မိကောန်ဆာန်နန်၊ ဂျောန် ၂၃၊ ၂၀၂၀

ပ္ဍဲကဵုပေဲါရုဲမာဲ (၂၀၂၀) ဏံ ညးစၞးညးဗြဴလၟိဟ်ဂၠိုၚ်ဂၠိုၚ် သ္ဂောံပါလုပ်မာန်ဂှ် ဒးဂစာန်ရေၚ် တၠုၚ်အာရောၚ် ဥက္ကဌဂကောံညးဗြဴမန်ဟီုရ။
တုဲကၠုၚ်ဂိတုဂျောန် (၂၁) ဂှ် ဆေၚ်စပ်ကဵု ညးဗြဴတံ ဂွံပါလုပ် ပ္ဍဲကဏ္ဍပရေၚ်ဍုၚ်ကွာန် လၟိဟ်ဂၠိုၚ်ဂၠိုၚ်မာန်ဂးတုဲ ဌာနသွာၚ်ကမၠောန်ညးဗြဴ (ဗော်ညဳသၟဟ်မန်) ပံၚ်တောဲကဵု ဂကောံ ညးဗြဴမန်ပံၚ်တောဲတံတုဲ ကၠောန်ပေဲါသၠာဲဂတးလညာတ် ပ္ဍဲကဵုရုၚ်ဗော်ညဳသၟဟ်မန် ပွိုၚ်ဍုၚ် ၜါသွာၚ်ရ။
‘ပ္ဍဲကဵုဂကောံညးဗြဴမန်ပိုဲ အဓိကပံၚ်တောဲကဵု ဗော်ညဳသၟဟ်မန် တုဲတှေ် သွက်ဂွံဓမံက်အာ ရုပ်ရဴ ဆက်စပ်ကဵု တြုံ-ဗြဴ အခေါၚ်အရာတုပ်သၟဟ်၊ ပ္ဍဲပေဲါရုဲမာဲ (၂၀၂၀) ဏံ ကဏ္ဍအဆံၚ် ဖျေံသ္ဂုတ်သွာတ် ညးဗြဴ ဒးပါလုပ်ဂၠိုၚ်ဂၠိုၚ်မာန်ရောၚ်’ သာ်ဝွံ မိကောန်ဆာန်နန် ဟီုရ။
ပ္ဍဲအရာဓမံက်ရုပ်ရဴ ပ္ဍဲကဏ္ဍနာနာဂှ် ညးဗြဴတံ သ္ဒးပါလုပ် (၃၀%) ရောၚ်ဂှ် နကဵုမူ ဂကောံညးဗြဴတံ ဖျေံလဝ်နွံတုဲ အကြာဗွိုၚ်ပရေၚ်ဍုၚ်ကွာန်ကီု ဗွိုၚ်ကဏ္ဍနာနာကီုဂှ် ညးအာက္ဍိုပ်ဂကောံညးဗြဴတံ အာတ်မိက်ဆဝ်မ္ၚုဟ်ကၠုၚ် အခေါၚ်အရာညးဗြဴတံ သွက်ဂွံ ပါလုပ် ပ္ဍဲကဏ္ဍနာနာဂှ်ရ။
ပ္ဍဲပေဲါရုဲမာဲဏံ ဟိုတ်နူမၞိဟ်ဗြဴတံ ပါလုပ်အောန်မံၚ်ဏီတုဲ ညံၚ်သ္ဂောံပါလုပ်လၟိဟ်ဂၠိုၚ်ဂၠိုၚ် မာန်ဂှ် ဗွဲတၟေၚ် ပိုဲတံ ဒးဖန်ဗဒှ်အာရောၚ်၊ တၚ်ရန်တၟံ မူဝါဒဏံ ဂွံဓမံက်အာ ရုပ်ရဴမူဝါဒ ဂွံစိုပ်တရဴမာန်ဂှ် မၚ်ရီုဗၚ်၊ မၚ်သ္ၚဳဂၠိပ်အာရောၚ်ဂှ်လေဝ် မိလွဳဟာန် (ကမ္မတဳကေၚ်ကာ ဗဟဵု-ဗော်ညဳသၟဟ်မန်) ဟီုရ။
ပ္ဍဲကဵုပေဲါရုဲမာဲ (၂၀၂၀) ဏံဂှ် ညးစၞးညးဗြဴမန် ဂွံပါလၟိဟ်ဂၠိုၚ်ဂၠိုၚ်မာန်ဂှ် နူကဵုဂကောံညးဗြဴ မန်ကီု နူညးဗြဴပံၚ်တောဲတံကီု ပူဗိုၚ်ကဵုအာဇြဟတ်ရောၚ်ဂှ် ဇြဟတ်ချဳဓရာၚ်ဒၟံၚ် စပ်ကဵု ကဏ္ဍညးဗြဴတံ ဂစာန်ရေၚ်တၠုၚ်ဒၟံၚ်ရ။