သ္ဂောံဖန်ဇန်ရေၚ်တၠုၚ် ကိစ္စမာဲစဵုဒုၚ် ကုညးစိုပ်မံၚ်ဌာန်သ္ၚောဲတံဂှ် ဟိုတ်နူပရေၚ်ထိၚ်ဒဝ်စဵုဒၞာယဲကပ်တုဲ ဒှ်ခက်ခုဲ

by | Jul 16, 2020 | ပရိုၚ် | 0 comments

ဝဏ္ဏမာန်၊ ဂျူလိုၚ် ၈၊ ၂၀၂၀

ဟိုတ်နူအကာဲအရာ ပရေၚ်ထိၚ်ဒဝ်စဵုဒၞာယဲကပ် ဍုၚ်မွဲကုမွဲဂှ်တုဲ သ္ဂောံဖန်ဇန်ရေၚ်တၠုၚ် ကိစ္စမာဲစဵုဒုၚ် ပ္ဍဲဍုၚ်သေံဂှ် ဒှ်ခက်ခုဲကဵု ပရေၚ်တတ်ကၠောံ အကြာဍုၚ်မွဲကဵုမွဲတုဲ ဂွံလုပ်ဖန်ဇန်ဂှ် ဒှ်မံၚ်တၚ်ဝါတ်ဂါတ်ရောၚ် ညးတာလျိုၚ်တံ ဟီုရ။
‘ကိစ္စသ္ဂောံဖန်ဇန် ဘိုၚ်ရေၚ်တၠုၚ် ကိစ္စမာဲစဵုဒုၚ် ပ္ဍဲဍုၚ်သေံဂှ် စဳဇန်လဝ်ကိုပ်ကၠာဂှ် နူကဵုပ္ဍဲဍုၚ်မန်ဏံ ညးတာလျိုၚ် မွဲဂကောံ သွက်ဂွံဗလးဏာ အာတရဴ ပ္ဍဲဍုၚ်သေံ မွဲဂကောံတုဲတှေ် ရေၚ်တၠုၚ်ဖန်ဇန် ကိစ္စပရေၚ်ဂွံစုတ်မာဲစဵုဒုၚ်ဂှ် ဏောၚ် ချိၚ်လဝ်ဟဂှ်၊ ဆဂး ဟိုတ်နူအကာဲအရာ ယဲကပ်ဏံ ဟွံဟဲအာဏီတုဲတှေ် အကြာဍုၚ်ဗၟာကဵု ဍုၚ်သေံ ဂှ်လေဝ် ညးတံကၟာတ်လဝ် ပရေၚ်တတ်ဍုၚ်ဏောၚ်၊ ဂွံအာကၠုၚ်ဂှ် ခက်ခုဲအာဣရ’ သာ်ဏံ နာဲဗညာမန် သွာၚ် မဟာဇန်ဟီုရ။
စပ်ကဵုပေဲါရုဲမာဲ (၂၀၂၀) ဏံတုဲ သွက်ဂွံဘိုၚ်ရေၚ်တၠုၚ် ကရောံဗော်ပရေၚ်ဍုၚ်ကွာန်မန်ဂှ် ဗော်ပရေၚ်ဍုၚ်ကွာန်မန် တံကဵု သွာၚ်ဂကောံမဟာဇန်မန်တံ ပံၚ်ကောံတုဲ ပံက်လဝ် ‘ဂကောံပညဳပညပ်ပံၚ်ဗ္စပ်ပေဲါရုဲမာဲ ၂၀၂၀’ မွဲဂကောံတုဲ ဖန်ဇန်ရေၚ်တၠုၚ်ဒၟံၚ် စပ်ကဵုပရေၚ်သ္ဂောံကဵုပညာမာဲကီု၊ ပရေၚ်ချဳဓရာၚ်စပ်ကဵုပေဲါရုဲမာဲတၞဟ်ဟ်ကီုတုဲ သဳကၠဳဖန် ဇန်မံၚ်နွံရ။
‘ဂွံအာကၠုၚ်ပ္ဍဲဍုၚ်သေံဂှ် ဒှ်အာတၚ်ဂါတ်ဂါတ်တုဲတှေ် ပိုဲချိၚ်လဝ် နူဂကောံသွာၚ်မဟာဇန်ပိုဲဏံရ ညးနွံမံၚ် ပ္ဍဲဝၚ်က တံမွဲဂကောံ ကေတ်တာလျိုၚ်တုဲတှေ် သွက်ဂွံလုပ်ဖန်ဇန် ကိစ္စဂွံစုတ်စရၚ်ဂှ်ကီု၊ ဗီုဂွံအာကဵုမာဲစဵုဒုၚ် ပ္ဍဲရုၚ်ကလုတ် တံဂှ်ကီုဂှ် ကေတ်အဆက်စၠောံကဵု ဂကောံမန် ပ္ဍဲဍုၚ်သေံမွဲဂကောံတုဲ ဒးဖန်ဗဒှ်ကဵု ဂကောံဘိုၚ်ရေၚ်တၠုၚ် စပ်ကဵု ကိစ္စမာဲဏံ မွဲဂကောံဏောၚ် ချပ်လဝ်နွံ’ သာ်ဏံ နာဲဗညာမန် ထပ်ဟီုထ္ၜးရ။
ကောန်ဍုၚ်ကၟိန်ဍုၚ်ဗၟာ ကောန်ဂကူကောန်ဍုၚ်အရၚ်ဂကူဗွဲမဂၠိုၚ် စိုပ်မံၚ်ဍုၚ်သၟာၚ်တံ စတံနူဂိတုဂျူလာၚ် (၃) ဂှ်မ္ဂး စစုတ်အာစရၚ် သွက်ဂွံစုတ်မာဲစဵုဒုၚ် (ပုံစံ ၁၅) ဍုၚ်ဇကုစိုပ်မံၚ်ဂှ်မာန်တုဲ တၞးလိက်သွက်ဂွံဗပေၚ်တၚ်နၚ် (ပုံစံ ၁၅) ဂှ် အာပတိတ်ကေတ် ပ္ဍဲကဵုရုၚ်ကလုတ်ဍုၚ် မဆေၚ်စပ်တံလေဝ်ဂွံ၊ ဂၠောၚ်ၜှ် (down) ကေတ် နူကဵုဝေပ်သာ် (website) တံလေဝ်ဂွံရောၚ် ကမ္မယှေန်ပေဲါရုဲမာဲကၟိန်ဍုၚ်ဂှ် လလောၚ်တြးလဝ်ရ။
တၞးလိက်တၚ်နၚ်ဗပေၚ်လဝ် (ပုံစံ ၁၅) ဂှ် စပ္တံနူဂိတုဂျူလာၚ် (၁၆) စိုပ်အဝ်ဂါတ် (၅) လက္ကရဴအိုတ်တုဲ မ္ဒးပလံၚ်ဗစိုပ်ဏာ ရုၚ်ကလုတ်ဍုၚ်မဆေၚ်စပ်တံရောၚ် လလောၚ်တြးလဝ်ရ။
ကောန်ဍုၚ်ကၟိန်ဍုၚ်ဗၟာ ကောန်ဂကူကောန်ဍုၚ်အရၚ်ဂမၠိုၚ် နွံတန်တဴဒၟံၚ် ပ္ဍဲဍုၚ်သေံဂှ် လၟိဟ်ဗၞတ် (၁၀) ကိုတ်နွံမံၚ် တုဲ ကာလပေဲါရုဲမာဲ (၂၀၁၅) ဂှ် ဟိုတ်နူပရေၚ်အာကၠုၚ်တရဴခက်ခုဲတုဲ လၟိဟ်ညးကၠုၚ်စုတ်မာဲစဵုဒုၚ် နွံဆဗၞတ် (၆၀၀) တၠပြၚ်ဓဝ်ရောၚ် ညးတာလျိုၚ်ကမ္မယှေန် ညးဂွံအခေါၚ်ဟီုဂး ဥုမျေအ်နာၚ် ဟီုရ။

