ပ္ဍဲကဵုသၞာံ ၂၀၂၀ ဏံမ္ဂး ဇြဟတ်ကောန်ဂကူမန်တံ ညံၚ်သ္ဂောံဒှ်အာမွဲဂှ် ရန်တၟံတုဲ သ္ဂောံကၠောန်သ္ပအာ ပေါဲဟီုတွံလိက်ပတ်မန် နကဵုက္ဍိုပ်လိ်က် “လိက်မန်စိုပ်ရုၚ် မန်အဆံၚ်သၠုၚ်” ရောၚ် ဥက္ကဌ ဂကောံအ္စာကၞေဟ်မန် နာဲအံၚ်ဇၞး ဟီုရ။
ပ္ဍဲကဵု ဂိတုဂျူလာၚ် ၁၉၊ ပထမဒဂိုန်အိုတ် အခိၚ်သဝ်တ္ၚဲ ၃ နာဍဳမ္ဂး သွက်ဂွံကၠောန်သ္ပအာ ပေါဲဟီုတွံလိက်ပတ်မန် နူလ္တူလပှ်ကျာ (Online) တုဲ ဗလးအာ Live လ္တူမုက်လိက် ဂကောံအ္စာကၞေဟ်မန်တံရောၚ် ဂွံတီကေတ်ရ။
“သၞာံ ၂၀၂၀ ဏံဂှ် ဇြဟတ်မန် ဒးဒှ်မွဲဇြဟတ်ဏောၚ်။ ဇြဟတ်ညံၚ်ဂွံပူဗိုၚ်အာ ပ္ဍဲကဵုသၞာံဏံဂှ် ပိုဲတံစွံလဝ်စိုတ်ဗီုဂှ်တုဲတှ်ေ ကၠောန်အာပေါဲဟီုတွံလိက်ပတ်မန်ဏောၚ်။ တုဲတှ်ေ ပိုဲတံ ပတဝ်လဝ်ကဵုဝိုၚ် လိက်မန်စိုပ်ရုၚ် မန်အဆံၚ်သၠုၚ်ရ ရန်တၟံလဝ် ဗီုဂှ်ရ” သာ်ဏံ နာဲအံၚ်ဇၞး ဂးရ။
ဇြဟတ်ကောန်ဂကူမန်တံ ညံၚ်သ္ဂောံကောံတုဲ လိက်ပတ်မန်တံ ညံၚ်သ္ဂောံစိုပ်ကၠုၚ်ရုၚ်ဂှ် မိက်သ္ဂောံပံက်အာလညာတ် ကုကောန်ဂကူမန်တံတုဲ ကၠောန်သ္ပအာပေါဲဟီုတွံလိက်ပတ်မန် ဏံရရောၚ် ဂွံတီကေတ်ရ။
“လိက်မန်ပိုဲဂှ် လိက်နွံကဵုဍုၚ် လိက်နွံကဵုရုၚ် ညံၚ်ဂွံစိုပ်ဂှ် ပိုဲတံဒးဟစိုပ်ဏောၚ်။ ယဝ်ရ လညာတ်မန်ပိုဲကောံ ဇြဟတ်မန်ပိုဲကောံတှ်ေ လိက်မန်ပိုဲ ပိုဲတံဓရိုဟ်တှ်ေ စိုပ်ရုၚ်ဏောၚ်။ တုဲပၠန် အမာတ်မန်ပိုဲ ဂၠိုၚ်ကၠုၚ်ပ္ဍဲကၠတ်ထဝ်တှ်ေ ဗီုပိုဲတံအာတ်ဂှ် ဂွံလောဲကၠုၚ်ဏောၚ်လေဝ် ဂွံပေၚ်ပေၚ်ရဂှ်ဟွံသေၚ် ဆဂး ဍေံလောဲကၠုၚ်ရ” သာ်ဏံ နာဲအံၚ်ဇၞး ဆက်ဟီုရ။
ပ္ဍဲသၞာံ ၂၀၁၅ (သက္ကရာဇ်ဍုၚ်- ၁၃၇၇) ဂှ် စဒက်ပ္တန်ကၠုၚ်လဝ် ဂကောံအ္စာကၞေဟ်မန်တုဲ နကဵုအ္စာကၞေဟ်တံ ရုဲစှ်ပ္တိုန်လဝ်ညးတာလျိုၚ် ကေၚ်ကာ (၁၅) တၠရောၚ် ဂွံတီကေတ်ရ။
