ကောန်ဆာန်နန်၊ ဂျောန် ၁၄၊ ၂၀၂၀

ဘာကောန်ဂကူမန်ဂှ် ဌာန်ဒေသဖျေံစိုတ်ဂွံ စပ်ကဵုပရေၚ်ယဲကပ် ‘ကိုဝ်ဝေဒ် ၁၉’ ၜါပွိုၚ်ဍုၚ်ဂှ် စပံက်အာကၠာရောၚ် ညးတာလျိုၚ်ကမ္မတဳပရေၚ်ပညာကောန်ဂကူမန်မွဲတၠ ဟီုရ။
“သွက်ဂွံပံက်ဘာဂှ် ပ္ဍဲဘာပိုဲ ညံၚ်သ္ဂောံဂီုကၠီုအာမာန် အ္စာတအ် ဒးပလေဝ်ပလေတ် ဘာညးကုညးရ၊ ဒၞာဲတိဍာ်ပိုဲ ဗၠးဒုဟ်ဗၠးဝါ ကုဘဲယဲကပ်မာန် ကွာန်ညးကုညး၊ အာစာညးကုညး၊ ကွးဘာညးကုညး ယဝ်ခါရ ကွာန်ဂှ် အကာဲအ ရာဗီုဏံနွံမ္ဂး ပိုဲစပံက်ဘာရောၚ်’’ သာ်ဏံ အာစာၝောံ မိကြက်နန် (ကမ္မတဳပရေၚ်ပညာကောန်ဂကူမန်-ဗဟဵု) ဟီုထ္ၜးရ။
ဌာန်ဒေသဖျေံစိုတ်ဂွံ သွက်ဂွံပံက်အာဘာဂှ် ပွိုၚ်ဍုၚ်ကၞောတ်ၜဳရေဝ်ကဵု ပွိုၚ်ဍုၚ်ဍာ်ဗု (ရးတနၚ်္သဳ) ၜါပွိုၚ်ဍုၚ်ဂှ် ဖျေံဗီု စပံက်အာကၠာရောၚ် သ္ဂးရ။
ပ္ဍဲအခိၚ်ကာလပံက်ဘာလၟုဟ်မ္ဂး စိုပ်အခိၚ်ရလေဝ် ဟိုတ်နူအကာဲအရာယဲကပ်ဂှ် ဟွံပြေဟဲအာဏီတုဲ ဂွံပံက်ဘာဂှ် လေဝ် ဒှ်မံၚ်ပရေၚ်အခက်ခုဲဏီရ။ ယဝ်ခါရ ပ္ဍဲကွာန်ဂှ် ရဲစဴနူဍုၚ်တၞဟ်သၟောၚ် တတ်အာတတ်ကၠုၚ်နွံမ္ဂး ပံက်ဘာ ဟွံဂွံရ။ မုဟိုတ်ရောမ္ဂး ဂွိၚ်ဖေက် ကောန်ၚာ်သၟတ်တအ် ကၠောံယဲ covid-19 နူကဵုရဲစဴနူဍုၚ်မ္ၚးတုဲ ညးဟွံကဵု အခေါၚ်ပံက်ဘာဏီရောၚ် အ္စာၝောံမိကြက်နန်ဂှ် ဆက်ဟီုရ။
သွက်ဂွံထိၚ်ဒဝ်စဵုဒၞာယဲ ပ္ဍဲကာလအခိၚ်ပံက်ဘာဏံမ္ဂး ဍာ်ဂဥုဲကြာတ်တဲကီု၊ ယာတ်ကၟာတ်ပါၚ်ကီု စတံနူအခန်ဗဒမ် ဘာတံကီု နူကမ္မတဳပရေၚ်ပညာကောန်ဂကူမန်တံ ဖန်ဇန်ပလေဝ်ပလေတ်ဒၟံၚ်ဖိုဟ်ရ။
“ဘာကောန်ဂကူမန်ပိုဲ သွက်တန်သၠုၚ်ကဵု တန်လ္ဒောဝ်ဂှ် မူပိဲိုဟွံဂွံဖန်ဇန်လဝ်ကဵုဏီ၊ ကွးဘာတန်သၠုၚ်ပိုဲဂှ် ဒးကၠုၚ် နူဒေသသ္ၚောဲသ္ၚောဲတုဲ ရဲစဴနူဍုၚ်သေံ၊ ဍုၚ်မလေဝ်၊ ဍုၚ်သေၚ်္ကပေါဝ်နွံတုဲ သွက်ကောန်ကွးဘာပိဲိုတအ် ညံၚ်ဂွံစိုပ်ဘာဂှ် ပိုဲဂွံစွံလဝ် (Quarantine) ဟွံမွဲ၊ (၆) ပေခြာ ဒးတိက်ဏောၚ်ဂှ် ဒၞာဲဘာပိုဲ ဟိုတ်နူကဵုဍောတ်မံၚ်တုဲ သွက်ကွးဘာတန်သၠုၚ် ဂွံပံက်ဘာဂှ် ဟွံဂွံချပ်လဝ်ဏီရ” သာ်ဏံ အာစာမှောံ မိကြက်နန် ဆက်ဟီုထ္ၜးရ။
လၟေၚ်သၞာံမ္ဂး ဘာအလဵုအသဳကီု ဘာကောန်ဂကူမန်ကီု စိုပ်အခိၚ်ဂိတုဂျောန်မံက်ဏံမ္ဂး ဒှ်အခိၚ်ပံက်ဘာတုဲ သၞာံ ဏံဂှ် ဟိုတ်နူကဵုအသိၚ်ယဲ COVID-19 ဂှ်တုဲ အခိၚ်ပံက်ဘာဂှ် စဵုတ္ၚဲဏံ ဘာအလဵုအသဳကီု ဘာဌာနပရေၚ် ပညာကောန်ဂကူမန်ကီု လလောၚ်ဓမံက်တ္ၚဲ ချိုတ်ချိုတ်ပၠိုတ်ပၠိုတ် ဟွံမာန်ဏီရ။