Written by

Related Posts

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲကဵုရုင်ပွိုင်ဍုင် (ရုင်အာမ်ဖေ) သင်ခႅဠဗူရဳ (ဝင်က) မၞုံခရိုၚ်ကမ္မရဳ ကၟိန်ဍုၚ်သေံဂှ်ဝွံ သၞာံဏအ် စနူဂိတုဂျောန်မံက် ဓမံက်ရုပ်ရဴ ကၠောန်သၠုင်ပတိုန်အဆံင်ၝာတ် ကဵု ညးဍုင်ကွာန်တံတုဲ စဵုကဵုသၞာံဏံအိုတ် ကၠောန်ကဵုညံင်ဂွံတုဲဒှ်အာရောင် ဂွံတီကေတ် နူသၞာဲဒဴကၠောန်ဒၟံင်ကမၠောန် (ပ္ဍဲရုင်အာမ်ဖေ) မွဲတၠဂှ် ဟီုရ။

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

နူကဵုဂကောံညဳသၟဟ်မန်ယူရောပ် က္ဍိုက်ပ်တုဲ သွက်သၞာံ ၂၀၂၅ ဏအ် ကၠောန်ဗဒှ်လဝ်သဘင်ဥတုကညင် မရနုက်ကဵု ၄ ဝါ ပ္ဍဲကဵုဍုင်နေဝ်တာလာန် တုဲဒှ်အာရ။

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

နူကဵုဂကောံရပ်လွဟ်ဒဳကေဗဳအေ ကေုာံ ဗော်ကေအေန်ယူ မထိၚ်ဒဝ်လဝ် ပ္ဍဲဍုၚ်ကျာ်ပိတအ်ဂှ် စနူဂိတုဂျူလာၚ် စၟတ်တ္ၚဲ (၂၅) ဂှ်တုဲ ကၟာတ်ကၠေံလဝ်အခေါင် သွံရာန် ဍာ်တၞးၝာဲကထီု ကော်ဂး ဍာ်တၞးဘိင်ဂမၠိုင်ရောင် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.