ဗညာပိုၚ်၊ ဂျောန် ၂၁၊ ၂၀၂၀
ပ္ဍဲကဵုခရိုၚ်သဓီုဂှ် ရပ်စပ်လဝ် ညးမသုၚ်စောဲသွံရာန် ဂဥုဲၜူမာဲတံဂှ် မၞိဟ်ဗြဴတံပါဒၟံၚ်တုဲ သ္ဂောံစသုၚ်မံၚ်စံၚ်အာဂှ် ဒှ်ကၠုၚ်ဒၟံၚ် အခက်ခုဲနာနာသာ်ရရောၚ်ဂှ် ကေၚ်ကာခရိုၚ်သဓီု ဗော်ဍုၚ်မန်တၟိ နာဲဇြဝ်မေန်ဥူ ဟီုသာ်ဝွံရ။
“ရပ်စပ်လဝ် မၞိဟ်ဗြဴပါကၠုၚ်မံၚ်ယျတှေ် ဒးကေတ်တာလျိုၚ် ဇၞော်ကဵုဇြဟတ်ရ။ ဒၞါဲဂွံတိက် ဂွံစသုၚ် မံၚ်စံၚ်အာကီု လ္ၚဵုတံဂှ်တှေ် သီုကဵုယဲဒိုက်လေဝ်နွံမံၚ်၊ တုဲပၠန် လုက်စုက်အာကဵု ကောန်ဒုဟ်မၞိဟ်တြုံဂၠိုၚ်လေဝ် ဟွံဂွံပုဟ် တၞဟ်ခြာဒးဖန်ဗဒှ်ကဵုလဝ်၊ တုဲပၠန် အခက်ခုဲသြန်ဘဏ္ဍာကီု မၞိဟ်ကဵုအရီုဗၚ်လေဝ် အောန်မံၚ်တုဲ အခက်ခုဲ နွံမံၚ်နာနာသာ်ရ” သာ်ဝွံ နာဲဇြဝ်မေန်ဥူ ဂးရ။
တုဲကၠုၚ်ဂိတုမာတ် စဵုကဵုစိုပ်ဂိတုမေပထမသတ္တာဟဂှ် ရပ်စပ်ဂွံလဝ် ညးမသုၚ်စောဲ သွံရာန်ဂဥုဲၜူမာဲ ၂၅ တၠတုဲ အပံၚ်မၞိဟ်ညးမရပ်စပ်လဝ် ၅၀ တၠတံဂှ် မၞိဟ်အယုက်ဇၞော်ဇၞော်တံကီု၊ မၞိဟ်ယဲဆီၜေတ်တံကီု၊ မၞိဟ်ယဲခယျာဍာတ် ကဵု မၞိဟ်ယဲဒိုက်တံဂှ်လေဝ် ပါဒၟံၚ်ကီုဂှ် ဂွံတီကေတ်ရ။
ပ္ဍဲကဵုခရိုၚ်သဓီုဏံဂှ် ဟိုတ်နူကဵုယဲကပ်ဏံတုဲ အရာညးမသွံရာန် ဂဥုဲၜူမာဲတံဂှ်လေဝ် ဂၠိုၚ်ကၠုၚ်၊ ညးမသုၚ်စောဲတံဂှ်လေဝ် ဂၠိုၚ်ဒၟံၚ်တုဲ ပ္ဍဲအရာဗ္တိုက်ဗလီု ဂဥုဲၜူမာဲတံ ညံၚ်သ္ဂောံယအ်အာဂှ် ချဳဓရာၚ် ဓမံက်အာရုပ်ရဴရောၚ် ညးအုပ်ကာခရိုၚ်သဓီု ဗော်ဍုၚ်မန်တၟိ နာဲကောန်သိုက် ဟီုရ။
