၚ်။ ကရေၚ်လေဝ် ဍေံခိုဟ်ကဵုပိုဲ ကွေံကွေံဟွံသေၚ်ပုဟ်၊ ဒှ်မံၚ်ပေဲါဗ္တိုက်ဍောတ်တ်ညးသ္ကံ မွဲဏှေံမွဲဏှေံ။ အဵုဂှ်တှေ် ဇြဟတ်ကောန်ဂကူပိုဲ သွက်ဂွံစဵုဒၞါပိုဲမာန်ဟီုတှေ် နကဵုဇြဟတ်လွဟ်ဂှ် ဍေံခိုၚ်အိုတ်ရ” သာ်ဝွံ ဟီုကဵုဌာန်ပရိုၚ်မန်သၞံၚ်တိုၚ်ရ။
ၜိုန်ဂှ်လေဝ် ဇမၞော်သၠဲပ္တိုန် ဇြဟတ်ဒပ်ပၞာန်ဇကုကွေံကွေံဟွံမာန်မ္ဂး ၜိုတ်ဇြဟတ်မၞုံဒၟံၚ်ပြဟ်ဟ်ဏအ် ညံၚ်ဟွံဂွံအောန်စှေ်အာဂှ် ဒးထိၚ်ဒဝ်တုဲ နကဵုဗီုပြၚ်ပေဲါဗ္တိုက်တၞဟ်ဟ်လေဝ် ဒးဂ္စာန်လုပ်အာပေဲါဗ္တိုက်ရောၚ် ညးဆက်ဟီုရ။
အကာဲအရာကၟိန်ဍုၚ် (ဗၟာ) ဝွံ ပြဟ်ဟ်ဏအ်မ္ဂး နူကဵုဒပ်ပၞာန် (အလဵုအသဳ) တအ်ဟေၚ် ထိၚ်သွာလဝ်အဝဵုတုဲ ဆန္ဒဒပ်ပၞာန်ဟွံပါမ္ဂး ကိစ္စပလေဝ်သၞောဝ် (၂၀၀၈) လေဝ် ဟွံဒှ်ကမၠောန်ကီု၊ မွဲလ္ပာ်ဂှ် သီုကဵုကၠောန်သ္ပမံၚ် ပရေၚ်ကရေပ်ဓရတ် ဍိုက်ဗ္တိုက်မံၚ် နကဵုဇြဟတ်လွဟ် ပ္ဍဲဒေသကောန်ဍုၚ်အရၚ် ဗီုကဵုရခေၚ်၊ ကချေၚ်တအ်ဂှ် နွံမံၚ်ဖိုဟ်ရ။
“ဍာံဍာံတေံ ပၠန်ဂတးရခေၚ် တိဍာ်ရခေၚ်ဍေံဟွံမံၚ်တှေ် ဍေံဟွံသ္ပသ္ဇိုၚ်ကဵု ကောန်ဂကူဍေံတှေ် ဇြဟတ်ဍေံ ဗီုလဵုဂွံဇၞော်တိုန်ရော။ တုဲတှေ် တာလျိုၚ်ဍေံကၠောန်ပၠန်ဂတးဂှ် ဍေံစဵုဒၞါကောန်ဂကူဍေံဏောၚ်။ တိဍာ်ဍေံ ဟွံကဵုဍေံမံၚ်တှေ် ဗီုလဵုပလေဝ် ဟွံစှေ်သၞောတ်ပုဟ်။ မိက်ဂွံဟီုဂှ်တှေ် ဒပ်ပၞာန် (အလဵုအသဳ) တအ်ဏအ် စဵုကဵုအခိၚ်တ္ၚဲဏအ် ဍေံဝေၚ်မံၚ်ဗျူဟာနာနာသာ် ယျဵုယျဵုလ္ဂူလ္ဂူ ဟွံမွဲဏီပုဟ် အဲညာတ်သာ်ဂှ်ရ” သာ်ဝွံ ဥက္ကဌ ဗော်ဍုၚ်မန်တၟိ နာဲဟံသာ ဟီုလဴရ။
တုဲကၠုၚ်ပ္ဍဲကဵုတ္ၚဲသၟတ်မန် အလန်အဋ္ဌမ ကၠောန်ဗဒှ်လဝ် ပ္ဍဲပွိုၚ်ဍုၚ်ကျာ်မြဟ် ဖဠာတ်ဒဵုခရီုဂှ်လေဝ် နကဵုသၟတ်တအ် ပ္တိတ်လိက်လလောၚ်တြး ဇၟာပ်သၟတ်အာယုက်အဝဲစိုပ်တအ် ညံၚ်ဂွံဘိုၚ်ဖ္ဍိုက်ဗပေၚ်ဇြဟတ် ပ္ဍဲဗော်ဍုၚ်မန်တၟိမာန်ဂှ် ဆဝ်မ္ၚုဟ်လဝ်နွံဂှ် ဂွံဆဵုကေတ်ရ။
လ္တူလိက်လလောၚ်တြးတ္ၚဲသၟတ်မန် ဆဝ်မ္ၚုဟ်လဝ်ဂှ် မိပ်စိုတ်ဒုၚ်တၠုၚ်တုဲ အတိုၚ်ဆဝ်မ္ၚုဟ်လဝ် ညံၚ်ရုပ်ရဴဂွံမံက်ပြဟ်ဟ်မာန် နူသဘၚ်သဳကၠဳဗော်ဍုၚ်မန်တၟိ အလန်ဒသမ ဖ္တိုက်ဖၟောဝ်လဝ် နကဵုလိက်လလောၚ်တြးနွံကီုရောၚ် ဂွံတီကေတ်ရ။