“ခရိုၚ်သဓီုဏံဂှ် မၞိဟ်သုၚ်စောဲဂၠိုၚ်ကွေံ အဲကေတ်လဝ်တာလျိုၚ် ပွိုၚ်မွဲသၞာံပြၚ်ၚ်ဂှ်တှေ် ရပ်စပ်ဂွံလဝ်မၞိဟ် ၜိုတ် ၁၀၀၊ ၂၀၀ နွံဏောၚ် လၟိဟ်ဂဥုဲဂှ်လေဝ် ပိုဲဂွံကဵု ဠက်မရ။ စပ်ကဵုဂဥုဲၜူမာဲဂှ် မွဲဂိတုတှေ် မၞိဟ်ၜိုတ် ၂၀၊ ၂၅ တၠဂှ် စိုပ်မံၚ်ဟဂှ်ရ၊ ဟိုတ်ဂှ်ရ ဒုၚ်သ္ဇိုၚ်ကဵု စၞောန်ဗဟဵုတုဲတှေ် ဂဥုဲၜူမာဲတံ ညံၚ်ဂွံယအ်အာဂှ် ချဳဓရာၚ် ဓမံက်အာရုပ်ရဴရ” သာ်ဏံ နာဲကောန်သိုက် ဂးရ။
ပ္ဍဲကဵုခရိုၚ်သဓီု ဗော်ဍုၚ်မန်တၟိဂှ် သွက်ညးမဒးဒၟံၚ် ဒုဟ်ဒန်ဂဥုဲၜူမာဲကဵု ညးမထ္ပိုတ်ဂဥုဲၜူမာဲတံဂှ် ဇွောံမသ္ဂောံစအာဂှ်လေဝ် ဟွံရုမ်ဂပ်ကၠုၚ်ကီု၊ ကပေါတ်ဂဥုဲတံဂှ်လေဝ် နွံပၟိက်ကၠုၚ်မံၚ်ရောၚ် ဂွံတီကေတ်ရ။
ညးမ္ဒးဒုၚ်လဝ်ဒုဟ်ဒန် ဂဥုဲၜူမာဲမွဲတၠ မိမန်(ယၟုဍာံဟွံသေၚ်) ဂှ် “စိုပ်ဂွံဒၞါဲဏံဂှ် ပွိုၚ်မွဲသၞာံယျ၊ လၟုဟ်ဂှ် ဘဝဂှ် ခိုဟ်တိုန်မံၚ်ယျလေဝ်၊ ယဝ်ဟွံစိုပ်ကၠုၚ် ဒၞါဲဏံတှေ် ဘဝဂှ် စိုပ်မံၚ်ကဆံၚ်လဵု ဟွံတီပုဟ်၊ ဗၠးၜးတိတ်အာ နူဒၞါဲဏံတှေ် ဘဝဂဥုဲၜူမာဲဂှ် ဟွံကေတ်ရပုဟ်။ တုဲပၠန် ရဲသုၚ်စောဲမံၚ် ဂဥုဲၜူမာဲတံဂှ်လေဝ် လ္ပသုၚ်စောဲအိုတ်ညိ၊ ဂၠံၚ်ခိုဟ်လေဝ် ဟွံမွဲတုဲ ဘဝဇကုလေဝ် ဍေံဟွံခိုဟ်ပုဟ်” သာ်ဏံ ဂးရ။
ပ္ဍဲခရိုၚ်မတ်မလီုကဵု ခရိုၚ်ထဝါဲတံဂှ်လေဝ် ဒၞါဲသ္ဂောံမံၚ် သွက်လွဳလွတ် ညးမစောဲလာံဂဥုဲၜူမာဲကီု၊ ညးမ္ဒးလဝ် ဒုဟ်ဒဏ်တံကီု တုဲပၠန် သ္ဂောံဂွံအာ ဇွောံမတံဂှ်လေဝ် ဒှ်ကၠုၚ်မံၚ်အခက်ခုဲနွံဂှ် ဂွံတီကေတ်ရ။
